نۇرسۇلتان نازاربايەۆ «ۇلى دالا» حالىقارالىق فورۋمىنا ساتتىلىك تىلەدى - فوتو
ەلباسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىنا ارنالعان فورۋمنىڭ اشىلۋ سالتاناتىنا قازاقستان رەسپۋبليكاسىنىڭ مەملەكەتتىك حاتشىسى گۇلشارا ءابدىقالىقوۆا مەن ب ۇ ۇ، يۋنەسكو، يسەسكو، ECO Science Foundation، تۇركى كەڭەسى، تۇركسوي، تۇركپا سىندى حالىقارالىق ۇيىم باسشىلارى مەن وكىلدەرى قاتىستى.
سونىمەن بىرگە ديپلوماتتار، مەملەكەت جانە قوعام قايراتكەرلەرى، ىرگەلى زەرتتەۋ ورتالىقتارىنىڭ باسشىلارى، كورنەكتى عالىم-زەرتتەۋشىلەر قاتىسقان القالى جيىندى قازاقستان رەسپۋبليكاسىنىڭ مەملەكەتتىك حاتشىسى گۇلشارا ءابدىقالىقوۆا قۇتتىقتاۋ سوزىمەن اشىپ، قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ قۇتتىقتاۋ حاتىن وقىپ بەردى.
ەلباسى قۇتتىقتاۋىندا فورۋم جۇمىسىنا ساتتىلىك تىلەدى.
ا ق ش، ۆەنگريا، گەرمانيا، قىتاي، موڭعوليا، وڭتۇستىك كورەيا، ءۇندىستان، رەسەي مەن تۇركى مەملەكەتتەرىنەن كەلگەن 200 گە جۋىق عالىم-زەرتتەۋشىلەر مەن ساراپشىلار 6 پانەلدى وتىرىستا مازمۇندى باياندامالار جاساپ، ەلباسى ماقالاسىندا كوتەرىلگەن مىندەتتەر مەن تاقىرىپتار توڭىرەگىندە پايىمدى پىكىرلەرىن ورتاعا سالادى.
«رۋحاني جاڭعىرۋ جولىندا»، «عىلىم كيەسى: عىلىمي ينتەگراتسيا جانە ورتاق قۇندىلىقتار»، «تاريحي جادى جانە بولاشاققا كوزقاراس»، «تۇركى ادەبي ءداستۇرى جانە قازىرگى كەزەڭ»، «تۇركى تىلدەرى: زەرتتەۋ، قورعاۋ جانە دارىپتەۋ»، «الەم وركەنيەتىندەگى تۇركى مادەني مۇراسى» اتتى التى سەكسيادا عىلىمدى دامىتۋ ماسەلەلەرى، قازاق ءتىلىنىڭ لاتىن الىپپەسىنە كوشۋى، كيەلى جەرلەر مەن قاستەرلى مەكەندەرگە ارنالعان «تۋعان جەر» باعدارلاماسى سىندى ماسەلەلەر تالقىلانىپ، سىندارلى پىكىرلەر ايتىلادى دەپ كۇتىلۋدە.
سونىمەن بىرگە، بيىلعى فورۋم اياسىندا TWESCO تۇركى الەمى عىلىمىنا سىڭىرگەن ەرەن ەڭبەگى مەن باۋىرلاس حالىقتار اراسىنداعى ىنتىماقتاستىقتى نىعايتۋعا قوسقان ۇلەسى ءۇشىن كورنەكتى مەملەكەت جانە قوعام قايراتكەرى، اكادەميك مىرزاتاي جولداسبەك ۇلى جولداسبەكوۆتى التىن مەدالدارمەن ماراپاتتادى.
بۇدان بولەك، شارا بارىسىندا TWESCO سوڭعى جىلدارى شىعارعان كىتاپتاردىڭ كورمەسى ۇيىمداستىرىلدى.
