فرانسيادا سايلاۋدىڭ ەكىنشى اينالىمى قارساڭىندا «تىنىشتىق كۇنى» ورنادى

استانا. قازاقپارات - فرانسيادا جەرگىلىكتى ۋاقىتپەن تۇنگى ساعات 00.00 دە پرەزيدەنت سايلاۋىنىڭ ەكىنشى اينالىمىنىڭ قارساڭىندا «تىنىشتىق كۇنى» ورنادى.

بۇل ۋاقىتتا سايلاۋدىڭ قورىتىنداسىنا بولجام جاسالعان كەز كەلگەن ماتەريالدى جاريالاۋعا تىيىم سالىنادى. سونداي-اق، سايلاۋالدى ميتينگ وتكىزۋگە بولمايدى.

بۇل تۋرالى France Press حابارلايدى. ەندى تەك داۋىس بەرەتىن كۇن - 7- مامىردا جاڭا مەملەكەت باسشىسىن سايلاۋعا ۇلەس قوساتىن فرانسۋزدىقتاردىڭ ناقتى سانى بەلگىلى بولادى.

الەۋمەتتىك قىزمەتتىڭ بولجاۋىنشا، بۇل جولى سايلاۋشىلار داۋىس بەرۋگە وتە از قاتىسىپ، بەلسەندىلىگى بويىنشا انتيرەكورد ورناتادى.

فرانسيادا ادەتتە پرەزيدەنت سايلاۋى ۇلكەن قىزىعۋشىلىق تۋدىرىپ كەلگەن ەدى. سايلاۋدىڭ ءبىرىنشى اينالىمدا %24,01 داۋىس جيناعان «العا» قوزعالىسىنىڭ باسشىسى ەممانۋەل ماكرون مەن ەلدىڭ %21,3 ازاماتى قولداۋ بىلدىرگەن مارين لە پەن اراسىندا قىزۋ تارتىس ءجۇرىپ جاتىر.