الماتى وبلىسىنىڭ ۇزدىك ەكى وتباسىنا ءبىر ميلليون تەڭگەدەن سىياقى بەرىلدى - فوتو
كوجەكبايەۆتار مەن جاراسوۆتار اۋلەتى جەڭىمپاز اتانىپ، وتباسىنىڭ ءارقايسىسى 1 ميلليون تەڭگەنىڭ سەرتيفيكاتىن، I دارەجەلى ديپلوم يەلەندى. 105 جاستاعى قاريا كۇرىشبەك كوجەكبايەۆ پەن ماقسىمجان جاراسوۆقا ماراپاتتارىن وبلىس اكىمىنىڭ ورىنباسارى جاقسىلىق ومار تابىس ەتتى، دەپ حابارلايدى قازاقپارات ءتىلشىسى.
جامبىل اۋدانىنان كەلگەن جاراسوۆتار وتباسى - «جاسىل ەل» مەملەكەتتىك باعدارلاماسىن جۇزەگە اسىرۋعا اۋقىمدى ۇلەس قوسقان اۋلەت. وتاعاسى ماقسىمجان جاراسوۆ ميلليوننان استام اعاش وتىرعىزعان. مەملەكەت باسشىسىنىڭ جارلىعىمەن «قۇرمەت» وردەنىن يەلەنىپ، «ەكولوگيا سالاسىنىڭ ۇزدىگى» توسبەلگىسىن العان. 8 بالانى اياقتاندىرىپ، ودان 40 نەمەرە، 21 شوبەرە ءسۇيدى. ۇيعىر اۋدانىنىڭ تۇرعىندارى، كوجەكبايەۆتار وتباسىنىڭ دا ۇلگىسى ەرەن. كۇرىشبەك كوجەكبايەۆ - ۇلى وتان سوعىسىنىڭ ارداگەرى، سوعىستان كەيىن دە ەلدىڭ الەۋمەتتىك- ەكونوميكالىق دامۋىنا زور ۇلەس قوستى.
بىرنەشە مەملەكەتتىك ناگرادالارعا يە بولعان، سونىڭ ىشىندە «قۇرمەت» وردەنى دە بار. قازىرگى كەزدە 105 جاستاعى ارداگەر 4 بالادان 25 نەمەرە، 30 شوبەرە، 15 شوپشەك ءسۇيىپ وتىر. ەندى جاراسوۆ پەن كوجەكبايەۆتاردىڭ اۋلەتى ەلوردادا وتەتىن رەسپۋبليكالىق بايقاۋدا باق سىناپ، وبلىستىڭ نامىسىن قورعايتىن بولادى. «بۇگىن ءوز مارەسىنە جەتىپ وتىرعان «مەرەيلى وتباسى» بايقاۋىنىڭ وبلىستىق كەزەڭى قۇتتى بولسىن! ەلباسىمىز نۇرسۇلتان ءابىش ۇلى نازاربايەۆتىڭ باستاماسىمەن قولعا الىنعان بايقاۋدىڭ ماقساتى - وتباسىلىق قۇندىلىقتاردى ناسيحاتتاۋ، تاتۋ- ءتاتتى، تاربيەلى شاڭىراق مۇشەلەرىن كوپشىلىككە تانىستىرۋ.
ەل ىشىندە اۋىلداستارىنىڭ قۇرمەتىنە بولەنگەن، ارداقتى، بەرەكەلى اۋلەتتەر، ونەگەسى مول وتباسىلار بارشىلىق. سوندىقتان جىل وتكەن سايىن «مەرەيلى وتباسى» بايقاۋىنىڭ ءمانى ارتىپ، قاتىسۋشىلار قاتارى ۇلعايىپ كەلەدى. ءبىز مەرەيلى وتباسىلاردى ۇلگى- ونەگە ەتۋ ارقىلى وسكەلەڭ ۇرپاقتى ىزگىلىككە تاربيەلەيمىز. بۇگىنگى بايقاۋ جەڭىمپازدارىن شىن جۇرەكتەن قۇتتىقتايمىن!»، - دەدى ج. ومار. ەكىنشى ورىندى ۇيعىر اۋدانىنىڭ تۇرعىندارى حامرايەۆتار وتباسى مەن تالدىقورعاندىق مىرزاتايەۆتار جانە ەسكەلدى اۋدانىنان تايجانوۆتار يەلەنىپ، 300 مىڭ تەڭگەنىڭ سەرتيفيكاتىن الدى. ءۇشىنشى ورىنعا لايىق دەپ تانىلعان الاكولدىك قوجابەكوۆتەر وتباسى، ەڭبەكشى قازاق اۋدانىنان قارتبايەۆتار جانە قاراساي اۋدانىنان كەلگەن جانعۇتتىلار وتباسىنا III دارەجەلى ديپلوم مەن 250 مىڭ تەڭگەنىڭ سەرتيفيكاتى بەرىلدى. ولار وبلىستىڭ ساۋدا، شىعارماشىلىق، اۋىل شارۋاشىلىعى، اسكەري قىزمەت سالالارىندا ەڭبەك ەتىپ جۇرگەن ونەگەلى وتباسىلار.
بايقاۋعا قاتىسقان باسقا 30 وتباسىعا وبلىس اكىمىنىڭ العىس حاتتارى مەن اقشالاي سىيلىقتارى بەرىلدى. قاتىسۋشىلار مەن جەڭىمپازدار اتىنان ءسوز سويلەگەن كۇرىشبەك اتا ەلباسىنىڭ ساليقالى ساياساتىن جۇرگىزۋگە اركىم دە اتسالىسۋ كەرەكتىگىن، ەڭ الدىمەن جاس ۇرپاق اناسىن، ۇلكەندەردى سىيلاپ، ەڭبەكتى ءسۇيىپ، بەرەكە-بىرلىكتە ءومىر ءسۇرۋ كەرەكتىگىن اتاپ ءوتىپ، باتاسىن بەردى.
جالپى، بايقاۋدىڭ العاشقى كەزەڭىندە الماتى وبلىسى بويىنشا 290 وتباسى قاتىسسا، سولاردىڭ 38 ى قازىلار القاسىنىڭ جوعارى باعاسىن الىپ، وبلىستىق بايقاۋعا جولداما الدى. جىل وتباسى اتاعىنا كوپ بالالى وتباسىلار، ەڭبەك اۋلەتتەرى، شىعارماشىلىق وتباسىلار، دارىگەرلەر، مۇعالىمدەر جانە باسقا دا ۇلگىلى شاڭىراقتار ۇمىتكەر بولدى.
اۆتور: سامال قابىشەۆا
