باتىس قازاقستاندىق سپورتشى اۋدارىسپاقتان ەل چەمپيونى اتاندى

ورال. قازاقپارات - باتىس قازاقستاندىق سپورتشى نارماعانبەت يمانعازى ۇلى ۇلتتىق سپورت تۇرلەرى بويىنشا الماتىدا ەرەسەكتەر اراسىندا وتكەن ەل چەمپيوناتىندا اۋدارىسپاقتان جەڭىمپاز اتاندى، دەپ حابارلايدى «قازاقپارات» ءتىلشىسى.

ب ق و ۇلتتىق سپورت مەكتەبىنىڭ ديرەكتورى داستان مىرزاعاليەۆتىڭ ايتۋىنشا، نارماعانبەتتىڭ سالماعىندا (60 كەلى) بارلىعى 14 سپورتشى باق سىنادى. سولاردىڭ ىشىنەن ن. يمانعازى ۇلى ەشكىمگە دەس بەرمەي، ۇزدىك شىقتى.

سونىمەن قاتار مەيىربەك قۇسايىنوۆ 90 كەلى سالماقتا ءۇشىنشى ورىنعا كوتەرىلدى. ولاردى اقتىلەك سارسەنوۆ جاتتىقتىرادى. «شاكىرتتەرىمىزدىڭ جەڭىس تۇعىرىنان كورىنۋى قۋانتادى. نارماعانبەت وسىمەن ءتورت مارتە ەل چەمپيونى اتانىپ وتىر. بۇعان دەيىن جاس وسپىرىمدەر، جاستار اراسىندا ءبىرىنشى ورىن السا، ەندى، مىنە، ەرەسەكتەر ساپىندا دا چەمپيوندىق اتاقتى جەڭىپ الدى. سول سەكىلدى مەيىربەك تە جاستار اراسىندا ەل بىرىنشىلىگىنىڭ قولا جۇلدەسىنە يە بولعان ەدى»، - دەدى «قازاقپارات» تىلشىسىنە داستان مىرزاعاليەۆ.

اۆتور: ەلجان ەرالى