تۇرىككە كۇيەۋگە شىققان استانالىق بويجەتكەن وڭباي الدانىپ قالعان

استانا. قازاقپارات - تۇرىك ازاماتىنا كۇيەۋگە شىعىپ، وڭباي الدانعان بويجەتكەن بار سىرىن قازاق راديوسىنداعى «اق وتاۋ» باعدارلاماسىنا اقتاردى دەپ حابارلايدى.

 ءوزىن اسەم اسحات قىزى دەپ تانىستىرعان كەيىپكەر، جەتى جىل بۇرىن قۇرىلىس كومپانياسىن دا جۇمىس ىستەپ ءجۇرىپ، ءوزىنىڭ تۇرىك باسشىسىنا تۇرمىسقا شىققان.

«جۇبايىم مەنىڭ تىكەلەي باسشىم ەدى. ول ماعان ءبىرىنشى بولىپ ءسوز سالدى. مەن باسىندا قورقاقتادىم. ءوزىن اجىراسىپ كەتكەنمىن. ساعان عاشىقپىن دەپ سەندىردى. سوسىن بارلىعى ماحابباتقا ۇلاستى. ۇيلەنەيىك دەپ ۇسىنىس جاساعان سوڭ اكە- شەشەممەن تانىستىرىپ، شاعىن توي جاساپ، زاڭدى تۇردە نەكە قيدىردىق. نەكە قيۋ راسىمىنە تۇركيادان ونىڭ ەكى اپكەسى مەن ءبىر اعاسى كەلدى. ءبىز جاقتان مەنىڭ ەڭ جاقىن تۋىستارىم قاتىستى» ، - دەدى ول.

اسەل تۇرىك كۇيەۋىنەن جۇكتى بولىپ، ءبىر جىلدان سوڭ ۇلدارى ومىرگە كەلىپتى.

«كۇيەۋىم تۇركياعا جىلىنا ەكى- ءۇش رەت قانا باراتىن. وندا دا ءىس ساپارمەن دەپ ءتۇسىندىردى. كەيدە ۇيالى تەلەفونىنا تۇرىكشە سويلەپ ايەلدەر حابارلاساتىن. ونى دا ماعان «جۇمىس بابىمەن تۇركياداعى سەرىكتەستەرىم حابارلاستى» دەيتىن. وسى سوزىنە سەنىپ جۇرە بەرىپپىن. ءۇش جىلدان سوڭ كۇيەۋىم تۇركياعا جۇمىسپەن كەتىپ، ورالمادى. العاشقى ءۇش- ءتورت اي تەلەفون ارقىلى حابارلاسىپ تۇردى. سوسىن مۇلدەم جوق بولدى. اعا، اپكەلەرىنە حابارلاسسام، ۇيالى تەلەفوندارى ءسوندىرۋلى. جولداستارىنان ءبىلدىم، كۇيەۋىم تۇركياداعى وتباسىسىنا ورالىپتى. ماعان اجىراسىپ كەتتىم دەگەنى وتىرىك ەكەن» ، - دەدى اسەم اسحات قىزى.

27 جاستاعى استانالىق انا قازىر ۇلىن جالعىز تاربيەلەپ وتىر. قازاق قىزدارىنا شەتەلدىك جىگىتتەرمەن بايلانىس قۇرعاندا اباي بولىپ، وت باسىپ قالماڭدار دەپ كەڭەس بەرەدى.

ال پسيحولوگتار بولسا، قىزداردىڭ شەتەلدىك جىگىتتەرمەن وتباسى قۇرۋىنا قازاق ازاماتتارىنىڭ دا كىناسى بار دەپ وتىر.

«تۇرىك، يتاليالىق جىگىتتەر قازاق ازاماتتارىنا قاراعاندا قىزداردى كوڭىلىڭ جاقسى تابادى. كوبىسى رومانتيك. كەزدەسۋگە گۇل كوتەرىپ كەلۋ، ەرەكشە توسىن سىي ۇيىمداستىرۋ سىندى ءادىس- تاسىلدەرى كوپ. ال قازاق جىگىتتەرى ونداي رومانتيكاعا بارا بەرمەيدى. مەنتاليتەت قوي. ايەلدەر وسى قاسيەتتى ەرەكشە باعالاپ، «وي شەتەلدىك ازامات كەرەمەت ەكەن، وتە مادەنيەتتى» دەپ ەتەگىنەن ۇستاپ جاتادى. ونىڭ بارلىعى شىنايى ەمەس. كوزبوياۋشىلىق بولۋى دا مۇمكىن. تالاي ەستىپ ءجۇرمىز. شەتەل اسىپ كەتكەن قىزدارىمىزدىڭ، ەلگە جىلاپ ورالعانىن» ، - دەيدى وتباسىلىق پسيحولوگ دانا ىزگىلىكوۆا.

NUR. KZ