الەم قازاقتارىنىڭ بەسىنشى قۇرىلتايىنا دايىندىق قالاي؟

استانا. قازاقپارات - بيىل ەلوردامىز - استانا قالاسىندا الەم قازاقتارىنىڭ بەسىنشى قۇرىلتايى وتەدى. وسىنىڭ قارساڭىندا دۇنيەءجۇزى قازاقتارى قاۋىمداستىعى ءتوراعاسىنىڭ ءبىرىنشى ورىنباسارى تالعات ماماشيەۆپەن سۇحباتتاسىپ، كوكەيدەگى ساۋالدارعا جاۋاپ العان ەدىك.

- تالعات اسىل ۇلى، استانادا وتەتىن دۇنيەءجۇزى قازاقتارى قاۋىمداستىعىنىڭ V قۇرىلتايىندا قانداي ماسەلەلەر كوتەرىلمەك؟ بۇل قۇرىلتايدىڭ بۇعان دەيىنگى قۇرىلتايدان ەرەكشەلىگى، وزگەشەلىگى بار ما؟

- ۇلتىمىزدىڭ باستى جيىنى سانالاتىن دۇنيەءجۇزى قازاقتارىنىڭ V قۇرىلتايىن بيىل وتكىزبەكشىمىز. جاقىندا پرەزيدەنتتىڭ كەلىسىمىمەن ۇكىمەتتىڭ قاۋلىسى قابىلداندى. دۇنيەءجۇزى قازاقتارىنىڭ بەسىنشى قۇرىلتايى استانا قالاسىندا 22-25 - ماۋسىم ارالىعىندا وتەتىن بولدى. ۇيىمداستىرۋ كوميتەتى قۇرىلىپ، ءىس- شارا جوسپارى بەكىتىلدى. ءتوراعا - ق ر پرەمەر- ءمينيسترىنىڭ ءبىرىنشى ورىنباسارى اسقار ۇزاقباي ۇلى مامين. ۇيىمداستىرۋ كوميتەتىنە بارلىق مينيسترلىكتەر ەندى.

بيىلعى قۇرىلتايدىڭ ەرەكشەلىگىن سۇراپ وتىرسىڭ عوي، قۇرىلتايدىڭ نەگىزگى تاقىرىبى - «قازاقستاننىڭ رۋحاني جاڭعىرۋى جانە شەتەلدەگى قازاقتار». ەلباسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» اتتى ماقالاسىندا كوتەرىلگەن ماسەلەلەر تەك ەلىمىزدەگى قازاقتارعا عانا ەمەس، شەتەلدەگى اعايىندارعا دا قاتىستى.

بەسىنشى قۇرىلتايدىڭ باعدارلاماسىنا قىسقاشا توقتالا كەتەيىن. قۇرىلتايدىڭ ءبىرىنشى كۇنى كەلگەن قوناقتارعا استانانىڭ كورىكتى جەرلەرىن، ماسەلەن، ۇلتتىق مۋزەي، ازىرەت سۇلتان مەشىتى، پرەزيدەنتتىڭ كىتاپحاناسى، ت. ب. ارالاتىپ، تانىستىرامىز. ەكسپو اياسىندا ۇلكەن كەشەن - ەتنواۋىل جۇمىس جاسايدى. وندا جەكە ىسمەرلەر اۋىلى بولادى. سونداي- اق بىرنەشە سپورتتىق، كونسەرتتىك الاڭدار بار. سالت- ءداستۇر، ۇلتتىق قۇندىلىقتارىمىز، مادەنيەتىمىز، تاريحىمىز... تەرەڭىرەك ۇڭىلگەن ادام ءبارىن سول جەردەن تابادى. استانا وپەرادا كلاسسيكالىق تۋىندىمىز «قىز جىبەك» جاڭا نۇسقادا قويىلادى.

ەكىنشى كۇنى نازاربايەۆ ۋنيۆەرسيتەتىندە نەگىزگى پلەنارلىق وتىرىس وتەدى. كۇننىڭ ەكىنشى جارتىسىندا ەكسپو- نى ارالايدى. سول كۇنى شەتەلدەن كەلگەن اعايىندار پرەزيدەنتتىڭ قابىلداۋىندا بولادى.

ءۇشىنشى كۇنى قۇرىلتاي دەلەگاتتارى رۋحاني، ءدىن ىستەرى، ءبىلىم، كوشى- قون، بيزنەس ماسەلەلەرى بويىنشا ءتورت سەكسياعا ءبولىنىپ، جۇمىس جۇرگىزەدى. اعايىنداردى الاڭداتىپ وتىرعان ماسەلەلەر كوپ. ماسەلەن، قازىر شەكارا جابىلدى، مالدى ايداپ وتكىزە المايدى، كارانتين دەيدى، ت. ب. سىلتاۋ كوپ. قۇدايعا شۇكىر، جاعدايى جاقسى اعايىندار بار. ولار قازاقستانعا مالىن ايداپ كوشكىسى كەلەدى. مىنە، بۇل ۇلكەن پروبلەما. سونداي- اق ءبىلىم سالاسىن الايىق. ەلگە كەلىپ، ءبىلىمىن جەتىلدىرىپ، ماگيستراتۋرا، دوكتورانتۋرا وقىسىن. ج و و- عا تۇسۋگە ەكى پايىزدىق كۆوتا بار، دەگەنمەن، دايىندىق بولىمىندە وقىعان 1500 بالانىڭ ءبارى دەرلىك وقۋعا ءتۇسىپ كەتۋى مۇمكىن ەمەس. اركىمنىڭ ءوز دەڭگەيى بار. سوندىقتان بيىلدان باستاپ كاسىپتىك- تەحنيكالىق ۋچيليشەلەرگە، كوللەدجدەرگە وقىتۋعا كوبىرەك كوڭىل ءبولىپ جاتىرمىز. بۇرعىشى، قۇرىلىسشى، جول سالۋشى بولا ما، ءوزىنىڭ قالاۋىمەن ءبىر ماماندىق السا، ارى قاراي كاسىبىن اشىپ، جۇمىسىن ىستەپ، اقىرىنداپ ءىنىسىن، قارىنداسىن جانىنا الىپ، تامىرىن جايىپ كەتەر مە ەدى دەگەن نيەت. بۇل دا جاستاردى ەلگە تارتۋدىڭ ءبىر جولى دەپ ەسەپتەيمىز. وسىنداي وزەكتى جايتتاردى سەكسيادا تالقىلاپ، اقىلداسامىز. سەكسيا جۇمىسىنا بارلىق مينيسترلىكتىڭ وكىلدەرى قاتىسادى.

قۇرىلتايدىڭ تاعى ءبىر ەرەكشەلىگى - كەلەتىن دەلەگاتتاردىڭ 80 پايىزدان استامى جاستار. ءار ەلدەگى جاستار ۇيىمدارىنىڭ كوشباسشىلارىن ارنايى شاقىرىپ وتىرمىز. ولاردىڭ اراسىندا قىتايداعى قازاق جاستارىنىڭ كوشباسشىسى، موڭعولياداعى قازاق جاستارى اليانسىنىڭ ءتوراعاسى دەگەن سياقتى لاۋازىمدى ازاماتتار كەزدەسەدى. بۇعان قوسا شەتەلدەردە «بولاشاق» باعدارلاماسىمەن وقىپ جۇرگەن ءوزىمىزدىڭ جاستارىمىز بار.

ءبىر جىلى سانكت- پەتەربۋرگكە بارعانىمدا بىلگەنىم، وندا ءۇش مىڭعا جۋىق قازاق جاستارى ءبىلىم الۋدا. ونىڭ 700- ءى عانا مەملەكەتتىڭ قارجىسىمەن گرانتتا وقىسا، قالعاندارى اتا- اناسىنىڭ قارجىسىمەن، باسقا دا كەلىسىمشارت ارقىلى ءبىلىم ىزدەپ بارعاندار. سونداي- اق قىتايدا بەس مىڭنان استام ستۋدەنت وقيدى. مەنىڭ بىلۋىمشە، قىتايداعى قازاق ستۋدەنتتەرى ءبىر- بىرىمىزبەن ارالاسىپ جۇرەيىك، ەلدى ۇمىتپايىق دەپ ەكى رەت وزدەرىنىڭ قۇرىلتايىن وتكىزدى.

جاقىندا «نۇر وتان» پارتياسى ءتوراعاسىنىڭ ءبىرىنشى ورىنباسارى مۇحتار قۇل- مۇحاممەدپەن كەزدەستىم. «نۇر وتان» پارتياسىنىڭ «جاس وتان» جاستار قاناتى بار. م. قۇل- مۇحاممەدكە راقمەت، قولداپ، تاپسىرما بەردى. وسى جاستاردىڭ بارلىعىنىڭ باسىن قوسىپ، ءبىز «الەمدەگى قازاق جاستارى كوشباسشىلارىنىڭ فورۋمى» دەگەندى قولعا الماقشىمىز. دۇنيەءجۇزى قازاقتارى قاۋىمداستىعىنىڭ قۇرىلتايى بەس جىلدا ءبىر رەت وتەدى. ال «الەمدەگى قازاق جاستارى كوشباسشىلارىنىڭ فورۋمىن» ەكى- ءۇش جىلدا ءبىر وتكىزىپ، ونى ءبىر جۇيەگە تۇسىرسەك دەگەن ويىمىز بار. قۇرىلتايدىڭ نەگىزگى جاڭالىقتارىنىڭ ءبىرى وسى.

بيىل حاليفا التايدىڭ 100 جىلدىعى. وسىعان بايلانىستى ول كىسىنىڭ ەڭبەكتەرىن شىعارىپ جاتىرمىز. ول كىتاپتار قۇرىلتاي قوناقتارىنا تاپسىرىلادى. «حاليفا التاي جانە قايتا ورالعان تاريح» اتتى عىلىمي- پراكتيكالىق كونفەرەنسيا وتەدى، كورمە ۇيىمداستىرىلادى.

- شەتەلدەگى قازاقتارعا قاتىستى شەشىلۋى ءتيىس قانداي ماسەلەلەر بار؟

- دۇنيەءجۇزى قازاقتارى قاۋىمداستىعى قۇرىلعاننان بەرى جيىرما بەس جىلدىڭ ىشىندە شەتتەگى اعايىن مەن قازاقستاننىڭ اراسىن جالعايتىن التىن كوپىرگە اينالدى. قاۋىمداستىق شەتەل قازاقتارىنىڭ مادەني- رۋحاني، وقۋ- ءبىلىم، انا ءتىلى، ەكونوميكالىق جاعدايى، دەموگرافيالىق ءوسىپ- ءونۋى جونىندەگى بۇكىل مالىمەتتەردى ءبىر ورتاعا جيناقتاپ، جۇيەگە ءتۇسىرىپ وتىرادى. الىستاعى اعايىننىڭ ۇلتتىق- رۋحاني جانە كوشى- قون جونىندەگى مۇڭ- مۇقتاجدارىن، ءوتىنىش- تىلەكتەرىن قازاقستان ۇكىمەتىنە، باسقا دا ءتيىستى ورىندارعا جەتكىزىپ، ولاردىڭ شەشىلۋىنە شاما كەلگەنىنشە ىقپال جاسايدى. سوندىقتان دا سىرتتاعى قانداستارىمىز دۇنيەءجۇزى قازاقتارى قاۋىمداستىعىن وزدەرىنىڭ قارا شاڭىراعى سانايدى. قولداۋ كۇتىپ كەلگەن اعايىنعا باعىت- باعدار بەرىلەدى.

ال ەندى نەگىزگى سۇراعىڭا كوشسەك، شەشىمىن تاۋىپ جاتقان ماسەلەلەر دە، شەشىمىن تابۋى ءتيىس ماسەلەلەر دە جەتەرلىك. قاي- قايسىسى بولسىن، وسىنىڭ ءتۇبى ءبىر جاقسىلىق اكەلەتىن شىعار دەگەن ۇمىتپەن جۇمىس جاساپ جاتىرمىز. ماسەلەن، رەسەيدە، قىتايدا، ەۋروپادا، ت. ب. ەلدەردە قازاق مادەني ورتالىقتارى جۇمىس ىستەيدى، ءبىراق عيماراتتارى جوق. پاريجدە رەسەيدىڭ مادەني ورتالىعى بار، ءبىر ورامدى الىپ جاتقان مەكەمە. ول جەرگە، ءتىپتى شىركەۋ دە اشىپ قويعان. بۇكىل ساياساتىن سول جەردەن جۇرگىزىپ، جۇمىسىن جاساپ وتىر. ءبىز دە وسىنداي ورتالىقتار اشۋىمىز كەرەك.

ەۋروپادا بىلتىر مادەني- ەكونوميكالىق ورتالىق اشىلدى، كونفەرەنتس زالى دا بار عيمارات. ءبىراق ونىڭ شتاتى بەكىمەگەن، ورتالىقتىڭ ديرەكتورى جوق، كەم دەگەندە 2-3 قىزمەتكەرى بولۋى كەرەك، ال سىرتقى ىستەر مينيسترلىگىندە ونداي شتات قاراستىرىلماعان. جارايدى، ەندى ول ەۋروپا، تىم قۇرىعاندا قازاعى قالىڭ جەرلەردە كوشى- قونمەن اينالىساتىن بىرەۋ بولۋ كەرەك قوي. ولارعا قارجى بولىنبەيدى، نە شتاتى جوق، ەندى ولار نە ىستەي الادى؟ اراكىدىك بولسا دا «دياسپورا مەنىڭ جۇمىسىم ەمەس» دەيتىن ەلشىلەر دە كەزدەسەدى. نەگىزى دۇرىس. دياسپورامەن جۇمىس ىستە دەپ وعان ەشكىم بۇيىرا المايدى. دەگەنمەن، ەلشىنىڭ قولىندا تالاي دۇنيە بار. ەگەر ەلشى ۇلتجاندى بولسا، ۇلتىنا بۇيرەگى بۇرىپ تۇرسا، ول كوپ شارۋانى تىندىرا الادى.

وتكەندە پرەزيدەنت اكىمشىلىگى باسشىسىنىڭ ءبىرىنشى ورىنباسارى م. تاجينمەن كەزدەسكەندە وسى ماسەلەنى كوتەردىم. مۇمكىن قازاقستان حالقى اسسامبلەياسى سياقتى مەملەكەت باسشىسى جانىنداعى كونسۋلتاتيۆتى- كەڭەسشى ورگان بولۋى كەرەك شىعار.

- وسى جەردە ءبىر سۇراق تۋىنداپ وتىر، جالپى شەتەلدە قانشا قانداسىمىز بار؟ سىزدەر ستاتيستيكالىق زەرتتەۋ جۇرگىزىپ وتىراسىزدار ما؟

- ءبىز ءوز تاراپىمىزدان حات جازىپ، ۇسىنىس جاسادىق. شەتەلدەگى قازاقتىڭ ناقتى سانىن انىقتاعىمىز كەلدى. نەگىزى ول ءۇشىن عىلىمي ەكسپەديتسيالار ۇيىمداستىرۋ كەرەك. بۇل وڭاي شارۋا ەمەس.

ازىرگە قولىمىزدا بار ستاتيستيكالىق مالىمەتتەرگە سۇيەنەمىز. ماسەلەن، رەسەيدە 2010-2011 -جىلدارى ساناق بولدى، سول ستاتيستيكالىق مالىمەتتىك كىتاپ قولىمىزدا. ەكىنشىدەن، ءار ەلدەگى مادەني ورتالىقتارىمىز دا ساناپ وتىر. دەموگرافيانىڭ ءوزى عىلىم. ولاردىڭ دا بولجامدارى بار. ءبىز سوعان سۇيەنەمىز. سىرتتاعى قازاقتار شامامەن بەس ميلليونعا جاقىندايدى. ەكىنشى جاعىنان، ستاتيستيكا - ساياسات. ماسەلەن، ءوز ۇلتىنىڭ سانىن كوتەرۋ ءۇشىن قازاقتىڭ سانىن ازايتىپ كورسەتەتىن جاعدايلار دا كەزدەسەدى. ءتىپتى ءسىزدىڭ ۇسىنىس حاتىڭىزعا جاۋاپ قاتپايدى دا. بۇل دا ءبىر وزەكتى ماسەلە. ناقتى دەرەك الۋ قيامەت- قايىم. دەگەنمەن، دەموگرافيادا ءوسىم بار، سول قۋانتادى. 1992 -جىلدارى موڭعولياداعى 150 مىڭ قازاقتىڭ جارتىسى كوشىپ كەلدى. جەتپىس مىڭدايى قالدى. اراعا 10-15 جىل سالىپ، قازىر قايتادان 150-160 مىڭ بولىپ وتىر. ءبىز سىرتتاعى اعايىننىڭ جىلداعى تابيعي ءوسىمىن عانا قازاقستانعا قاراي بۇرىپ وتىرساق، ونىڭ ءوزى جەتىستىك.

- قاۋىمداستىقتىڭ شەتەلدەگى باۋىرلارىمىزبەن بايلانىسى قانداي؟

- العاشقى جىلدارداعىداي ەمەس، قۇدايعا شۇكىر، جيىرما بەس جىلدا ءبىراز جۇمىس اتقارىلدى. 32 ەلدە قازاق مادەني ورتالىقتارى قۇرىلدى. ولارمەن تىعىز بايلانىستامىز. مەنىڭ كۇندەلىكتى جۇمىسىم، ەلەكتروندىق پوشتانى اشۋدان باستالادى. سىرتتان كەلگەن ءاربىر حات جاۋاپسىز قالماۋى كەرەك دەگەن قاعيدانى ۇستانامىن.

شەتەلدەگى اعايىندار ۇيىمداستىرىپ جاتقان ءىس- شارالاردى قولداۋعا تىرىسامىز. ەۋروپانىڭ ون ەلىندە تۇراتىن قازاقتار فەدەراتسيا قۇرعان، جىلدا ەۋروپا قازاقتارىنىڭ كىشى قۇرىلتايىن وتكىزىپ تۇرادى. ءوز ارالارىندا فۋتبول تۋرنيرى بار، ت. ب. ۇيىمداستىرادى. ءبىز ءوز تاراپىمىزدان ۇلتتىق قۇندىلىقتاردى، سالت- ءداستۇرىمىزدى ناسيحاتتاپ، كورسەتۋگە تىرىسامىز.

قاۋىمداستىقتىڭ «تۋعان ءتىل»، «التىن بەسىك» جۋرنالدارىن، «اتاجۇرت» باسپاسىنان شىققان 100-دەن استام كىتاپتاردى، ت. ب. مەملەكەتتىك تاپسىرىسپەن شىعاتىن ەڭبەكتەردى جىبەرەمىز. مادەني ورتالىقتارداعى كىتاپحانا قورىن جىلدا تولتىرامىز. بىلتىردىڭ وزىندە، موڭعولياعا بەس مىڭنان استام كىتاپ جىبەردىك.

جالپى قۇرىلتاي بارىسىندا قاۋىمداستىقتىڭ مارتەبەسى، قارجىلىق ماسەلەلەرى جونىندە دە ايتىلۋى مۇمكىن.

- 32 ەلدە قازاق مادەني ورتالىقتارى بار دەپ ايتىپ قالدىڭىز. ولارعا قامقورلىق قاي دەڭگەيدە، قازاق ءتىلىنىڭ جاعدايى قالاي، سالت- ءداستۇرىمىز ساقتالعان با؟

- ءار ەلدە ءارتۇرلى. مىسالى، وزبەكستاندا رەسپۋبليكالىق قازاق مادەني ورتالىعىنىڭ توعىز وبلىستا جانە اۋدانداردا بولىمشەلەرى بار. ءبىر- بىرىنە باعىنادى، ءبارى تىعىز جۇمىس جاسايدى. سولاي بولا تۇرا، ماسەلەن، ەلگە كەلگەن ءبىر ميلليون اعايىنداردىڭ 61 پايىزى وزبەكستاننان كەلگەن باۋىرلارىمىز. جۇرتتىڭ كوپشىلىگى قىتايدان، موڭعوليادان كەلىپ جاتىر دەپ ويلايدى. شىن مانىندە قىتايدان 15 پايىز، موڭعوليادان 13 پايىز، قىرعىزستاننان 3 پايىز كەلدى. ءبىر ەلدەن ءبىر ەلگە كوشۋ وڭاي شارۋا ەمەس. جاقىن بولعاننان كەيىن كوشىپ كەلىپ جاتقان جوق. ءار ەلدىڭ ساياسي، ەكونوميكالىق، ەكولوگيالىق قيىندىقتارى بولادى. ءبىز وسىنى ءتۇسىنۋىمىز كەرەك.

قىتايدا ءبىر جارىم ميلليون اعايىن بولسا، ونداعى قازاق مەكتەپتەرىنە قوس تىلدىلىكتى ەنگىزدى. مۇنى تۇسىنۋگە بولادى، بۇل ءوز ەلىن، مەملەكەتىن سىيلاۋ دەگەندى بىلدىرسە كەرەك. ال ەرتەڭ بيولوگيا، حيميانى... ءبارىن وزگە تىلدە وقىتىپ، قازاق ءتىلى مەن ادەبيەتىن عانا قازاقشا قالدىرسا، ونىڭ سوڭى نە بولادى؟ .. قازىر موڭعوليادا دا قوس تىلدىلىك ساياساتى جۇرگىزىلىپ جاتىر.

بەس ميلليون اعايىننىڭ تۇگەلدەي قازاقستانعا كوشىپ كەلۋى ەكىتالاي. اشىعىن ايتقاندا، ءدال قازىرگى ۋاقىتتا بەس ميلليوندى قابىلداپ الاتىن ءبىزدىڭ دە جاعدايىمىز جوق. سوندىقتان ءبىز ولارمەن رۋحاني- مادەني بايلانىستى ۇزبەۋىمىز كەرەك. ۇنەمى قولداۋ كورسەتكەنىمىز ءجون. سول ءۇشىن دە مەملەكەتتىك دۇرىس ساياسات قاجەت.

- شەتەلدەگى قانداستارىمىزدىڭ اتامەكەنگە ورالۋى قالاي، ولارعا مەملەكەت تاراپىنان قانداي كومەك كورسەتىلۋدە؟

- ارينە، مەملەكەت تاراپىنان كومەك- جەڭىلدىكتەر بار. قازىرگى ەكونوميكالىق جاعدايعا بايلانىستى ءسال سايابىرسىپ قالعانى دا راس. دەگەنمەن، بيىلدىڭ وزىندە 32-34 مىڭ ادام كوشىپ كەلدى. بىلتىردان بەرى ىشكى ميگراتسيا باستالدى عوي. قازىر ىشكى ميگراتسيا مەن سىرتتاعى اعايىنعا كوشى- قوندا بىردەي جاردەم جاسالادى. ايتقان جەرگە باراتىن بولسا جولى تولەنەدى، كۆوتامەن وكىمەتتەن قارجىسىن الادى، ماماندىعى جوق بولسا التى اي تەگىن وقىتىپ، ماماندىق بەرەدى، قىزمەتتىك پاتەر بەرەدى. ول جەردە بەس جىل تۇرسا، ونى جەكەشەلەندىرىپ الۋعا بولادى. «بار، ورنالاس، تامىرىڭدى جىبەر، بالا- شاعاڭدى وقىت، جۇمىس ىستەپ، قازاقتى كوبەيتۋگە ۇلەسىڭدى قوس» دەيدى مەملەكەتىمىز. بۇدان ارتىق نە كەرەك؟ وسىنىڭ ءبارى دەموگرافيانىڭ رەتتەلۋىنە سەپتىگىن تيگىزەدى دەپ ويلايمىن.

- قۇرىلتايعا ورالايىق. اتامەكەنىن ءبىر كورۋگە اڭسارى اۋىپ، قاتىسۋعا نيەت ەتكەن ازاماتتار كوپ بولار. قاتىسۋشىلاردى قالاي ىرىكتەپ الاسىزدار؟

- وسىدان ءبىر اي بۇرىن مادەني ورتالىقتارعا حابارلاسىپ، عالامتور ارقىلى حاباردار ەتتىك. قازاق كوبىرەك شوعىرلانعان جەردەن كوبىرەك شاقىرىلادى. ول زاڭدى دا. بۇرىنعى قۇرىلتايعا قاتىسۋشىلار بۇل جولى جاستارعا جول بەرەدى. «مەن 3-4 قۇرىلتايعا قاتىستىم، مەنى نەگە شاقىرمايسىڭدار؟» دەپ رەنىش ءبىلدىرىپ جاتقاندار دا بار. ولاردىڭ بىزگە ەشقانداي وكپەسى بولماۋى كەرەك. جول - جاستاردىكى. تاعى دا قايتالاپ ايتامىن، ءار ەلدىڭ جاستار ۇيىمدارىنىڭ كوشباسشىلارى، ونىڭ ورىنباسارلارى مىندەتتى تۇردە شاقىرىلادى. الاش ارداقتىلارىنىڭ دا ءۇرىم- بۇتاقتارىن ۇمىت قالدىرىپ جاتقان جوقپىز. مىسالى، مۇحامەدجان تىنىشپايەۆتىڭ ۇرپاعى كانادادان، ەرمۇحان بەكماحانوۆتىڭ ۇرپاعى ماسكەۋدەن، حاليفا التايدىڭ ۇرپاقتارى فرانسيادان كەلەدى. بۇدان بولەك حالىقارالىق ۇيىمدار بار، «تۇرىك كەڭەسى»، ازەربايجاننىڭ دياسپورا جونىندەگى مەملەكەتتىك كوميتەتى، موڭعوليانىڭ موڭعولدار كونگرەسى، ۆەنگريادان، وزبەكستاننان، تاجىكستاننان، ءوزىمىزدىڭ حالىقارالىق ۇيىم تۇركسوي بار، ت. ب. وسىلاي ءتىزىم جالعاسا بەرەدى.

وسى قۇرىلتايدى ويداعىداي وتكىزسەك، قىركۇيەك ايىندا قاۋىمداستىقتىڭ قۇرىلعانىنا 25 جىل بولادى. قۇداي قالاسا، سول مەرەكەمىزدى كەڭ كولەمدە ۇيىمداستىرساق دەگەن جوسپارىمىز بار.

- اڭگىمەڭىزگە راقمەت!

 اڭگىمەلەسكەن

باعداگۇل بالاۋبايەۆا

http://anatili.kazgazeta.kz