قازاقستاننىڭ ءۇش قالاسىنان مىسىرعا اۋە جولدارى اشىلادى

استانا. قازاقپارات - قازاقستاننىڭ ءۇش قالاسىنان مىسىرعا چارتەرلىك رەيستەر اشىلادى، دەپ حابارلايدى «قازاقپارات» ح ا ا ءتىلشىسى.

شىلدە ايىنان باستاپ قازاقستاندىق تۋريستەر استانا، الماتى جانە اتىراۋ قالالارىنان مىسىردىڭ شارم ەل- شەيح كۋرورتتىق قالاسىنا قولجەتىمدى باعامەن ۇشا الادى.

بۇگىن استانادا قازاقستان رەسپۋبليكاسىنداعى ەگيپەت ەلشىسى حايسام سالاح كامەل يبراگيمنىڭ قاتىسۋىمەن وتكەن باسپا ءسوز ءماسليحاتىندا مىسىر ساپارىنىڭ قازاقستاندىق تۋريستەرگە ءتيىمدى تۇستارى تالقىلاندى.

«شارم- ەل- شەيح قالاسىنداعى قوناق ۇيلەردىڭ 90 پايىزى بالالاردى تەگىن ورنالاستىرادى، بۇل قازاقستاندىق جانۇيالار ءۇشىن اسا ماڭىزدى. تاعى ءبىر اتاپ وتەر جايت، جاڭا رەيس ارقىلى تۋريستەردىڭ قاراجاتى ايتارلىقتاي ۇنەمدەلەدى، سەبەبى بيىل شارم- ەل- شەيح اۋەجايى تۋريستىك رەيستەرگە ارنايى تومەندەتىلگەن تاريف ەنگىزدى، وسى ارقىلى بيلەت قۇنى ەداۋىر تومەندەمەك. سونداي- اق اتالعان كۋرورتتى ايماققا باراتىن جولاۋشىلار مىسىر اۋماعىنا ۆيزاسىز كىرە الادى. وسىلايشا، قازاقستاندىق تۋريستەر ءۇشىن سەرۆيسى دامىعان بەس جۇلدىزدى قوناق ۇيدەگى 10 كۇندىك دەمالىس شامامەن 200 مىڭ تەڭگەنى قۇرايدى»، - دەدى «KAZUNION» تۋريستىك وپەراتورى كومپانياسىنىڭ ديرەكتورى قۋانىش بايتۇرسىنوۆ.

تۋريستىك وپەراتور وكىلدەرى كەلتىرگەن دەرەكتەرگە سۇيەنسەك، ناۋرىز ايىندا 5 مىڭنان استام قازاقستاندىق تۋريست مىسىرعا بارعان. قازىرگى ۋاقىتتا چارتەرلىك رەيستەر ارقىلى اي سايىن 3-4 مىڭعا جۋىق قازاقستاندىق شارم- ەل- شەيحكە ساپارلايدى دەپ جوسپارلانىپ وتىر.

اۆتور: ايجان سەرىكجان قىزى