ەكسپوداعى ەڭ ءىرى شەتەلدىك پاۆيلون قاي ەلگە تيەسىلى؟
پاۆيلوننىڭ كىرەبەرىسىندە گەرمانيانىڭ 16 فەدەرالدى جەرلەرىنىڭ (Laender) پرەزەنتاتسياسى ۇسىنىلادى. وسىلايشا، كەلۋشىلەر پاۆيلونعا كىرمەي تۇرىپ، گەرمانيا تۋرالى نەگىزگى دەرەكتەرمەن تانىسا الادى جانە «گەرمانيادا جاسالعان» اتتى ارنايى ەنەرگەتيكالىق ساياساتى تۋرالى بىلە الادى. سونداي-اق، پاۆيلونعا كىرگەن ءاربىر كەلۋشىگە smartstick قۇرالى بەرىلەدى.
بۇل قۇرال جەكە ەكسپوناتتاردى ىسكە قوسۋعا، قوزعالتۋعا جانە ولارمەن قازاق، ورىس، اعىلشىن، نەمىس تىلدەرىندە تانىسۋعا مۇمكىندىك بەرەدى.
وسىلايشا، قوناقتار قايتا قالپىنا كەلەتىن ەنەرگيا كوزدەرى، قۋات الۋ تاسىلدەرى، بولاشاق قالالارعا بولجام تۋرالى قۇندى دەرەكتەرگە قانىعىپ، smartstick قۇرالدارى ارقىلى «smartpoint» تۇرىندەگى ەنەرگيانى جيناقتايدى.
كورمە سوڭىندا قوناقتار ۇلكەن دوڭگەلەك ۇستەلى بار كەڭىستىككە وتەدى. ولار ۇستەل ۇستىنە smartstick قۇرالدارىن قويعاندا، smartpoint ارقىلى جينالعان ەنەرگيا ورتاعا بىرىكتىرىلىپ، ەرەكشە لازەرلىك شوۋ پايدا بولادى. ياعني، پاۆيلونعا كەلۋشىلەر ءوز قوزعالىستارى ارقىلى جينالعان ەنەرگيانىڭ قورشاعان الەمدى قالاي وزگەرتەتىنىن كورە الادى.
ورتاق كۇش سالۋ ارقىلى ەنەرگەتيكاعا بايلانىستى جاھاندىق ماسەلەلەردى شەشۋگە بولاتىنىن باعامدايدى. «گەرمانيا مەن قازاقستان ماڭىزدى ەكونوميكالىق ارىپتەستەر بولىپ تابىلادى. ءبىزدىڭ ورتالىق ازياداعى ساۋدا-ساتتىعىمىزدىڭ 80 پايىزى قازاقستانعا تيەسىلى. وتكەن ايدىڭ سوڭعى سيفرلارىنا سايكەس، ەكى ەل اراسىنداعى يمپورت پەن ەكسپورت كولەمى 40 پايىزعا ارتقان. اتالعان كورمەگە قاتىسۋ ارقىلى گەرمانيا مەن قازاقستان اراسىنداعى ەكونوميكالىق قارىم-قاتىناستاردىڭ جاڭا قارقىندا دامۋىنا ۇمىتتەنەمىن»، - دەدى گەرمانيانىڭ قازاقستانداعى ەلشىسى رولف مافاەل بۇگىن ەكسپو مەديا-ورتالىعىندا وتكەن باسپا ءسوز ءماسليحاتىندا.
سونداي-اق، ەلشى قازاقستاندا وتكەن عاسىردا كوپتەگەن نەمىستەردىڭ ءومىر سۇرگەنىن، ولاردىڭ ءبىرازىنىڭ گەرمانياعا ورالعانىن ەرەكشە اتاپ ءوتتى.
«قازىرگى ۋاقىتتا 180 مىڭ نەمىس قازاقستاندا ءومىر ءسۇرىپ جاتىر، ياعني قازاقستان حالقىنىڭ ءبىر پايىزىن ەتنيكالىق نەمىستەر قۇرايدى. مۇنىڭ ءبارى ەكى ەل اراسىنداعى قارىم-قاتىناسقا ەرەكشە جىلۋلىق سىيلايدى. جىل سايىن شامامەن 50 مىڭ ادام گەرمانيادان قازاقستانعا قوناققا بارىپ تۇرادى جانە بۇل كورسەتكىشتىڭ بيىل ەداۋىر ۇلعايارىنا سەنىمدىمىن»، - دەدى ول.
ايتا كەتەيىك، شەتەلدىك ەكسپو قاتىسۋشىلارى اراسىندا ەڭ ءىرى پاۆيلون گەرمانياعا تيەسىلى. پاۆيلون اۋماعى 1700 شارشى مەتردى الىپ جاتىر، وندا كورمە ايماقتارى، VIP- ايماقتار، نەمىس حالقىنىڭ ۇلتتىق تاعامدارى مەن سۋسىندارىن ۇسىناتىن مەيرامحانالار، گەرمانيا تۋرالى كادەسىيلار مەن بازارلىقتار ساتىلاتىن دۇكەندەر جانە كەڭسەلىك (قىزمەتتىك) بولمەلەر بولادى.
سونىمەن بىرگە، پاۆيلوندا 80 ادام جۇمىس ىستەيتىن بولادى. قىزمەتكەرلەردىڭ %75 قازاقستاندىقتار بولسا، قالعان %25 گەرمانيادان كەلەدى. 12- شىلدە كۇنى ەكسپو اۋماعىندا گەرمانيانىڭ ۇلتىق كۇنى اتالىپ وتەدى.
اۆتور: ايجان سەرىكجان قىزى
