قازاق كۇرەسىنىڭ جەڭىمپازدارى قاجىلىققا اتتانادى
بالۋاندار سايىسى EXPO-2017 حالىقارالىق كورمەسى اياسىندا قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ەرجان قاجى مالعاجى ۇلىنىڭ جۇلدەسى ءۇشىن وتكىزىلدى. وعان ءار وڭىردەن ىرىكتەلىپ شىققان 59 بالۋان قاتىستى.
ۇلتتىق سپورتتىڭ ابىرويىن اسقاقتاتقان ءدۇبىرلى دودانىڭ اشىلۋ سالتاناتىندا باس ءمۇفتي ەرجان مالعاجى ۇلى، قازاقتىڭ داڭقتى بالۋانى، كۇرەستەن تۇڭعىش وليمپيادا چەمپيونى جاقسىلىق ۇشكەمپىروۆ، «Alem Fighters» كاسىپقوي سپورت كلۋبىنىڭ پرەزيدەنتى ارداق نازاروۆ سپورتشىلاردى ءداستۇرلى تۋرنيرمەن قۇتتىقتاپ، ولارعا ساتتىلىك تىلەدى.
«قازاق كۇرەسى - ونەر. بۇل ءبىزدىڭ بولمىسىمىزدا، قانىمىزدا بار قاسيەت، دىنىمىزبەن استاسىپ جاتقان ۇلتتىق ءداستۇرىمىز. كۇرەس - پايعامبارىمىزدان (اللانىڭ وعان سالاۋاتى مەن سالەمى بولسىن) كەلە جاتقان سۇننەت. قازاق كۇرەسى كۇش پەن ادىسكە قوسا، ادىلدىكتى دە قاجەت ەتەدى. اللا ەلشىسى (اللانىڭ وعان سالاۋاتى مەن سالەمى بولسىن) ءبىر حاديسىندە: «كۇشتى مۇسىلمان اللا تاعالا قۇزىرىندا ءالسىز مۇسىلماننان جاقسىراق»، - دەگەن.
مۇنداي باستامالار قوعامدى بىرلىك پەن ىنتىماققا، باۋىرمالدىق پەن كىشىپەيىلدىلىككە شاقىرادى. ءدىني باسقارما حالىق اراسىندا «ءدىن مەن ءداستۇر»، «تاريح جانە تاعىلىم جىلى» اياسىندا يماندىلىق پەن اۋىزبىرشىلىكتى ناسيحاتتاپ كەلەدى»، - دەدى باس ءمۇفتي ەرجان قاجى مالعاجى ۇلى.
قازاقتىڭ داڭقتى بالۋانى جاقسىلىق ۇشكەمپىروۆ سپورتشىلار مەن جانكۇيەرلەرگە بەلسەندىلىگى ءۇشىن العىس ايتتى. تۋرنيردىڭ قورىتىندىسىندا جەڭىمپازدار ۇلكەن جانە كىشى قاجىلىقتارعا جولدامالار الىپ، قارجىلاي سىيلىقتارمەن ماراپاتتالدى. اتاپ ايتقاندا، حالىقارالىق دارەجەدەگى تورەشىلەر شەشىمىمەن ءى ورىن يەگەرى داۋلەتحان قوسماعانبەت (قوستاناي) - ۇلكەن قاجىلىققا، Ⅱ ورىن يەگەرى مالىك تولەۋشوۆ (اتىراۋ) - كىشى قاجىلىققا، Ⅲ ورىن العان داۋرەن نۇرعوجين (سولتۇستىك قازاقستان وبلىسى) كىشى قاجىلىققا جولدامالار الدى.
