مينيستر: «مەن قازاقپىن» بايقاۋىنا جىراقتاعى قانداستىرىمىزدى دا قاتىستىرۋدى كوزدەپ وتىرمىز
دەپ حابارلايدى قازاقپارات ءتىلشىسى.
بايقاۋدىڭ باستى ماقساتى - قازاق حالقىنىڭ ءتول ونەرى، سونىڭ ىشىندە جىر- تەرمەلەر مەن كۇيلەردى بۇگىنگى زامان تالابىنا ساي جاڭارتىپ، وسكەلەڭ ۇرپاققا جەتكىزۋ. ول ءۇشىن ارنايى توپ ءاربىر وبلىستى ارالاپ، جوباعا قاتىسۋشىلاردى ىرىكتەيدى. وق بويى وزىق شىققاندار تەلەۆيزيالىق بايقاۋعا جولداما الادى. بايقاۋعا قاتىسۋشىلاردىڭ جاس ەرەكشەلىگى - 18 بەن 40 جاس ارالىعى. سونداي- اق ساحناعا شىعاتىن ونەرپازداردىڭ كيىمى قازاقى ۇلگىدە ءارى بۇگىنگى زامان تالابىنا ساي بولۋى ءتيىس. جوباعا قازاقستان ازاماتتارىنان بولەك، رەسەي، قىتاي مەن موڭعوليا جەرىندە تۇراتىن قانداستارىمىز دا قاتىسا الادى.
«ەلباسى رۋحاني جاڭعىرۋ جونىندەگى جالپى ۇلتتىق يدەيانى جاريالاعاندا جاڭعىرۋ ۇدەرىسى مىندەتتى تۇردە ەلدىڭ ۇلتتىق رۋحاني تامىرىنان ءنار الۋى ءتيىس ەكەنىن اتاپ وتكەن بولاتىن. ءبىزدىڭ رۋحاني تامىرىمىز - اتا- بابادان ميراس بولىپ قالعان سالتىمىز، ءتىلىمىز بەن مۋزىكامىز، ادەبيەتىمىز دەسەك، سونىڭ ىشىندە ءداستۇرلى انشىلىك، كۇيشىلىك جانە تەرمەشىلىك ونەردىڭ ورنى ەرەكشە. وسى بىرەگەي ونەردى لايىقتى دارىپتەۋ - ەلدىك، بىرلىك يدەياسىن ىسكە اسىرۋدىڭ اسا ۇتىمدى قۇرالى. وسىنى ەسكەرە وتىرىپ، ءبىز، مينيسترلىك پەن «قازاقستان» ۇلتتىق ارناسى، «مەن قازاقپىن» اتتى تەلەۆيزيالىق مەگاجوبانى ۇسىنىپ وتىرمىز. جوبانىڭ ماقساتى - ءداستۇرلى ءانشى، تەرمەشى مەن كۇيشىلەرىمىزدى، ەلىمىزدىڭ ءاربىر ايماعىندا قالىپتاسقان ونەر مەكتەبىنىڭ وكىلدەرىن كەڭىنەن دارىپتەۋ، تاڭداۋلى تۋىندىلاردى وسكەلەڭ ۇرپاققا زاماناۋي فورماتتا ناسيحاتتاۋ. سوندىقتان «مەن قازاقپىن» جوباسىنىڭ تۇپكى ناتيجەسى رۋحاني مۇرانى ۇرپاق كادەسىنە جاراتا وتىرىپ، ۇلتتىق تۇتاستىقتى نىعايتۋ بولۋى ءتيىس، ياعني بۇل بارشا حالقىمىزدىڭ باسىن قوسىپ، جۇدىرىقتاي جۇمىلدىراتىن جوبا بولۋى كەرەك. مىنە، سول ءۇشىن ءبىز جوباعا تەك ەلىمىزدىڭ ونەرپازدارىن عانا ەمەس، جىراقتاعى قانداستىرىمىزدى دا قاتىستىرۋدى كوزدەپ وتىرمىز. ءوز باسىم «مەن قازاقپىن» بايقاۋىنىڭ قىمبات بولعانىن قالايمىن. كەرەك بولسا، دەمەۋشىلەردى تارتىڭىز. بولماسا، «قازاقستان» كورپوراتسياسى دا ونى ءوز كۇشىمەن ىسكە اسىرا الادى دەپ ويلايمىن. وسى جوباعا اتسالىسقان بارلىق قىزمەتكەرلەرگە جاقسى قالاماقى تولەنۋى ءتيىس. ءدال وسى جوباعا اقشانى ايامايىقشى، ساپالى دۇنيە بولىپ شىقسىن. جاقسى ءارى ساپالى جوبانى جاساعانىمىز ءجون»، - دەيدى مينيستر ابايەۆ.
«قازاقستان» ر ت ر ك» ا ق باسقارما ءتوراعاسى ەرلان قاريننىڭ ايتۋىنشا، بايقاۋدىڭ العاشقى ىرىكتەۋ تۋرلارى 5 -ماۋسىمدا الماتى وبلىسىندا باستالادى. ال شەت ەلدەردەگى كونكۋرستار شىلدە ايىندا ۇيىمداستىرىلماق. وسىدان كەيىن كورەرمەن قاۋىم بايقاۋدىڭ كۇندەلىگى مەن نەگىزگى كونكۋرسىن تەلەديداردان كورە الادى. جەڭىمپازدار «جىلدىڭ ەڭ ۇزدىك ءداستۇرلى ءانشىسى»، «جىلدىڭ ەڭ ۇزدىك تەرمەشىسى» جانە «جىلدىڭ ەڭ ۇزدىك كۇيشىسى» اتالىمدارى بويىنشا ماراپاتتالادى.
اۆتور: ارمان اسقاروۆ
