اسكەري قىزمەتشىلەردىڭ ەڭبەگى كەلەر ۇرپاققا ۇلگى-ونەگە بولادى - نازاربايەۆ
بۇگىن اقوردادا ەلىمىزدىڭ تىنىشتىعىن، وتانىمىزدىڭ جەرىن، شەكاراسىن قورعاۋ ءۇشىن قىزمەت ەتىپ جۇرگەن ءبىرقاتار اسكەري قىزمەتشىنى مەملەكەتتىك ناگرادامەن ماراپاتتاۋ بارىسىندا ەلباسى نۇرسۇلتان نازاربايەۆ وسىلاي دەدى، دەپ حابارلايدى قازاقپارات.
«وزدەرىڭىزگە بەلگىلى، قالىپتاسقان ءداستۇر بويىنشا وتان قورعاۋشىلار كۇنى قارساڭىندا جانە ەكىنشى دۇنيەجۇزىلىك سوعىستىڭ جەڭىسى قارساڭىندا ءبىز كوپ ازاماتتاردى، اسىرەسە اسكەري قىزمەتشىلەردى ماراپاتتاپ، ءتيىستى شەندەرىن بەرەتىنبىز. بۇگىنگى كەزدەسۋدىڭ ءمانى باسقا. سەبەبى تاۋەلسىزدىگىمىزدىڭ 25 جىلدىق مەرەكەسى، ونىڭ ۇستىنە قارۋلى كۇشتەرىمىزدىڭ 25 جىلدىعى. وسىناۋ مەرەيلى بەلەسكە ەرەكشە ەرلىگىمەن كوزگە تۇسكەن ازاماتتاردى ماراپاتتاعالى تۇرمىن»، - دەدى مەملەكەت باسشىسى.
ق ر پرەزيدەنتى جەردىڭ تۇتاستىعىن قورعاۋ، وتاننىڭ تاۋەلسىزدىگىن قورعاۋ، جان اياماي قىزمەت ەتۋ اسكەري قىزمەتشىلەردىڭ پارىزى ەكەندىگىن ءارى بۇل قىزمەتكە كەلىپ، ۇستىنە اسكەري كيىم كيگەن كەزدە وتان ءۇشىن جانىمدى بەرەمىن دەگەن ويدا بولعاندىقتارىن باسا ايتتى.
«بەرەكە مەن بىرلىگىمىزدىڭ ارقاسىندا اسپانىمىز اشىق، ەلىمىز وركەندەپ-ءوسىپ كەلە جاتىر. سىزدەر بەيبىت ومىردە دە ەرلىككە جول بار ەكەندىگىن كورسەتىپ كەلەسىزدەر. سوندىقتان مەن سىزدەردى ىستەگەن ىستەرىڭىز، قىزمەتتەرىڭىز ءۇشىن ءار سالادا كورسەتكەن ەرلىكتەرىڭىز ءۇشىن بۇگىن ماراپاتتايمىن»، - دەدى ەلباسى.
مەملەكەت باسشىسى بۇگىنگى ماراپاتتالعالى وتىرعان اسكەري قىزمەتشىلەردىڭ وزدەرىنىڭ ازاماتتىق، اسكەري پارىزدارىن ابىرويمەن اتقارىپ جۇرگەندەرىن اتاپ ءوتتى.
«ەل سۇيسىنگەن ەرلىكتەرىڭىز، ەڭبەكتەرىڭىز كەلەر ۇرپاققا ۇلگى-ونەگە بولادى. جاستار سىزدەرگە قاراپ بوي تۇزەيدى. جوعارى مەملەكەتتىك ماراپاتقا يە بولۋ سىزدەر ءۇشىن ۇلكەن ماقتانىش جانە ۇلكەن جاۋاپكەرشىلىك. الداعى ۋاقىتتا دا بۇل سەنىمنىڭ ۇدەسىنەن شىعادى دەپ سەنەمىن»، - دەدى ن. نازاربايەۆ.
اۆتور: مارلان جيەمباي
