اتىراۋدا تۇرمەگە اكەلىنگەن قۇرتتىڭ اراسىنان ەسىرتكى شىقتى

ورال. قازاقپارات - اتىراۋدا ۇلتتىق ۇلان جاۋىنگەرى تۇرمەدەگى باۋىرىنا كەلگەن ازاماتشانى تەكسەرگەن كەزدە ماريحۋاناعا جانە اق ءتۇستى گاشيشكە ۇقساس ەسىرتكىنى تاپتى، دەپ حابارلايدى «قازاقپارات» ءتىلشىسى.

«باتىس» وڭىرلىك قولباسشىلىعىنىڭ باسپا ءسوز قىزمەتىنەن تۇسكەن مالىمەتكە قاراعاندا، 5546-اسكەري ءبولىم سەرجانتى ەلميرا بەگىمبايەۆا 3- مامىر كۇنى ساعات 12:30 شاماسىندا قىلمىستىق-اتقارۋ جۇيەسى ۋگ 157/9 مەكەمەسىنىڭ قىزمەتكەرلەرىمەن بىرگە سوتتالعان ۋ- عا كەلگەن س. دەگەن ازاماتشانىڭ جەكە زاتتارىن قاراعان.

سول كەزدە قۇرتتىڭ اراسىنان ماريحۋاناعا ۇقساس وسىمدىك زاتى، سونداي-اق اق ءتۇستى گاشيش ىسپەتتەس ۇنتاق شىققان. تىيىم سالىنعان زاتتاردىڭ تاركىلەنگەنى جونىندە بىرلەسكەن اكت ءتۇزىلىپ، تۇزەتۋ مەكەمەسى قىزمەتكەرلەرىنە بەرىلگەن، سول بويدا وقيعا ورنىنا اتىراۋ قالالىق ىشكى ىستەر باسقارماسىنىڭ جەدەل تەرگەۋ توبى شاقىرتىلعان.

قىراعىلىعى مەن كاسىبي شەبەرلىگى ءۇشىن ۇلتتىق ۇلان جاۋىنگەرى ىنتالاندىرۋعا ۇسىنىلدى.