ەكسپو قالاشىعىندا «اقىلدى شامدار» ورناتىلادى

استانا. قازاقپارات - ەكسپو- قالاشىقتىڭ اۋماعىندا ورناتىلعان شامدار كولىك پەن جاياۋ جۇرگىنشىلەرگە بايلانىستى جارىعىن وزگەرتىپ وتىراتىن بولادى، دەپ حابارلايدى قازاقپارات.

«كوشە جارىعىنىڭ اقىلدى جۇيەسى قىزىق جوبالاردىڭ ءبىرى بولعالى وتىر. بۇگىندە بارلىعىمىز ءۇشىن ديودتى جارىق شامدارىن قولدانۋ تاڭسىق ەمەس، ءبىراق ءبىز اتالمىش شامداردىڭ جارىعىن باسقارۋ جۇيەسىن قولداندىق. تۇندە كولىك پەن جاياۋ جۇرگىنشىلەر جوق كەزدە بۇل جۇيە شامداردىڭ جارىعىن 10 پايىزعا دەيىن تومەندەتە الادى جانە كولىك نەمەسە جاياۋ جۇرگىنشىلەر وتكەن كەزدە جارىقتى قايتا قالپىنا كەلتىرەدى»، - دەيدى «استانا ەكسپو-2017» ۇلتتىق كومپانياسى جاڭا تەحنولوگيالار جانە IT دەپارتامەنتى ديرەكتورىنىڭ ورىنباسارى دانيار ءاشىروۆ.

ونىڭ سوزىنشە، وسىلايشا بۇل جۇيە جارىققا كەتەتىن شىعىندى 30 پايىزعا دەيىن ازايتا الادى. جالپى ەكسپو اۋماعىندا 1200 گە تارتا «اقىلدى شام» ورناتىلماق. سونىمەن قاتار كورمە اۋماعىندا قولدانىلاتىن تەحنولوگيالاردىڭ ءبىرى «اقىلدى ەنەرگوجۇيەلەر - Smart Grid»  بولماق. بۇل جۇيە 42 قوسالقى ستانسانى باسقارۋ ورتالىعىنىڭ ءبىرىڭعاي جەلىسىنە جالعايدى. بۇل ءوز كەزەگىندە اپاتتاردى جويۋ ۋاقىتىن ازايتىپ، جۇكتەمەنى جىكتەۋگە، ەلەكتر ەنەرگياسىن تاسىمالداۋ بارىسىندا كەتەتىن شىعىندى 30 پايىزعا دەيىن ازايتۋعا مۇمكىندىك بەرەدى.

اۆتور: جاسۇلان جولدىبايەۆ