13:14, 24 - مامىر 2017 | GMT +5
ەردوعان تۇرىك ءتىلىنىڭ تازالىعىن ساقتاۋعا شاقىردى
استانا. قازاقپارات - تۇركيا پرەزيدەنتى رەدجەپ تايىپ ەردوعان تۇرىك ءتىلىنىڭ تازالىعىن ساقتاۋعا شاقىردى، دەپ حابارلايدى « انادولۋ» اگەنتتىگى.
تۇركيا پرەزيدەنتى انكارادا وتكەن 8- حالىقارالىق تۇرىك ءتىلى سەزىنە قاتىسىپ، تۇرىك ءتىلىنىڭ الەمدەگى ەڭ باي تىلدەردىڭ ءبىرى ەكەندىگىن جانە تۇرىك حالقىنىڭ ۇلتتىق بىرەگەيلىگىنىڭ نەگىزىن قۇرايتىندىعىن اتاپ ءوتتى.
«تۇرىك تىلىندە نەگىزسىز قولدانىلاتىن كىرمە سوزدەر كوبەيىپ بارادى. مىسالى، تۇركيانىڭ سپورت كەشەندەرىنە جانۋارلار جارىسىن ۇيىمداستىراتىن ەۋروپالىق ورتالىقتاردىڭ اتىن بەرۋ - دۇرىس ەمەس جانە لايىقسىز»، - دەدى ەردوعان. ەردوعان مىڭداعان جىلدار بۇرىن جاسالعان تۇرىك ءتىلىنىڭ سوزدىگىندە 10 مىڭعا جۋىق ءسوز بولعاندىعىن ەسكە سالدى.
« مۇنداي ءتىلدى « كەدەي» دەۋ - اقىلعا سىيمايدى. ءتىلدىڭ السىرەۋىمەن بىرگە حالىقتىڭ رۋحى دا السىرەيتىنىن ۇمىتپاۋ كەرەك. سوندىقتان ءتىلدى قورعاۋ قاجەت. تۇرىك ءتىلىنىڭ بايلىعى مەن ساقتالۋى وتە ماڭىزدى»، - دەدى ول.
