پرەزيدەنت قازاقستان حالقىن ۇلى جەڭىس مەرەكەسىمەن قۇتتىقتادى

استانا. قازاقپارات - ق ر پرەزيدەنتى نۇرسۇلتان نازاربايەۆ استاناداعى «وتان قورعاۋشىلار» مونۋمەنتىنە گۇل شوقتارىن قويۋ راسىمىنەن كەيىن قازاقستان حالقىن ۇلى جەڭىس مەرەكەسىمەن قۇتتىقتادى، دەپ حابارلايدى قازاقپارات.

  «قۇرمەتتى قازاقستاندىقتار، وتانداستار! ءار جىل سايىن مامىراجاي، كۇنشۋاقتى مامىر كۇنىندە ءبىز ۇلى جەڭىس مەرەكەسىن اتاپ وتەمىز. بۇل جەڭىستىڭ ماعىناسى وتە ۇلكەن. ادامزاتتىڭ تاريحىندا مۇنداي سۇراپىل سوعىس بولعان ەمەس. ونداعان ميلليون حالىقتىڭ ءومىرىن الىپ كەتكەن، قانشا قالالاردى كۇيرەتكەن فاشيزمگە قارسى سوعىستا ءبىزدىڭ بابالارىمىز ۇلكەن جەڭىسكە جەتتى. وسى جەڭىستىڭ ارقاسىندا مىناداي اشىق اسپان استىندا، بەيبىتشىلىكتە ءومىر ءسۇرىپ، بالالارىمىزدى، ۇرپاعىمىزدى ءوسىرىپ، مەملەكەتىمىزدى نىعايتىپ جاتىرمىز»، - دەپ اتاپ ءوتتى مەملەكەت باسشىسى.

 پرەزيدەنت ەلىمىزدە ارداگەرلەرىمىزدىڭ قاتارى كۇن ساناپ، سيرەپ بارا جاتقاندىعىن قىنجىلىسپەن اتاپ ءوتتى.

«وتان قورعاۋشىلار» الاڭىندا گۇل شوعىن قويۋ - قازا تاپقان بابالارىمىزعا تاعزىم، قاتارى سيرەپ بارا جاتقان ارداگەرلەرگە قۇرمەت. قازاقستان ول كەزدە 6 ميلليون حالقى بار مەملەكەت ەدى. ونىڭ 1,8 ميلليونى سوعىسقا قاتىسىپ، تەڭ جارتىسى مايداننان قايتقان جوق. قازاقستان مايداندا دا، تىلدا دا قولدان كەلگەنشە بارلىق كومەگىن تيگىزدى. سوندىقتان ەلىمىزدىڭ بۇكىل ارداگەرلەرىن، حالقىن ۇلى جەڭىس مەرەكەسىمەن قۇتتىقتاپ، ەلىمىز امان، جۇرتىمىز تىنىش بولسىن، اسپانىمىز ءار ۋاقىتتا اشىق بولسىن دەيمىز!»، - دەدى ەلباسى.

 ەسكە سالا كەتەيىك، بۇگىن نۇرسۇلتان نازاربايەۆ ەكىنشى دۇنيەجۇزىلىك سوعىسىنداعى جەڭىستىڭ 72 جىلدىعىنا وراي استاناداعى «وتان قورعاۋشىلار» مونۋمەنتىنە گۇل شوقتارىن قويعان بولاتىن. سالتاناتتى شاراعا ۇ و س ارداگەرلەرى، ق ر پرەزيدەنتى اكىمشىلىگىنىڭ، ق ر ۇكىمەتىنىڭ، ق ر پارلامەنتىنىڭ، ورتالىق مەملەكەتتىك ورگاندارىنىڭ، ديپلوماتيالىق كورپۋستاردىڭ وكىلدەرى جانە قالا جۇرتشىلىعى قاتىستى.

 سوڭعى دەرەكتەر بويىنشا قازاقستاننان مايدانعا اتتانعان 1 ميلليون 200 مىڭ جاۋىنگەردىڭ 600 مىڭى ۇيلەرىنە قايتىپ ورالمادى. جالپى، بۇرىنعى كەڭەس وداعىنىڭ 27 ميلليونعا جۋىق ادامىن جالماعان قاندى قىرعىندا ەلىمىزدەن اتتانعان 500-دەن استام جاۋىنگەر 1934 -جىلى بەكىتىلگەن ەڭ جوعارعى كەڭەس وداعىنىڭ باتىرى اتانعان بولاتىن، ونىڭ 100-دەن استامى - قازاقتار. سونىمەن قاتار 142 قازاقستاندىق داڭق وردەنىنىڭ تولىق يەگەرى اتانسا، كەڭەس وداعىنىڭ وردەن، مەدالدارىمەن ماراپاتتالعان قازاقستاندىقتار سانى 100 مىڭعا جۋىقتايدى. سوعىس ارداگەرلەرىنىڭ قاتارى جىل وتكەن سايىن سيرەپ بارادى. بۇگىندە قازاقستاندا ۇلى وتان سوعىسىنىڭ 2 مىڭعا جۋىق ارداگەرى تۇرادى.

 اۆتور: جاسۇلان جولدىبايەۆ