باس ءمۇفتي رامازان ايىنا بايلانىستى قازاقستان حالقىنا ۇندەۋ جاسادى
«بارشامىزدى قاسيەتتى رامازان ايىنا امان- ەسەن جەتكىزگەن اللا تاعالاعا سانسىز شۇكىرلەر بولسىن. سىزدەردى كۇللى مۇسىلمان قاۋىمى اسىعا كۇتكەن مۇباراك رامازان ايىنىڭ كەلۋىمەن قۇتتىقتايمىن!»، - دەيدى قازاقستان مۇسىلماندارى ءدىني باسقارماسىنىڭ ءتوراعاسى. باس ءمۇفتي اقتوبە، اقمولا، سولتۇستىك قازاقستان وبلىستارىنداعى سۋ اپاتىنا بايلانىستى كاسىپكەرلەردى ق م د ب- نىڭ قايىرىمدىلىق اكسياسىنا قولداۋ كورسەتۋگە شاقىردى.
«قازاقستان مۇسىلماندارى ءدىني باسقارماسى دا جاناشىر جاماعاتتىڭ دەمەۋشىلىگىمەن «قايىرىمدىلىق كەرۋەنى» اكسياسى اياسىندا كيىم-كەشەك، ازىق-تۇلىك، تۇرمىسقا قاجەتتى بۇيىمدار جەتكىزدى. كاسىپكەر ازاماتتاردى وسى باعىتتاعى قايىرىمدىلىق جۇمىستارعا بەلسەنە اتسالىسۋعا شاقىرامىن»، - دەيدى ەرجان مالعاجى ۇلى.
سونىمەن قاتار، باس ءمۇفتي كاسىپكەرلەردى باسقا دا كومەك جاساۋعا شاقىردى. «قادىرلى باۋىرلار! اسىل ءدىنىمىز يسلامدا «ساداقا جاريا» دەگەن قاسيەتتى ۇعىم بار. قوعامنىڭ، حالىقتىڭ يگىلىگى ءۇشىن جاسالعان ساۋاپتى ىستەردى، اتاپ ايتقاندا، مەشىت- مەدرەسە، اۋرۋحانا، بالاباقشا، سپورت كەشەندەرىن تۇرعىزۋ، كوشە، كوپىر سالۋ، اۋىزسۋى جوق اۋىلدارعا سۋ تارتىپ، قۇدىق قازدىرتۋ، تاعى باسقا يگى امالداردى «ساداقا جاريا» دەپ اتايمىز. قازاقستان مۇسىلماندارى ءدىني باسقارماسى وبلىستاردا «قايىرىمدىلىق مەكەمەسىن» اشىپ، جەرگىلىكتى جاس بۋىنعا ءدىني ءھام زايىرلى ءبىلىم بەرىپ، يماندىلىققا تاربيەلەۋمەن قاتار تۇرمىسى تومەن وتباسىلارىنا الەۋمەتتىك كومەك كورسەتۋدە. مەسەناتتار مەن كاسىپكەر ازاماتتاردى جالپى جۇرشىلىققا قاجەتتى نىسانداردى تۇرعىزۋ جۇمىسىنا بەلسەنە ارالاسىپ، جاناشىرلىق تانىتۋعا شاقىرامىن. جۋىردا ەلباسىمىز نۇرسۇلتان نازاربايەۆ ەلىمىزدەگى باي- داۋلەتتى ازاماتتاردى جاعدايى تومەن تۇرعىندارعا كومەك كورسەتۋگە ۇندەدى. مەملەكەت باسشىسىنىڭ بۇل باستاماسىنا ءۇن قوسۋ بارشامىزدىڭ ازاماتتىق بورىشىمىزعا اينالۋى قاجەت دەپ ەسەپتەيمىن»، - دەيدى ول.
ەرجان مالعاجى ۇلى مۇنداي ىستەردىڭ ساۋابى جايىندا مىسال كەلتىرە كەتتى. «رامازان - قايىرىمدى جاندار ءۇشىن مول مۇمكىندىكتەر ماۋسىمى. ورازادا جاسالعان ءاربىر قايىرلى ءىس - ۇلكەن ساۋاپ. بىردە پايعامبارىمىز مۇحاممەدتەن (وعان اللانىڭ سالاۋاتى مەن سالەمى بولسىن) ءبىر كىسى: «ۋا، اللانىڭ ەلشىسى، ەڭ جاقسى ادام كىم؟» - دەپ سۇراعاندا، ول: «ەڭ جاقسى ادام - قوعامعا، ەلگە پايداسى تيگەن پەندە»، - دەپ جاۋاپ بەرگەن ەكەن»، - دەپ كەلتىردى باس ءمۇفتي.
سونىمەن بىرگە، باس ءمۇفتي قوعامىمىزدا كورىنىس الىپ جاتقان كىسى اقىسىن جەۋ، بالانى اياۋسىز ۇرۋ، پەدوفيليزم، نارەستەنى دالاعا تاستاۋ، ءوز- وزىنە قول جۇمساۋ، اجىراسۋ، كەيبىر ازاماتتار اراسىنداعى قاتىگەزدىك جاعدايلار، اراق- شاراپقا تاۋەلدىلىك، وتباسىنداعى كەلىسپەۋشىلىك، تەررورلىق وقيعالاردان اۋلاق بلۋعا شاقىردى. ءسوز سوڭىندا ەرجان مالعاجى ۇلى رامازان ايىنىڭ ارتىقشىلىقتارىن ايتىپ، باتا بەردى. «رامازان - مول ساۋاپ جينايتىن قاسيەتتى اي. ادام بالاسى ىزگى امالى ارقىلى جاراتۋشىنىڭ راقىمىنا، نىعمەتىنە كەنەلەدى. زەكەت بەرۋ - جاعدايى كەلگەن (شاريعات بويىنشا نيساپ مولشەرىنە جەتكەن) مۇسىلمانعا پارىز. ال زەكەت بەرەكەلى رامازان ايىندا بەرىلسە، ونىڭ دا ساۋابى ەسەلەنىپ جازىلادى. وسىناۋ جاقسى امالدار رامازاننان كەيىنگى ايلاردا دا جالعاسىن تاپسا نۇر ۇستىنە نۇر. ون ەكى ايدىڭ سۇلتانى بولعان قاسيەتتى رامازاندا جاساعان امالدارىمىز بەن ىزگى نيەتتەرىمىزدى اللا تاعالا قابىل ەتكەي! ەلىمىز امان، جۇرتىمىز تىنىش، تاۋەلسىز ەلىمىزدىڭ بولاشاعى جارقىن، ءاربىر يگى باستامالارىمىز باياندى بولعاي! ءاۋمين!». - دەپ اياقتادى ول.
دەرەككوز: Tengrinews.kz
