تۇمانبايدان باتا الۋ

استانا. قازاقپارات - بۇل وسىدان ون ءتورت جىل بۇرىنعى اڭگىمە. وندا ءال- فارابي اتىنداعى قازاق ۇلتتىق ۋنيۆەرسيتەتىنىڭ فيلولوگيا فاكۋلتەتىنىڭ ءبىرىنشى كۋرسىندا وقيتىنمىن.

ولەڭنەن باسقا ءومىر بار دەگەنگە سەنبەي ورتەتىپ جۇرگەن شاعىمىز. ءبىر كۇنى فاكۋللەتتە قازاقتىڭ ۇلى اقىنى تۇمانباي مولداعاليەۆپەن كەزدەسۋ وتەدى دەپ حابارلاندى. جىرلارىن جورگەگىمىزدەن جاتتاپ وسكەن، اڭىزداي بولىپ ەلەستەيتىن اقىنمەن كەزدەسۋ كەشىنە ەرەكشە اسىقتىم. شىنىن ايتايىن، تۇمەكەڭدى اڭىزداي كورگەنىم سونشا، ءتىرى بولسا دا ومىردە بار ادامداي ەلەستەتپەيتىنمىن. فاكۋلتەتتىڭ بارلىق ستۋدەنتتەرى جينالعان ۇلكەن زالدا كەزدەسۋ باستالدى. جالپاق جۇرت جىرىنا سۋساعان ءتىرى تۇمانباي الدىمىزدا وتىر. كەزدەسۋدى فاكۋلتەت دەكانى، ادەبيەتتانۋشى عالىم قانسەيىت ابدەز ۇلى جۇرگىزدى. ەلدى بىلمەيمىن، مەنىڭ ەسى- دەرتىم اقىندا، تۇماعاڭدا. ونىڭ ءار سوزىنە تاڭىرقاپ، جىرلارىنا ەلىتىپ وتىرمىن.. .

 جان- جاقتان قويىلعان سۇراقتارعا جاۋاپ بەرىپ، ستۋدەنتتىك شاقتارىنىڭ قىزىعىن اڭگىمە ەتىپ وتىرعان ادامنىڭ تۇمانباي ەكەنىنە سەنگىڭ كەلمەيدى. ەندى- ەندى قولىمىزعا قالام الىپ، جىر الەمىنە جورىق باستاعان مەنىڭ مىناۋ قازاق پوەزياسىنىڭ اڭىزىمەن كەزدەسۋ ءساتتىڭ باقىتى ءالى كۇنگە ەسىمدە.. . كەزدەسۋدىڭ ورتا تۇسىندا ءوز وزىمە ەرىك بەردىم، بايقاسام شىداپ وتىراتىن جاعدايىم جوق. قويىن داپتەرىمدى الا سالا، تىلكىمدەي بۇرىشىنا «مەن تۇمانباي اتاعا ولەڭ وقىپ، باتاسىن العىم كەلەدى» دەپ جازىپ، جەدەلحاتىمدى دەكانعا جونەلتتىم. ارادا از ۋاقىت وتكەسىن، قانسەيىت اعاي «ءبىزدىڭ فاكۋلتەتتىڭ ءبىرىنشى كۋرس ستۋدەنتى، جولىڭىزدى قۋعان جاس اقىن تالاپبەك تىنىسبەك ۇلى دەگەن بالاڭىز، سىزگە ولەڭ وقىپ، باتاڭىزدى العىسى كەلەدى» دەپ مەنى شاقىردى، زال دۋ قول شاپالاقپەن باسىلدى، جالىنداپ تۇرعان شاعىمىز، جۇگىرىپ ساحناعا شىقتىم. اتا جوسىنىمەن سالەمدەسىپ العاسىن، قالامىمنان تۋعان جىرلارىمدى جاتقا سوعاتىن داعدىلى ادەتىم بويىنشا بىردەن ولەڭدى زۋلاتتىم، باسقاشا ويلاۋعا جۇرەگىم داۋالاماعان بولار. سوندا وقىعان ولەڭىم: كۇزىنەن ءومىر قورقامىن

 قوڭىر كۇز باقتىڭ قۇشاعى،

 سۇرەڭسىز سونداي قۇسالى.

كوركىنىڭ قالماي نىشانى،

گۇلدەردەن توزاڭ ۇشادى.

 كۇن ساناپ سولدى ەككەن گۇل،

 قاسىرەت ەدى نەتكەن بۇل؟ !

كورىككە قۇمار كوبەلەك،

قۋرايعا قونباي شەتتەپ ءجۇر.

سوراتىن شىرىن قادالا،

كورىنبەيدى ەشبىر بال ارا.

جايقالعان گۇلدىڭ ورىنىن،

 جاپىراق باسقان سارى الا.

تابيعات كۇزگى ارپالىس،

تىربانعان تىرلىك سارقا كۇش.

ءۇزىلىپ تۇسكەن جاپىراق،

ىزدەيدى باقتان قالتارىس.

سالمادى بۇلبۇل شالقىپ ءان،

ءيسى جوق گۇلدىڭ اڭقىعان.

توڭىرەك تولى مول تۇمان،

جەلمەنەن ۇشىپ قالقىعان.

سىيلاعان باققا ءنار ءسانىن،

 كەلەر دەپ كوكتەم جورتامىن.

 تانىتسا تىرلىك تارپاڭ ءۇن،

كۇزىنەن ءومىر قورقامىن.. .

اتاقتى اقىننىڭ دەسى باسىپ تۇردى بىلەم، اراسىندا كىدىرىپ قالىپ تۇردىم. ولەڭ اياقتاپ، زال قوشامەتىنەن كەيىن تۇمانباي اتا اسىقپاي ورنىنان تۇرىپ، ماعان بۇرىلىپ، «كەلە عوي، اكەل ماڭدايدى» دەپ شەكەمنەن ءسۇيىپ، قۇشاعىنا باستى. سودان كوپشىلىككە قاراپ « ءسوز تانيتىنىم راس بولسا، مىقتى اقىن بولادى، كوپ ىزدەنۋ، وقۋ كەرەك، بەردىم باتامدى» ، - دەدى. مەن ىشىمنەن كۇبىرلەپ، بەتىمدى سيپادىم. كەيىننەن تۋرا وسىنداي جاعداي استانادا 2011 -جىلعى دۇنيەجۇزى قازاقتارىنىڭ قۇرىلتايىندا قايتالاندى. وندا دا جينالعان جۇرتتىڭ كوزىنشە ماڭدايىمنان ءسۇيىپ، باتاسىن بەردى ءارى «الماتىعا بارعاسىن حابارلاس، كىتابىڭدى ءوزىم شىعارىپ بەرەم» ، - دەدى. سول جىلى كۇزدە ۇلكەن ءۇيىمدى اتاجۇرتقا كوشىرىپ، قونىستىڭ قامىمەن جۇرگەنىمدە تۇماعام ءيت ۇرمەسكە تارتىپ بەردى.. . كىتابىڭدى شىعارىپ بەرەمىن دەپ تە ەشكىم ايتپادى.. ..

تالاپبەك تىنىسبەك ۇلى ءال- فارابي اىتىنداعى قازاق ۇلتتىق ۋنيۆەرسيتەتتىڭ فيلولوگيا فاكۋلتەتىنىڭ 2007 -جىلعى تۇلەگى