16:22, 17 - مامىر 2017 | GMT +5
نۇرسۇلتان نازاربايەۆ سەناتور نۇرتاي ابىقايەۆتى قابىلدادى
استانا. قازاقپارات - ەلباسى پارلامەنت سەناتىنىڭ دەپۋتاتى، حالىقارالىق قاتىناستار، قورعانىس جانە قاۋىپسىزدىك كوميتەتىنىڭ مۇشەسى نۇرتاي ابىقايەۆتى قابىلدادى، دەپ حابارلايدى اقوردانىڭ باسپا ءسوز قىزمەتى.
مەملەكەت باسشىسى كەزدەسۋدە ساياسي جانە ەكونوميكالىق رەفورمالاردى ىسكە اسىرۋ، سونداي-اق قوعامدىق سانانى جاڭعىرتۋ پروتسەسىندە ەل پارلامەنتىنىڭ ماڭىزدى ءرول اتقاراتىنىن اتاپ ءوتتى.
«ءبىز دامۋ باعدارلامالارىن قابىلدادىق. مەنىڭ قازاقستان حالقىنا جولداۋىمدى جانە ەكونوميكالىق رەفورمالار مەن قوعامنىڭ رۋحاني جاڭعىرۋىن ىسكە اسىرۋ ءۇشىن زاڭنامالىق بازا قاجەت. وسى جۇمىسقا بەلسەندى تۇردە اتسالىسۋعا ءسىزدىڭ تاجىريبەڭىز بەن ءبىلىمىڭىز جەتكىلىكتى دەپ سەنەمىن»، - دەدى نۇرسۇلتان نازاربايەۆ.
ن. ابىقايەۆ قازاقستان پرەزيدەنتىنە ەلىمىزدە جۇرگىزىلىپ جاتقان رەفورمالاردى زاڭنامالىق تۇرعىدان قامتاماسىز ەتۋ ءۇشىن پارلامەنت دەپۋتاتتارى الدىنا قويىلعان مىندەتتەردىڭ ورىندالۋ بارىسى تۋرالى باياندادى.
