نۇرسۇلتان نازاربايەۆ استاناداعى «وتان قورعاۋشىلار» مونۋمەنتىنە گۇل شوقتارىن قويدى
دەپ حابارلايدى قازاقپارات.
پرەزيدەنت جانە الاڭعا جينالعان قاۋىم ەكىنشى دۇنيەجۇزىلىك سوعىستا قازا بولعان جاۋىنگەر قازاقستاندىقتاردى ءبىر ءسات ۇنسىزدىكپەن ەسكە الدى. رەسمي راسىمنەن كەيىن ق ر رەسپۋبليكالىق ۇرمەلى اسپاپتار وركەستەرى ەلىمىزدىڭ گيمنىن ورىندادى. وسىدان كەيىن قۇرمەتتى قاراۋىل روتاسى ق ر قارۋلى كۇشتەرىنىڭ جوعارعى باس قولباسشىسىنىڭ جانە ۇلى وتان سوعىسى ارداگەرلەرىنىڭ الدىندا سالتاناتپەن ساپ تۇزەپ ءجۇرىپ ءوتتى.
گۇل شوقتارىن قويۋ راسىمىنە ۇ و س ارداگەرلەرى، ق ر پرەزيدەنتى اكىمشىلىگىنىڭ، ق ر ۇكىمەتىنىڭ، ق ر پارلامەنتىنىڭ، ورتالىق مەملەكەتتىك ورگاندارىنىڭ، ديپلوماتيالىق كورپۋستاردىڭ وكىلدەرى جانە قالا جۇرتشىلىعى قاتىستى. سوڭعى دەرەكتەر بويىنشا قازاقستاننان مايدانعا اتتانعان 1 ميلليون 200 مىڭ جاۋىنگەردىڭ 600 مىڭى ۇيلەرىنە قايتىپ ورالمادى.
جالپى، بۇرىنعى كەڭەس وداعىنىڭ 27 ميلليونعا جۋىق ادامىن جالماعان قاندى قىرعىندا ەلىمىزدەن اتتانعان 500-دەن استام جاۋىنگەر 1934 -جىلى بەكىتىلگەن ەڭ جوعارعى كەڭەس وداعىنىڭ باتىرى اتانعان بولاتىن، ونىڭ 100-دەن استامى - قازاقتار. سونىمەن قاتار 142 قازاقستاندىق داڭق وردەنىنىڭ تولىق يەگەرى اتانسا، كەڭەس وداعىنىڭ وردەن، مەدالدارىمەن ماراپاتتالعان قازاقستاندىقتار سانى 100 مىڭعا جۋىقتايدى. سوعىس ارداگەرلەرىنىڭ قاتارى جىل وتكەن سايىن سيرەپ بارادى. بۇگىندە قازاقستاندا ەكىنشى دۇنيەجۇزىلىك سوعىستىڭ 2 مىڭعا جۋىق ارداگەرى تۇرادى.
اۆتور: جاسۇلان جولدىبايەۆ
