دانيار ەلەۋسىنوۆ: ۇلتتىق قۇراماعا قايتىپ كەلۋىم مۇمكىن

استانا. قازاقپارات - ريو-دە-جانەيرو وليمپياداسىنىڭ چەمپيونى ۇلتتىق قۇراماعا قايتىپ كەلۋى مۇمكىن.

بۇل تۋرالى بوكسشى قازاقپارات تىلشىسىنە بەرگەن شاعىن سۇحباتىندا ءمالىم ەتتى.

- دانيار، وتكەن جىلدىڭ اياعىندا ءبىر جولا كاسىپقوي بوكسقا اۋىسقانىڭدى ەلىمىزدەگى بارلىق ب ا ق وكىلدەرى جارىسا جازىپ، ساتتىلىك تىلەگەن ەدى. بۇگىن كەلىسىم جاساعان كومپانياڭمەن قول ۇزگەنىڭ تۋرالى اقپارات تارادى. بۇل قانشالىقتى راس؟

- ءيا، قالاي ەستىپ جاتساڭىزدار، سولاي بولىپ جاتىر. اۆستراليالىق MJA Entertainment پروموۋتەرلىك كومپانياسىمەن كەلىسىمشارتىمىز بۇزىلدى.

- وعان نە سەبەپ بولدى؟

- ولار ءبىزدى الداپ سوقتى. ال ولاردى كىم الداعانىن ناقتىلى بىلمەيمىن. ولار بىزگە بەرگەن ۋادەسىن ورىنداي المادى. نەگىزى جوسپار بويىنشا مامىر ايىندا قىتايدا ءبىرىنشى جەكپە-جەگىمىزدى وتكىزۋ كەرەك بولاتىن. وتپەي قالدى. مۇمكىن قىتايلىقتارمەن كەلىسە الماعان شىعار، ول جاعى دا بىزگە تۇسىنىكسىز. مىنە، وتكەن جىلدىڭ اياعىنان بەرى قانشاما ۋاقىتىمىزدى الدى. تەككە ۋاقىتىمىز كەتتى. سول ءۇشىن ول پروموۋتەرلىك كومپانيامەن حوش ايتىسۋعا تۋرا كەلدى.

- ەندى نە ىستەمەك ويىڭىز بار؟ ۇلتتىق قۇراماعا قايتا كەلۋ ويىڭىزدا بار ما؟

- ارينە، ۇلتتىق قۇراماعا قايتا ورالۋ ويىمدا بار. باسقا جولدار قاراستىرىپ جاتقان جوقپىن.

- ۇلتتىق قۇراما قايتادان وپ-وڭاي الا سالادى دەپ ويلايسىز با؟

- جوق، ونداي وڭاي شارۋا بولمايتىنىن بىلەم. ول ءۇشىن ۇلكەن سۇزگىدەن وتۋىمە تۋرا كەلەدى. قايتادان ەل بىرىنشىلىگىنە قاتىسىپ، ءوزىمنىڭ بابىمدا ەكەنىمدى دالەلدەۋ كەرەكپىن.

- ۇلتتىق قۇرامادان كەتىپ قالعانىڭىزعا وكىنىپ قالعان سياقتىسىز؟

- الدانىپ قالعانىمىزعا وكىنەمىز. ۇلتتىق قۇرامادا مەنىمەن بىرگە جەكە باپكەرىم رەتىندە اكەم دە جۇمىس ىستەدى. اۋەسقوي بوكسقا كەتەم دەگەندە اكەم دە مەنىمەن بىرگە جۇمىستان شىعىپ كەتتى. ەندى وسىنىڭ بارلىعىن قالپىنا كەلتىرۋ ءۇشىن ءبىراز ەڭبەكتەنۋ كەرەك ەكەنى بەلگىلى.

- قازىر قازاقتىڭ مەنشىگى اتىنىپ كەتكەن 69 كەلى سالماقتا ابىلايحان ءجۇسىپوۆ دەگەن باۋىرىڭىز جۇرگەنىن جاقسى بىلەسىز؟ ءسىز ۇلتتىق قۇراماعا كەلسەڭىز، قاي سالماقتا ونەر كورسەتەسىز؟

- ءيا، ءجۇسىپوۆتى جاقسى بىلەمىن. وسىعان دەيىن ۇلتتىق قۇرامادا بىرگە جاتتىقتىق. ريوعا بىرگە باردىق. بولاشاعىنان زور ءۇمىت كۇتتىرەتىن تالانتتى بوكسشى. ال قازىر مەن ۇلتتىق قۇراماعا قايتا بارىپ جاتسام، قاي سالماقتا جۇدىرىقتاساتىنىمدى ءالى شەشكەن جوقپىن. ونى ۋاقىت كورسەتەدى.

اۆتور: كۇنسۇلتان وتارباي