استانا اكىمى قاڭعىباس يتتەرمەن جانە مىسىقتارمەن كۇرەسە باستادى
ەرەجەدە قاڭعىباس يتتەر مەن مىسىقتاردى اۋلاۋ جانە جويۋ ءتارتىبى، اۋلانعان جانۋارلاردى تاسىمالداۋ، ولاردى ۋاقىتشا وقشاۋلاعىشقا جەتكىزۋ جانە ۇستاۋ، ولاردى يەلەرىنە قايتارۋ، يەسى تابىلماعان جاعدايدا كوزدەرىن جويۋ ءتارتىبى مەن قاعيدا تالاپتارىن بۇزعانى ءۇشىن جاۋاپكەرشىلىكتەر تۋرالى جازىلعان.
ماسەلەن، ەلوردادا قاڭعىباس جانۋارلاردى اۋلاۋدى، ۋاقىتشا ۇستاۋ مەن تاسىمالداۋدى تەك مامانداندىرىلعان ۇيىمدار جۇزەگە اسىراتىن بولادى. اۋلانعان جانۋارلار ارنايى تورلارمەن جابدىقتالعان، مامانداندىرىلعان ۇيىمنىڭ بەلگىسى مەن تەلەفون ءنومىرى بار اۆتوكولىكپەن تاسىمالدانادى.
بۇل رەتتە، ۇستالعان يتتەر مەن مىسىقتاردىڭ دەنساۋلىعىنا جاراقات نە باسقا زيان كەلتىرىپ الماۋ جاعى مۇقيات قاداعالاناتىن بولادى. ۋاقىتشا ۇستاۋ وقشاۋلاعىشىنا جەتكىزىلگەن جانۋارلاردى تىركەپ، ازىقتاندىرۋدان باستاپ وزگە دە كۇتىمدەردى مەملەكەتتىك تاپسىرىس اياسىندا مامانداندىرىلعان ۇيىم جۇزەگە اسىرادى.
ماقۇلىقتار كلينيكالىق تەكسەرىستەن وتكەننەن كەيىن ءبىر تورعا ءبىر جانۋاردان ورنالاستىرىلادى. ال اۋلانعان يتتەر مەن مىسىقتاردىڭ يەلەرى تابىلىپ جاتقان جاعدايدا، ازاماتتار جەكە كۋالىگىمەن قوسا، ءيت نە مىسىقتىڭ دا ۆەتەرينارلىق پاسپورتىن الا كەلۋى ءتيىس.
ەرەجەگە ساي، سۇرانىس بولماعان قاڭعىباس جانۋارلار ءۇشىنشى جاققا نەمەسە مەملەكەتتىك جانۋارلار باسپاناسىنا وتكىزىلەدى. ولار جويىلماس بۇرىن قازاقستان رەسپۋبليكاسىنىڭ زاڭناماسىندا تىيىم سالىنباعان پرەپاراتتارمەن، مەديكامەنتوزدىق جولمەن جانسىزداندىرىلۋعا جاتادى. قاڭعىباس جانۋارلاردىڭ ولەكسەلەرىن جويۋ ارنايى پەش قويىلعان مامانداندىرىلعان ۇيىمنىڭ بازاسىندا ىسكە اسىرىلادى. ەرەجەنىڭ تالاپتارىن بۇزعان تۇلعالار نەمەسە ۇيىمدار ق ر زاڭناماسىنا سايكەس جاۋاپكەرشىلىككە تارتىلاتىن بولادى. ال ونى قاداعالاۋ ءماسليحات دەپۋتاتتارىنان قۇرالعان قامقورشىلىق كەڭەسكە جۇكتەلدى. استانا قالاسىدا قاڭعىباس يتتەر مەن مىسىقتاردى اۋلاۋ جانە جويۋ ەرەجەسىنىڭ تولىق ءماتىنى «استانا اقشامى» گازەتىندە جاريالاندى.
اۆتور: ميرا تولەندى قىزى
