ءبىلىم مينيسترلىگى مۇعالىمدەردى ەكسپو بيلەتتەرىن ساتىپ الۋعا ماجبۇرلەمەۋگە شاقىردى
«ەكسپو-2017 كورمەسى ءاربىر قازاقستاندىقتىڭ ماقتانىشىنا اينالۋى ءتيىس، سوندىقتان دا كوپشىلىكتىڭ وسىناۋ الەمدىك ماڭىزى بار اۋقىمدى شارانىڭ وتكىزىلۋ قۇرمەتى ەلىمىزدىڭ ەنشىسىنە تيگەندىكتەن، وعان قاتىسۋ نيەتى، بيلەتتەردى ساتىپ الۋى - پاتريوتيزمنىڭ بەلگىسى. ءبىلىم جانە عىلىم مينيسترلىگى مەن ەكسپو باسشىلىعى جەرگىلىكتى اتقارۋشى ورگانداردىڭ، باسقا دا ۇيىمداردىڭ باسشىلارىن مۇعالىمدەردى كورمە بيلەتتەرىن ساتىپ الۋعا ماجبۇرلەمەۋگە شاقىرادى. ءوز تاراپىنان قر بعم كورمە بيلەتتەرىن ساتىپ الۋعا بايلانىستى قانداي دا ءبىر بۇيرىق جاساماعانىن، سونىمەن قاتار مۇنداي ارەكەتتەرگە قارسى ەكەندىگىن جەتكىزەدى»، - دەپ اتاپ وتىلگەن ق ر ب ع م مالىمەتىندە.
ۆەدومستۆو وكىلدەرىنىڭ پايىمىنشا، مينيسترلىكتىڭ بۇل جايىنداعى پوزيتسياسى ايقىن: حالىقارالىق كورمە باستالار الدىندا اۋقىمدى ءتۇسىندىرۋ جانە ناسيحاتتاۋ جۇمىستارى جۇرگىزىلىپ، شارانىڭ ءمانى مەن ماڭىزىن، ونىڭ زامانالىق ءھام الەمدىك دەڭگەيدەگى وقيعا ەكەندىگىن جەتكىزىپ، كوپشىلىكتىڭ شىنايى قىزىعۋشىلىعىن تۋدىرۋ قاجەت.
«شىن مانىندە، قازاقستاندىقتار ءوز جەرىندە بۇرىن- سوڭدى بولماعان شاراعا قاتىسىپ، كورمە پاۆيلوندارىن كورىپ، وتاندىق قانا ەمەس، ەكسپو- 2017 كورمەسىنە قاتىسۋ نيەتىن ءبىلدىرىپ، دايىندالىپ جاتقان ەلدەردىڭ مادەنيەت، ەكونوميكا، عىلىم، جاڭا تەحنولوگيالار، ياعني قاي سالالارى بولماسىن، بۇگىنگى ەڭ ۇزدىك ۇلگىلەرىمەن تانىسۋدىڭ بىردەن- ءبىر مۇمكىندىگىنە يە بولىپ وتىر. بۇگىن استانا وسىناۋ ءدۇبىرلى وقيعانىڭ باستالۋىن تاعاتسىزدانا كۇتىپ، عالامات دايىندىق جۇمىستارىن اياقتاپ جاتىر. ايتۋلى شاراعا قاجەتتى، حالىقارالىق ستاندارتتارعا ساي ينفراقۇرىلىمدى قۇرۋ جۇمىستارى دا اياقتالىپ كەلەدى»، - دەلىنگەن حابارلامادا.
اۆتور: رۋسلان عابباسوۆ
