قازاقتىڭ «ەكسپو- كەرۋەنى» بەرلينگە ايالدادى

بەرلين. قازاقپارات - سەيسەنبى كۇنى بەرليندە «ەكسپو- كەرۋەن» ينتەراكتيۆتى موبيلدى پاۆيلونىنىڭ اشىلۋ سالتاناتى ءوتتى، دەپ حابارلايدى «قازاقپارات» ح ا ا مەنشىكتى ءتىلشىسى. گەرمانيا استاناسىنداعى روۋد- شوۋدى «استانا ەكسپو-2017» ۇلتتىق كومپانياسى قازاقستاننىڭ گەرمانياداعى ەلشىلىگىمەن بىرلەسىپ ۇيىمداستىردى.

سالتاناتتى راسىمگە گ ف ر س ءى م، ەكونوميكا جانە ەنەرگەتيكا فەدەرالدى مينيسترلىگى وكىلدەرى، ەكسپو-2017 گەرمانيالىق سەكسياسى، كازاقستان- گەرمانيا قوعامى، گ ف ر- دەگى قازاقستان ستۋدەنتتەرى جانە باسقالار قاتىستى. گەرمانياداعى قازاقستان ەلشىسى بولات ءنۇسىپوۆ نەمىس اۋديتورياسىن ق ر- داعى الەۋمەتتىك- ەكونوميكالىق جانە ساياسي رەفورمالارمەن تانىستىردى.

سونداي-اق ەكى ەلدىڭ استانادا وتەتىن «ەكسپو-2017» كورمەسىنە دايىندىق اياسىنداعى تابىستى ىنتىماقتاستىعىن اتاپ ءوتتى. نەمىستەر تاراپى ءوز كەزەگىندە قازاقستاننىڭ گەرمانيا ءۇشىن ايماقتاعى ساياسي جانە ساۋدا- ەكونوميكالىق ستراتەگيالىق ارىپتەس رەتىندە ماڭىزدى ەل ەكەندىگىن اتاپ ءوتتى. «استانادا الدا بولاتىن «بولاشاق ەنەرگياسى» كورمەسى نەمىس كاسىپكەرلەرى تاراپىنان ۇلكەن قىزىعۋشىلىق تۋدىرىپ وتىر»، - دەدى گەرمانيا ەكونوميكاسى شىعىس كوميتەتىنىڭ وڭىرلىك ديرەكتورى ەدۋارد كينسبرۋنەر.

سونداي- اق ول گ ف ر-دىڭ «ەكسپو-2017» حالىقارالىق كورمەسىندە ءىرى پاۆيلونمەن جانە اسا اۋقىمدى باعدارلامامەن قاتىساتىندىعىن اتاپ ءوتتى. مۇنىڭ ەكىجاقتى ساۋدا- ەكونوميكالىق بايلانىسقا قوسىمشا سەرپىن بەرەتىندىگىن جەتكىزدى.

«بارشا ادامزات ءۇشىن ماڭىزدى جانە وزەكتى تاقىرىپ ەكەندىگىن ەسكەرە كەلە، الداعى «ەكسپو-2017» كورمەسى ارقىلى قازاقستان XXI عاسىرداعى باستى پروبلەمالاردىڭ ءبىرىنىڭ شەشىمىن تابۋىنا ءوز ۇلەسىن قوسادى»، - دەپ اتاپ ءوتتى گەرمان بۋندەستاگىنىڭ تۋريزم كوميتەتىنىڭ جەتەكشىسى يۋرگەن كليمكە.

اتاپ وتكەن ءجون، «ەكسپو- كەرۋەن» نەمىس جۇرتشىلىعىنىڭ ۇلكەن قىزىعۋشىلىعىن تۋعىزدى. رەسمي قوناقتاردان باسقا ينتەراكتيۆتى ستەندتى كورۋگە بەرلين تۇرعىندارى مەن قوناقتارى نەمىستىڭ ىسكەر توپتارىنىڭ جانە قوعامدىق ۇيىمدارىنىڭ وكىلدەرى، جەرگىلىكتى ب ا ق جۋرناليستەرى كەلدى.

ينتەراكتيۆتى پاۆيلون نەمىس استاناسىنىڭ ورتالىعىندا، فەدەرالدى كانتسلەر جانە رەيحستاگ عيماراتىنا جاقىن جەردەگى Washington-Platz الاڭىنا ورنالاسادى.

ايتا كەتەر جايت، ەكسپو-2017-گە بارۋعا نيەت ەتكەن جاندارعا ونلاين- رەجىمدە كورمەگە بيلەت الۋعا مۇمكىندىك جاسالدى. «ەكسپو- كەرۋەن» قازىردىڭ وزىندە ونشاقتى ەۋروپالىق قالالاردا بولدى. ال بەرليندە جىلجىمالى پاۆيلون بەيسەنبىگە دەيىن جۇمىس ىستەيدى. ودان ءارى ۆارشاۆا، ۆيلنيۋسكە باعىت الادى. ەۋروپاداعى سوڭعى ايالدايتىن قالا - فين استاناسى حەلسينكي بولماق.