قازاقستاندا ءدارى-دارمەك اينالىمىن باقىلايتىن وزىق جۇيە ەنگىزىلەدى
«قولدا بار زەرتحانالاردىڭ ساپاسى ارتتىرىلادى جانە ءدارى-دارمەكتەردىڭ وندىرۋشىدەن ناۋقاسقا دەيىنگى قوزعالىسىن باقىلاۋدىڭ اۆتوماتتاندىرىلعان جۇيەسى ەنگىزىلەدى. ءدارى- دارمەك اينالىمىن باقىلاۋ جانە نارىققا كونترافاكتىلى ونىمدەردىڭ ەنىپ كەتپەۋى ءۇشىن ەۋروپالىق ەلدەر تاۋاردىڭ ءار قورابىنا 2D- كودتاردى ەنگىزۋ بويىنشا قارار قابىلداعان. وسىنداي جۇيەنىڭ قازاقستاندا ەنگىزىلۋى ءدارى- دارمەك اينالىمىن باقىلاپ، ەسەپتەپ وتىرۋعا جول اشادى»، - دەدى ق ر دەنساۋلىق ساقتاۋ ءمينيسترى ەلجان ءبىرتانوۆ پارلامەنت تىڭداۋىندا.
ونىڭ سوزىنشە، ەلىمىزدەگى ءدارى- دارمەكتەر تۋرالى تولىق اقپاراتتى، تەگىن دارىلەردىڭ ءتىزىمىن دارىلىك قۇرالداردى ءتيىمدى پايدالانۋ ورتالىعىنان الۋعا بولادى. دارىلىك قۇرالداردى ساراپتاۋ ۇلتتىق ورتالىعى مەديتسينالىق ماقساتتاعى ونىمدەردى، مەديتسينالىق تەحنيكالاردى ولاردىڭ قاۋىپسىزدىگىنە ساراپتاما جۇرگىزەدى. ءدارى- دارمەكتەردى سىناقتان وتكىزۋ جۇمىستارى دا جاسالادى.
ايتا كەتەيىك، بۇگىن پارلامەنت ماجىلىسىندە «قازاقستان رەسپۋبليكاسىندا حالىقتى تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە دارىلىك زاتتارمەن قامتاماسىز ەتۋ جانە فارماتسيەۆتيكا سالاسىنىڭ جاي- كۇيى جانە دامۋى تۋرالى» تاقىرىبىندا پارلامەنتتىك تىڭداۋ ءوتىپ جاتىر.
تىڭداۋ بارىسىندا پارلامەنت دەپۋتاتتارى دارىمەن قامتاماسىز ەتۋدىڭ وزەكتى ماسەلەلەرى جانە وسى سالاداعى پروبلەمالاردى شەشۋ جولدارى ءسوز بولدى.
پارلامەنت دەپۋتتارىمەن بىرگە تىڭداۋعا ورتالىق جانە جەرگىلىكتى اتقارۋشى ورگاندار وكىلدەرى، ءىرى فارماتسيەۆتيكالىق كاسىپورىنداردىڭ باسشىلارى مەن شەتەلدىك ساراپشىلار، مەديتسينا قىزمەتكەرلەرى، ۇكىمەتتىك ەمەس ۇيىمدار مەن باق وكىلدەرى قاتىسۋدا.
قازىرگى ۋاقىتتا وتاندىق دەنساۋلىق ساقتاۋ جۇيەسى جۇيەلى رەفورما - ازاماتتارعا مەديتسينالىق- الەۋمەتتىك كومەك كورسەتۋدى عانا ەمەس، حالىقتى دارىمەن قامتاماسىز ەتۋدى ۇيىمداستىرۋدى دا قامتيتىن مىندەتتى الەۋمەتتىك مەديتسينالىق ساقتاندىرۋدى ەنگىزۋ كەزەڭىندە تۇر.
دارىلىك پرەپاراتتاردىڭ قولجەتىمدىلىگى مەديتسينالىق كومەكتىڭ قىمبات تۇرلەرىنە جۇمسالاتىن شىعىنداردى ازايتا وتىرىپ، تەراپيالىق تاكتيكالاردى ءتيىمدى قولدانۋعا ىقپال ەتەدى، اۋرۋحاناعا جاتۋ دەڭگەيىن ازايتادى جانە پاتسيەنتتەردىڭ بۇكىل توبىنىڭ ءومىر ءسۇرۋ ساپاسىن جاقسارتادى.
تىڭداۋدىڭ قورىتىندىسى بويىنشا قازاقستان رەسپۋبليكاسىنىڭ ۇكىمەتىنە ۇسىنىستار ازىرلەنەتىن بولادى.
اۆتور: جاسۇلان جولدىبايەۆ
