ەلىمىز اسكەري تەحنيكا شىعارىپ، قورعانىس سالاسىن تولىق قامتاماسىز ەتە الاتىن دارەجەگە جەتكەن

استانا. قازاقپارات - ەلىمىزدىڭ قورعانىس جانە ايروعارىش ونەركاسىبىنىڭ ەكسپورتتىق الەۋەتى ارتىپ كەلەدى. سەبەبى، قازىر وتاندىق اسكەري تەحنيكانىڭ زاماناۋي ۇلگىلەرى باسەكەگە قابىلەتتى.

 بۇل تۋرالى سىرتقى ىستەر مينيسترلىگىندە ەلشىلەرمەن وتكەن كەزدەسۋدە ايتىلدى.

جيىندا شەتەلدىك سەرىكتەستەرمەن ەكىجاقتى ىنتىماقتاستىقتى دامىتۋ مۇمكىندىگى قاراستىرىلدى. سونداي- اق شاعىن كورمەگە اسكەري تەحنيكالاردىڭ ۇلگىلەرى قويىلعان. وسى ارقىلى شەتەلدىك ديپلوماتيالىق كورپۋس وكىلدەرى قورعانىسىمىزدىڭ قاۋقارىمەن تانىستى.

 بۇگىندە ەلىمىزدە 27 قورعانىس، 7 ايروعارىش كاسىپورنى اسكەري تەحنيكا شىعارىپ، قورعانىس سالاسىن تولىق قامتاماسىز ەتە الاتىن دارەجەگە جەتكەن.

مەيىربەك مولدابەكوۆ، ق ر قورعانىس جانە ايروعارىش ونەركاسىبى ءمينيسترىنىڭ كەڭەسشىسى:

 - تاعى جەكەشەلەندىرىلگەن بىرنەشە كاسىپورىن بار. سولار قورعانىس مينيسترلىگىنە قاجەت ءونىمدى وزىمىزدە ءوندىرۋ ءۇشىن جۇمىس ىستەپ جاتىر. ايروعارىش جانە قورعانىس ونەركاسىبىنىڭ ونىمدەرىن شەتەلگە شىعارىپ جاتقاندار بار. ءبىراق شەتەلگە قارۋ- جاراق ساتۋ - وتە كۇردەلى ماسەلە.

www.24.kz