قازاقستان مەديتسيناسى قانداي ماماندارعا ءزارۋ؟
بۇل تۋرالى بۇگىن ق ر پارلامەنتى ءماجىلىسى الەۋمەتتىك-مادەني دامۋ كوميتەتىنىڭ حاتشىسى، پارلامەنتتىك تىڭداۋلار دايىندىعى جونىندەگى ۋاقىتشا كوميسسيانىڭ جەتەكشىسى بەيبىت مامرايەۆ ءمالىم ەتتى، دەپ حابارلايدى قازاقپارات.
«مەنىڭ قولىمدا بار مالىمەتتەرگە سايكەس، بىزدە قازىر نەبارى 200 فارماكولوگ مامان جۇمىس ىستەيدى. ءبىر قىزىعى ولاردىڭ تەك %5 دا ارنايى فارماكولوگيا ماماندىعى بويىنشا ديپلوم بار. قالعاندارى بۇل سالاعا باسقا ماماندىقتاردان كەلىپ، قوسىلعان بولسا كەرەك. ءبىراق ولاردىڭ بارلىعى دا تاجىريبەدەن وتكەن، بىلىكتىلىكتەرىن جەتىلدىرگەن جاندار. ياعني ارنايى سەرتيفيكاتقا يە. ولاردىڭ بىلىگىنە كۇمان كەلتىرمەيمىن. الايدا فارماكولوگتاردىڭ تاپشىلىعى كوزگە ۇرىپ تۇر»، - دەدى ول ورتالىق كوممۋنيكاتسيالار قىزمەتىندە وتكەن بريفينگتە.
ونىڭ سوزىنشە، ەمحانالاردا ساۋاتتى، قۇزىرى جوعارى فارماكولوگتار قىزمەت ەتۋى ءتيىس. ولار ەمحانادا ساپالى فارماتسيانى قۇرىپ، اۋرۋعا شالدىققانداردى ءتيىمدى ەمدەۋگە ۇلەس قوسادى جانە ءدارى-دارمەكتەردى قابىلداۋ ءتارتىبىن ساۋاتتى جۇرگىزەدى. ايتا كەتەيىك، پارلامەنت ماجىلىسىندە 12- مامىردا «قازاقستان رەسپۋبليكاسىندا حالىقتى تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە دارىلىك زاتتارمەن قامتاماسىز ەتۋ جانە فارماتسيەۆتيكا سالاسىنىڭ جاي-كۇيى جانە دامۋى تۋرالى» تاقىرىبىندا پارلامەنتتىك تىڭداۋ وتەدى.
تىڭداۋ بارىسىندا پارلامەنت دەپۋتاتتارى دارىمەن قامتاماسىز ەتۋدىڭ وزەكتى ماسەلەلەرىن جانە وسى سالاداعى پروبلەمالاردى شەشۋ جولدارىن تالقىلاماق. پارلامەنت دەپۋتتارىمەن بىرگە تىڭداۋعا ورتالىق جانە جەرگىلىكتى اتقارۋشى ورگاندار وكىلدەرى، ءىرى فارماتسيەۆتيكالىق كاسىپورىنداردىڭ باسشىلارى مەن شەتەلدىك ساراپشىلار، مەديتسينا قىزمەتكەرلەرى، ۇكىمەتتىك ەمەس ۇيىمدار مەن ب ا ق وكىلدەرى قاتىسادى دەپ جوسپارلانعان.
اۆتور: جاسۇلان جولدىبايەۆ
