ەلباسى: كينو الەمىندەگى اسانالى ءاشىموۆتىڭ ەسىمىن كۇللى قازاقستان ماقتان تۇتادى - كەسكىن
بۇل تۋرالى اقوردانىڭ باسپا ءسوز قىزمەتى حابارلايدى.
مەملەكەت باسشىسى بيىلعى 12- مامىردا الماتى قالاسىنداعى م. اۋەزوۆ اتىنداعى تەاتردا مەرەيتوي يەسىنىڭ قۇرمەتىنە وراي ۇيىمداستىرىلعان مەرەكەلىك ءىس-شارانىڭ جوعارى دەڭگەيدە وتكەنىن اتاپ ءوتتى.
- ارىپتەستەرىڭىز جانە زيالى قاۋىم وكىلدەرى ءسىزدىڭ قىزمەتىڭىزگە جوعارى باعا بەردى. ءبىز 40 جىلدان استام ۋاقىتتان بەرى تانىسپىز. سودان بەرى، اسىرەسە ەل تاۋەلسىزدىگى قالىپتاسقان كۇردەلى جىلداردا ءاردايىم قولداۋىڭىزدى سەزىنىپ كەلەمىن، - دەدى نۇرسۇلتان نازاربايەۆ.
سونداي-اق، مەملەكەت باسشىسى ا. ءاشىموۆتىڭ شىعارماشىلىق قىزمەتى كەڭەستەر وداعى داۋىرىندە دە لايىقتى باعالانعانىن اتاپ ءوتتى.
- ءسىز ك س ر و- نىڭ، قازاقستاننىڭ حالىق ءارتىسى رەتىندە ەڭ جوعارى مەملەكەتتىك ناگرادالارمەن ماراپاتتالدىڭىز. كينو الەمىندەگى اسانالى ءاشىموۆتىڭ ەسىمىن كۇللى قازاقستان ماقتان تۇتادى. ءسىز قازاقستانداعى سان-سالالى شىعارماشىلىق ونەردىڭ ساڭلاعى اتاندىڭىز. سوندىقتان ەلگە كەرەك قادىرلى تۇلعا بولىپ وتىرسىز، - دەدى قازاقستان پرەزيدەنتى.
نۇرسۇلتان نازاربايەۆ ا. ءاشىموۆتىڭ تەاتر مەن كينوداعى قازىرگى تابىستى قىزمەتىن اتاپ ءوتىپ، جەكە ءوزىنىڭ جانە مەملەكەت اتىنان العىس ءبىلدىردى.
- مادەنيەت پەن ونەردى دامىتۋعا قوسقان ۇلەسىڭىزدى، ەلىمىزدىڭ الەۋمەتتىك-گۋمانيتارلىق دامۋى جولىنداعى وراسان زور جەتىستىكتەرىڭىزدى، بەلسەندى قوعامدىق قىزمەتىڭىزدى، سونداي-اق حالقىمىزدىڭ تىلەگىن ەسكەرىپ، مەن سىزگە قازاقستاننىڭ ەڭبەك ەرى اتاعىن بەرۋ جونىندە شەشىم قابىلدادىم. سوعان وراي «التىن جۇلدىز» ەرەكشەلىك بەلگىسىن تابىس ەتەمىن، - دەدى قازاقستان پرەزيدەنتى.
سونىمەن قاتار، ەلباسى مەملەكەتتىڭ مادەنيەت سالاسىن بەلسەندى تۇردە قولداپ كەلە جاتقانىنا جانە ءوزىنىڭ «بولاشاققا باعدار: رۋحاني جاڭعىرۋ» اتتى ماقالاسىنىڭ كەيبىر تۇستارىنا نازار اۋداردى.
- وسى جىلدار ىشىندە مەن قازاقستان مادەنيەتىن نازارىمنان تىس قالدىرعان ەمەسپىن. «مادەني مۇرا» باعدارلاماسى اياسىندا قازاقستاندا مادەنيەتتى قولداۋ باعىتىنداعى جان-جاقتى جۇمىس ۇدايى جۇرگىزىلىپ كەلەدى. «استانا وپەرا»، «قازاقستان» ورتالىق كونسەرت زالى» سياقتى نىساندار سالىنىپ، جاڭا شىعارماشىلىق ۇجىمدار قۇرىلدى، ەلىمىزدىڭ بارلىق وبلىستارىندا تەاترلار جۇمىسى جولعا قويىلدى. مەملەكەت تەك ەكونوميكامەن عانا اينالىسىپ، ونەرگە قولداۋ كورسەتپەسە، بار كۇش-جىگەرىمىز زايا كەتكەنمەن بىردەي. ءبىز قازاقستاننىڭ ونەرىن الەمگە تانىتۋ جانە ناسيحاتتاۋ ءۇشىن بارلىق جاعدايدى جاساپ وتىرمىز. كورنەكتى قايراتكەرلەرىمىزدى بۇكىل جۇرتقا تانىستىرىپ كەلەمىز، - دەدى قازاقستان پرەزيدەنتى.
ا. ءاشىموۆ مەملەكەت باسشىسىنىڭ ەل ءۇشىن اتقارىپ جۇرگەن قىزمەتىن قولدايتىنىن جانە ونى ماقتان تۇتاتىنىن اتاپ ءوتتى.
- ءبىز گاسترولمەن جانە كينو ءتۇسىرۋ ماقساتىمەن ءتۇرلى ەلدەرگە بارامىز. بارلىعى ءبىزدىڭ ەلدىڭ وزىڭىزدەي پرەزيدەنتى بار ەكەنىنە ءتانتى بولىپ، ەسىمىڭىزدى قۇرمەتپەن اتاپ جاتادى. بۇگىن يەلەنگەن اتاقتى اۆانس دەپ ەسەپتەيمىن. ءبىزدىڭ جۇمىسىمىز وزگەگە ۇلگى بولۋعا ءتيىس.
ءبىز ءسىزدىڭ «تەك العا!» دەگەن ۇستانىمىڭىزعا سۇيەنەمىز. ءسىز جۇرگىزىپ وتىرعان ساياساتتى تولىق ماقۇلدايمىز جانە قولداۋىڭىز ءۇشىن العىس ايتامىز، - دەدى ا. ءاشىموۆ.
نۇرسۇلتان نازاربايەۆ ءبىزدى جەتىستىكتەرگە جەتەلەگەن وسىناۋ جۇيرىك ۋاقىت ىشىندەگى ەڭ باستى تابىسىمىز - تاۋەلسىزدىككە قول جەتكىزگەنىمىز ەكەنىن اتاپ ءوتتى.
- جالپى، مەن زامانداستارىما ريزامىن. ولاردىڭ اراسىندا كوپتەگەن زيالى قاۋىم وكىلدەرى، عالىمدار مەن جازۋشىلار بار. ءبىز كوپ قيىندىقتاردى باستان وتكەردىك. الدىمىزدا حالىقتى باسقاشا ءومىر سۇرۋگە ۇيرەتۋ مىندەتى تۇردى. كوپشىلىگى ءبىزدى، ەلىمىزدى قولدادى. سولاردىڭ اراسىندا ءسىز الدىڭعى قاتاردا تۇرسىز، - دەدى مەملەكەت باسشىسى.
