08:38, 17 - مامىر 2017 | GMT +5
سىر بالىعى استاناعا جول تارتتى
قىزىلوردا. قازاقپارات - ەكسپو-2017 كورمەسىنە قاتىسۋشىلاردى ازىق- تۇلىكپەن قامتاماسىز ەتۋ ماقساتىندا استانا قالاسى مەن قىزىلوردا وبلىسى اكىمدىگى اراسىنداعى ارنايى ازىرلەنگەن كەستەگە ساي ايتەكە ءبي كەنتىنەن بالىق ونىمدەرى ەلورداعا جونەلتىلدى، دەپ حابارلادى قازاقپارات ح ا ا ءتىلشىسى قازالى اۋداندىق اكىمدىگىنە سىلتەمە جاساپ.
كورمەگە قاتىسۋشىلاردى ازىق- تۇلىكپەن قامتاماسىز ەتۋ ماقساتىندا قىزىلوردا وبلىسىنان 6847 توننا كۇرىش، 596 توننا بالىق جانە بالىق ونىمدەرى، 215 توننا باقشا ونىمدەرىن جونەلتۋ جوسپارلانعان.
استانا قالاسىنا جەتكىزىلگەن بالىق ونىمدەرىن ساقتاپ، ساتۋعا «الاي» ساۋدا ورتالىعى بەلگىلەنىپ، مۇزداتقىشتارمەن، توڭازىتقىشتارمەن جانە ساتۋ الاڭدارىمەن قامتاماسىز ەتۋ جونىندە مەموراندۋمعا قول قويىلعان. وسىعان سايكەس « قىزىلوردا سپك بالىق» ج ش س ازىرلەگەن 3 توننا كوكسەركە فارشى، «ار- م- كون» ج ش س ماماندارى دايىنداعان 637 كەلى اقتابان، 552 كەلى موڭكە، 212 كەلى سازان، جەكە كاسىپكەر «ت. يگىلىكوۆتەن» 1309 كەلى سازان، 784 كەلى شورتان جانە 91 كەلى بالىقتىڭ ءتوسى رەفريجەراتورلارمەن جابدىقتالعان «DAF» اۆتوكولىگىنە تيەلىپ، ارقا توسىنە جول تارتتى.
اۆتور: ەلۋباي اۋەزوۆ
