قانات يسلام: ەلىم مەنى «ورالمان» دەپ اتاسا دا، ۇرپاقتارىم قازاق بولادى
ءوزىنىڭ ۇلتقا دەگەن جاناشىرلىعىمەن، وتان سۇيگىشتىگىمەن ەرەكشەلەنەتىن بوكسشى ەلى، جەرى تۋرالى ويلارىن دا ۇنەمى ورتاعا سالىپ، اشىق ايتىپ جۇرەدى.
NUR. KZ پورتالى قانات يسلامنىڭ وسىعان دەيىن ايتقان ايرىقشا پىكىرلەرىن ىرىكتەپ، ەل نازارىنا ۇسىنىپ وتىر.
- التايدا، تاۋدا ءوستىم، تاۋدى جاقسى كورەمىن. شىڭعا شىعۋ، بيىككە شىعۋ ماقساتىم. تاۋعا كەلسەم ەركىن دەمالامىن. ءاربىر ەر ادام شىڭعا ۇمتىلۋى كەرەك.
- ەلگە ورالعانىم - مەنىڭ ۇلكەن ءبىر ارمانىم، اتا-بابالارىمنىڭ ارمانى ورىندالدى دەپ سانايمىن. مەن ءوزىم ەلىمە كەلىپ، ورالمان اتانىپ كەتسەم دە، بالالارىمدى ەل قازاق دەپ اتايتىن بولادى. ۇرپاقتارىم قازاق بولادى. تاۋەلسىز ەلىم بولماسا، قايدا بارار ەدىم
- بىزدە ءىرى دەنەلى جىگىتتەردىڭ بارلىعى سپورتتا ەمەس، كۇزەتشى بولىپ ءجۇر.
- سىرتتا جۇرگەن سوڭ ادام نامىسشىل، ۇيىمشىل بولادى ەكەن. ارقانداي جەردە باسقا ۇلتتاردىڭ ارتىندا قالىپ كەتپەۋگە تىرىستىق. مۇنداي ورتادا ءجۇرىپ ارلى بولىپ وسەدى ەكەنسىڭ.
- جاتتىقتىرۋشىلاردىڭ بارلىعى ەڭ ءبىرىنشى چەمپيون بول دەپ ۇيرەتەدى. بۇل قاتە پىكىر. ءبىر ۇستازىم بار ەدى. سول كىسىنىڭ الدىنا بارعاندا «نەگە كەلدىڭ؟» دەپ سۇرادى. «چەمپيون بولۋ ءۇشىن»، - دەدىم. «جوق. سەن ءبىرىنشى ادام بول، سودان كەيىن چەمپيون بولساڭ، سەن دۇرىس چەمپيون بولاسىڭ دەدى. مەن وسى پىكىردى ۇستانامىن.
- ۇلت دەگەن كىم؟ ول - اكەم، شەشەم، اپكە-قارىنداستارىم. باسقا ۇلتتىڭ اراسىندا جۇرگەن سوڭ باسەكەلەستىك پايدا بولادى. ولاردان اقىلدى، كۇشتى بولۋىڭ كەرەك. مەندە دە سونداي باسەكەلەستىك قالىپتاستى.
- گولوۆكيندى دوس، چەمپيون، ادام رەتىندە قۇرمەتتەيمىن. ول قازاقستاننىڭ كوك تۋىن جەلبىرەتىپ جۇرگەن باتىر. ءبىز - باۋىرمىز. ءبىز ءۇشىن ءبىرىنشى ورىندا - ەلدىڭ بەدەلى. ونىڭ قارسىلاستارى ءبىرىنشى راۋندتا-اق ونىمەن رينگكە شىققانىنا وكىنەدى. ول - ورتا سالماقتىڭ كورولى.
- ماقتان ءۇشىن ءومىر ءسۇرۋ - السىزدىك، ناداندىق.
- قازاق ايتادى عوي «ءيت تويعان جەرىنە، ەر تۋعان جەرىنە» دەپ. بىرەۋ مال ءۇشىن ءومىر سۇرەدى. بىرەۋ ەل ءۇشىن. ال مەن كوتەرەتىن كوك تۋىم بارىنا ريزامىن. از دا بولسا، سونىڭ جولىندا قىزمەت ىستەپ كەتۋ - ارمانىم.
