دينارا ءسادۋاقاسوۆا مەن جانسايا ابدىمالىك «ءۇمىت» وردەندەرىمەن ماراپاتتالدى

استانا. قازاقپارات - الماتىدا قازاقستان شاحمات فەدەراتسياسىنىڭ بەسىنشى سەزى ءوتتى.

وندا ايتۋلى جەتىستىكتەرگە جەتكەن شاحمات قايراتكەرلەرىنە فەدەراتسيا تاعايىنداعان قوعامدىق ناگرادالار تابىستالدى، دەپ حابارلايدى قازاقپارات.

سەزگە رەسپۋبليكانىڭ 12 وبلىسىنان جانە استانا مەن الماتى قالالارىنان 60 قا جۋىق دەلەگاتسيا كەلدى.

فەدەراتسيا پرەزيدەنتى عالىمجان ەسەنوۆ قاتىسۋشىلارعا لەبىزىن ءبىلدىرىپ، ءوزى تاعايىندالعان ءبىر جارىم جىل ىشىندەگى جەتىستىكتەرگە توقتالدى.

«ءبىر جارىم جىلدا 16 رەسپۋبليكالىق جانە 5 حالىقارالىق تۋرنير وتكىزدىك. جوسپارعا سايكەس، ەل قۇراماسى بارلىق حالىقارالىق تۋرنيرلەرگە قاتىستى. جانسايا ابدىمالىك پەن دينارا ءسادۋاقاسوۆا فيدە ەرلەر اراسىنداعى حالىقارالىق شەبەرلەر اتاندى جانە دينارا 20 جاسقا دەيىنگى الەم چەمپيونى بولدى. ايشا زاكىروۆا 8 جاسقا دەيىنگى الەم چەمپيونى اتاعىن جەڭىپ الدى، اسەل سەرىكباي ازيانىڭ ءۇش دۇركىن چەمپيونى جانە وقۋشىلار اراسىندا 2017-جىلدىڭ چەمپيونى اتاندى»، - دەدى ع. ەسەنوۆ.

فەدەراتسيانىڭ اتقارۋشى ديرەكتورى يرينا گريشەنكو شاحمات فەدەراتسياسىنىڭ تاريحىندا قوعامدىق ناگرادالار العاش رەت تابىستالىپ وتىرعانىن اتاپ ءوتتى.

«قازاقستان شاحمات فەدەراتسياسى تاريحىندا العاش رەت سپورتشىلارعا، جاتتىقتىرۋشىلارعا، ەنتۋزياستارعا جانە مەتسەناتتارعا قازاقستان شاحمات فەدەراتسياسىنىڭ قوعامدىق ناگرادالارىن تابىس ەتتىك. ءبىز فەدەراتسياداعى جاڭا ءداستۇردىڭ قالىپتاسۋىنا كۋا بولدىق»، - دەدى ول.

اتاپ ايتقاندا، فەدەراتسيانىڭ «دارا» وردەنى ەلدەگى شاحمات سپورتىنىڭ دامۋىنا جانە شاحمات ويىنىنىڭ دارىپتەلۋىنە بەلسەندى ۇلەس قوسقانى ءۇشىن قازاقستاننىڭ ەڭبەك سىڭىرگەن جاتتىقتىرۋشىسى، جوعارى ساناتتاعى ۇلتتىق تورەشى اناتولي نوسكوۆقا بەرىلدى.

«ءۇمىت» وردەنىمەن حالىقارالىق جارىستاردا تابىستارعا قول جەتكىزگەن جانسايا ابدىمالىك پەن دينارا ءسادۋاقاسوۆا ماراپاتتالدى. ولار فيدە حالىقارالىق ەرلەر شەبەرىنىڭ نورماسىن ورىنداعان قازاقستاننىڭ تۇڭعىش شاحماتشىلارى.

«بەلەس» قوعامدىق مەدالى رەسپۋبليكالىق جانە حالىقارالىق ماڭىزى بار تۋرنيرلەر ۇيىمداستىرعانى ءۇشىن جانە شاحمات ويىنىن دارىپتەگەنى ءۇشىن مەتسەنات، «الماتى قالاسى شاحمات فەدەراتسياسىنىڭ» پرەزيدەنتى امانتاي بولەكبايەۆقا بەرىلدى.

«ۇلەس» قوعامدىق مەدالىمەن جەرگىلىكتى جانە رەسپۋبليكالىق ماڭىزى بار تۋرنيرلەردى ۇيىمداستىرعانى ءۇشىن جانە «مەكتەپتەگى شاحمات» باعدارلاماسىن جۇزەگە اسىرۋعا ەلەۋلى ۇلەس قوسقانى ءۇشىن «پاۆلودار وبلىسى شاحمات فەدەراتسياسىنىڭ» پرەزيدەنتى الەكساندر بابەنكو ماراپاتتالدى.

سونداي-اق، «ۇلەس» مەدالىمەن شاحمات سپورتىن دامىتۋعا ۇلەس قوسقانى ءۇشىن قازاقستان شاحمات فەدەراتسياسىنىڭ بالالار جاتتىقتىرۋشىسى گريگوري كيم دە ماراپاتتالدى.

ونىڭ ەكى شاكىرتى شاحماتتان قازاقستاننىڭ قازىرگى قۇراماسىندا ويناپ ءجۇر. «ارداقتى ۇستاز» وزاتتىق بەلگىسى شاحمات سپورتىندا ەلەۋلى ناتيجەلەر كورسەتكەن سپورتشىلاردى دايىنداعانى ءۇشىن ازيانىڭ ءۇش دۇركىن چەمپيونى اتانعان اسەل سەرىكبايدىڭ جەكە جاتتىقتىرۋشىسى ۆاسيلي شيمەلكوۆقا بەرىلدى.

سونىمەن بىرگە، سەزدە قازاقستان شاحمات فەدەراتسياسىنىڭ دوپينگپەن كۇرەس بويىنشا ۇلتتىق وليمپيادا كوميتەتىنىڭ مىندەتتى تالاپتارى ەنگىزىلگەن جاڭا جارعىسى قابىلداندى. جاڭا جارعى جاقىن كۇندەرى فەدەراتسيا سايتىندا جاريالانادى.

اۆتور: ايجان سەرىكجان قىزى