بەكبولات تىلەۋحان تامارا دۇيسەنوۆاعا ءتانتى ەكەنىن ايتتى

استانا. قازاقپارات - دەپۋتات بەكبولات تىلەۋحان ماجىلىستە زاڭ جوباسى بويىنشا بايانداما جاساعان ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆاعا سۇراق قويا وتىرىپ، ونىڭ ءوز ءىسىن جاقسى ءبىلىپ، كەز كەلگەن سۇراققا ەكى تىلدە دە ەركىن جاۋاپ بەرەتىنىنە ءتانتى ەكەنىن ايتىپ قالدى.

بۇل تۋرالى Sputnik قازاقستان حابارلايدى.

تامارا دۇيسەنوۆا بۇگىن ءماجىلىس وتىرىسىندا كەيبىر زاڭنامالىق اكتىلەرگە الەۋمەتتىك قامسىزداندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسى بويىنشا بايانداما جاسادى. مينيستر ادەتتەگىدەي دەپۋتاتتاردىڭ ەكى تىلدە قويعان سۇراقتارىنا ەركىن جانە تولىق جاۋاپ بەرۋگە تىرىستى.

«ءىسىڭىزدى جاقسى ءبىلىپ، ەكى تىلدە بىردەي جوسىلىپ سويلەپ تۇرعاننان كەيىن ءسىزدى سويلەتە بەرگىمىز كەلەدى»، - دەگەن دەپۋتات بەكبولات تىلەۋحان مينيسترگە ءوندىرىستىڭ زياندى ەڭبەك جاعدايلارىندا جۇمىس ىستەيتىن ادامداردى زەينەتاقىمەن قامسىزداندىرۋعا قاتىستى ءوز سۇراعىن قويدى.

«ءوندىرىستىڭ زياندى ەڭبەك جاعدايلارىندا جۇمىس ىستەيتىن ادامداردى زەينەتاقىمەن قامسىزداندىرۋ ماقساتىندا 2014 -جىلدان باستاپ ەنگىزگەن مىندەتتى كاسىپتىك زەينەتاقى جارنالارىنا قاتىستى تاجىريبەمىز بار عوي. وسى پروتسەستىڭ ناتيجەلەرىنە اناليز جاسادىڭىزدار ما جانە ونىڭ جۇمىسكەرلەر ءۇشىن تيىمدىلىگى مەن جۇمىس بەرۋشىلەر ءۇشىن جۇكتەمەسى قانداي؟ كاسىپورىندار ءۇشىن قانداي ەكونوميكالىق سالدارى نەندەي؟»، - دەدى ول.

دۇيسەنوۆانىڭ ايتۋىنشا، بۇگىنگى تاڭدا بەس پايىزدىق قوسىمشا زەينەتاقى جارناسىن 400 مىڭنان استام ازامات الىپ وتىر. ەكى جىلدىڭ ىشىندە ولاردىڭ شوتىنا 100 ميلليارد تەڭگە تۇسكەن.

«زاڭداعى ەڭ نەگىزگى ماسەلەگە توقتالسام، زياندى جاعدايدا جۇمىس ىستەيتىن ازاماتتار ەگەر ءوزىنىڭ ون پايىز جانە جۇمىس بەرۋشىنىڭ بەس پايىزدىق جارناسى جەتكىلىكتى بولسا، ەلۋ جاسىندا زەينەتكە شىعا الادى. ەكى جىلدىڭ ىشىندە وسى جارنانى قوسىمشا العان 640 ادام ەلۋ جاسىندا زەينەتكە شىقتى. تاعى دا مىڭ ادام 2019 -جىلى ەلۋ جاسىندا زەينەتكە شىعۋعا مۇمكىندىك الدى»، - دەدى دۇيسەنوۆا.

مينيستر بۇل باستاماعا جۇمىس بەرۋشىلەر دە تۇسىنىستىك تانىتقانىن اتاپ ءوتتى. "جارنانى ەنگىزگەندە جۇمىس بەرۋشىلەر ەڭبەكاقىنى تومەندەتە مە دەگەن كۇمان بولدى. تاۋ- كەن وندىرىسىندە جۇمىس ىستەيتىن ازاماتتاردىڭ ەڭبەكاقىسىن قاراساق، 2014 -جىلى 250 مىڭ تەڭگە بولسا، قازىر 350 مىڭ تەڭگە كولەمىندە. ياعني، ەڭبەكاقىنى جۇمىس بەرۋشىلەر تومەندەتكەن جوق. ەكىنشىدەن، جۇمىس بەرۋشىلەر تابىس سالىعىنان شەگەرىلەدى. ۇلكەن جۇكتەمە جوق.

15 جۇمىس بەرۋشى قازىر تاعى دا 29 ماماندىق بويىنشا قوسىمشا جارنا تولەۋ بويىنشا ۇسىنىس جىبەرىپ وتىر. جالپى، جۇمىس بەرۋشىلەر تاراپىنان دا، جۇمىسشىلار تاراپىنان دا قازىرگى تاڭدا ۇلكەن پروبلەمالار جوق»، - دەپ ءتۇيدى ءسوزىن مينيستر.