سوعىس جىلدارىندا حاتتار بۇگىنگى كۇننەن دە تەز جەتكەن

استانا. قازاقپارات - ۇلى وتان سوعىسى جىلدارىندا اسكەري پوشتا قىزمەتىنىڭ ەڭبەگى ەلەۋلى بولدى. قانشا جەردەن وق بوراپ، مىڭ سان سنارياد جارىلىپ، قادام باسقان سايىن اق اجالعا كەزىگۋى مۇمكىن بولا تۇرا، ولار ەلدەگى تۋىس- باۋىردىڭ حاتىن مايدان دالاسىنا كوپ ۇزاتپاي جەتكىزىپ وتىردى.

حالىقتىق كوميسسارياتتىڭ «سولداتتارعا حاتتى مىندەتتى تۇردە جەتكىزۋ» تۋرالى بۇيرىعى قالتقىسىز ورىندالدى. سەبەبى بارلىعى مايدان دالاسىندا مۇڭعا باتىپ، ءار ءسات سايىن اجالمەن بەتپە- بەت كەلىپ جۇرگەن جاۋىنگەردىڭ جان تولقىنىسىن كوبەلەكتىڭ قاناتىنداي ۇلبىرەگەن ءۇشبۇرىش حات باسا الاتىنىن ءتۇسىندى. پوشتاشىلارعا قولدارىنا قارۋ الىپ، وزىنە سەنىپ تاپسىرىلعان باعالى حاتتاردى قورعاۋعا تۋرا كەلدى. ەگەر بۇل حاتتار جاۋ قولىنا تۇسكەندە، ەل اسكەرى ۇلكەن زارداپ شەگەر ەدى.

«سوعىس جىلدارىندا حاتتار بۇگىنگى كۇننەن دە تەز جەتەتىن. «حاتتى الۋشى» دەگەن جەردە دكا (دليا كراسنوي ارمي) دەگەن اببريەۆياتۋرا مەن پولك ءنومىرى جازىلاتىن بولعان. ءبىر ايدا مايدانعا 70 ميلليونعا دەيىن حات جەتكىزىلەتىن. حاتتاردى كەشىكتىرىپ الماس ءۇشىن، پوشتادا ىرىكتەيتىن بولىمشەلەر تاۋلىك بويى جۇمىسىن توقتاتپايتىن. حاتتى ەل قورعانىشى بولعان باتىرلارعا جەتكىزۋ جەڭىسكە سالىنعان ۇلەس رەتىندە سانالدى. حاتتار ەشەلونمەن، سۇڭگۋىر قايىقتارمەن تاسىمالدانسا، پوشتا قىزمەتكەرلەرى قان مايدانعا 30-40 كەلىلىك قاپتاردى تاسىدى. كەيدە بومبىلاۋ كەزىندە حاتتار پوشتا ەشەلوندارىمەن بىرگە جويىلىپ جاتتى نەمەسە جولدا ولتىرىلگەن پوشتا تاسۋشىلاردىڭ سومكەسىندە جوعالىپ كەتىپ وتىردى. دەگەنمەن ونىڭ ءىزىن الا شىققان پوشتا تاسۋشىلار قانعا بويالعان حاتتاردى الىپ، ساربازدارعا جەتكىزۋگە تىرىساتىن. ءاربىر حاتتى يەسىنە جەتكىزۋ ماڭىزدى بولدى»، - دەلىنگەن قازپوشتانىڭ حابارلاماسىندا.

سول ءبىر سۇراپىل سوعىستا حاتتار ءۇشبۇرىشتى بولاتىن جانە «ءۇمىت سيمۆولى» دەپ اتالدى.

قازپوشتا حابارلاعانداي، ولار كونۆەرتتەردىڭ جەتىسپەۋشىلىگىنەن پايدا بولدى. قاعازدى الدىمەن وڭنان سولعا، سولدان وڭعا بۇكتەپ، استىنعى بولىگىن ىشكى تۇسىنا قىستىراتىن. ونداي حاتتارعا ماركالاردىڭ قاجەتى بولمايتىن. سىرتىنا مەكەن- جايىن جازىپ، پوشتا قىزمەتكەرلەرىنىڭ تاڭباسى ءۇشىن ءبىر بولىگىن تازا كۇيىندە قالدىراتىن بولعان. قان- قاساپ مايدان دالاسىنان جولدانعان ءۇشبۇرىش حاتتار بۇكىل ەل بولىپ ساعىنا توسقان، سارعايا كۇتكەن ازاماتتاردىڭ اماندىعىن جەتكىزەتىن ەدى. ءبىر جاپىراق قاعازدىڭ بەتىنە سوزبەن سيپاتتاۋعا كەلمەيتىن جان تولعانىسى، الابۇرتقان سەزىم، الاپات ساعىنىش سىيىپ تۇردى. تىلداعى، اۋىرتپالىعى مايداننان بەتەر، وق اتىلمادى، قان توگىلمەدى دەمەسەڭ، بەينەتى بەلشەدەن كەلەر جەردە جۇرگەندەر ءۇشىن دە ءۇشبۇرىش حاتتىڭ قۇنى تىم قىمبات بولاتىن. پوشتا تاسۋشىنىڭ جولىن قارايلاعان، قولىنا تەلمىرگەن، وزىنە جازىلعان حات بار بولىپ شىقسا توبەسى كوككە ەكى- اق ەلى جەتپەي قالعانداي قۋاناتىن بولعان...

 اۆتور: جاسۇلان جولدىبايەۆ