اسەت يسەكەشەۆ استانا كوشەلەرىندەگى ەكوەنەرگيا نىساندارى جايلى ۆيدەو جاريالادى - كەسكىن

استانا. قازاقپارات - استانا اكىمى اسەت يسەكەشەۆ فەيسبۋكتەگى ءوز پاراقشاسىندا «جاسىل ەنەرگيا» - كۇن مەن جەلدىڭ كومەگىمەن تەلەفونداردىڭ قۋاتتالاتىندىعى تۇسىرىلگەن ۆيدەونى جاريالادى، دەپ حابارلايدى «قازاقپارات» ح ا ا ءتىلشىسى.

استاناداعى حالىقارالىق مامانداندىرىلعان كورمە - «جاسىل ەنەرگيا» تاقىرىبىنا ارنالعاندىقتان، ەلوردا كوشەلەرىندە كۇن پانەلدەرى مەن جەل گەنەراتورلارى ورناتىلۋدا. مىسالى، ۆيدەولاردىڭ بىرىندە - وقۋشىلار سارايىندا تاۋەلسىزدىك داڭعىلى مەن باۋىرجان مومىش ۇلى كوشەسىنىڭ قيىلىسىندا كۇن پانەلى ورناتىلعان جارتى كيىز ءۇي بەينەسىندەگى كۇركە، ساندىق بار، جەل گەنەراتورى دا وسىلاردىڭ قاتارىنان ورىن العان.

بۇل ماڭايدان ءوتىپ بارا جاتقان جانداردىڭ قاجەت بولسا، ۇيالى تەلەفوندارىن قۋاتتاندىرىپ الۋلارىنا بولادى. سونداي- اق ەكىنشى ءبىر ۆيدەودان پانەلدەر ورناتىلعان ورىندىقتاردى، ەلوردا اكىمدىگى الدىنداعى «Астана Віке» ۆەلوسيپەدتى جالعا بەرۋ بەكەتىندە دە كۇن ەنەرگياسىمەن جۇمىس ىستەيتىن قۇرىلعىلاردى كورۋگە بولادى.

«ەكسپو-2017» حالىقارالىق مامانداندىرىلعان كورمەسى 10 -ماۋسىم مەن 10-قىركۇيەك ارالىعىندا وتەدى. كورمەدە «جاسىل ەكونوميكا» توڭىرەگىندەگى يننوۆاتسيالاردى جانە عىلىمي جەتىستىكتەرمەن تانىسۋعا، سونداي-اق الەم حالىقتارىنىڭ مادەنيەتىمەن سۋسىنداۋعا، بولاشاق مۋزەيىن كورۋگە بولادى. وسى ارادا ايتا كەتەر جايت، استانادا جاڭعىرمالى ەنەرگيا كوزدەرىنىڭ 18 ءتۇرى پايدا بولماق.

اۆتور: ەرلان قوجاكەلديەۆ