تانىمال قازاقستاندىق ءانشى جاننا ساتتاروۆا قايتىس بولدى

استانا. قازاقپارات - بۇگىن تانىمال قازاقستاندىق ءانشى، دجاز اندەرىن ورىنداۋشى جاننا ساتتاروۆا باقيلىق بولدى، دەپ حابارلايدى «قازاقپارات» ح ا ا ءتىلشىسى.

 بۇل تۋرالى ءانشىنىڭ اپكەسى گاۋھار ساتتاروۆا ءمالىم ەتتى. «جاننوچكا قايتىس بولدى»، - دەپ جازدى ول ءوزىنىڭ Facebook پاراقشاسىنا.

 2014 -جىلدىڭ قازان ايىندا جاننا ساتتاروۆا قاتەرلى ىسىك دەرتىنە شالدىققان ەدى. ءانشىنىڭ ءوزى اۋرۋدىڭ سوڭعى ساتىلارىندا انىقتالعانىن ايتتى. 2016 -جىلدىڭ اقپان ايىندا ول بۇكىل الەمدىك قاتەرلى ىسىككە كۇرەس كۇنىنە ارنالعان باسپا ءسوز ءماسليحاتىنا قاتىستى.

جانناعا كومەك بەرۋ ءۇشىن قازاقستاندىق دجاز حانشايىمىنىڭ دوستارى مەن جاقىندارى قايىرىمدىلىق كونسەرتتەرىن ۇيىمداستىردى. اتاپ ايتقاندا، 2017 -جىلدىڭ اقپان ايىندا ءانشىنىڭ ەمىنە قاراجات جيناۋ ءۇشىن قايىرىمدىلىق جارمەڭكەسى ۇيىمداستىرىلدى، وعان قازاقستاندىق ەسترادانىڭ تانىمال ارتىستەرى قاتىستى. جاننا وڭتۇستىك كورەيا مەن فرانسيادا ەم قابىلدادى، ايتسە دە اۋىر دەرت الماي قويمادى. جاننا ساتتاروۆا قازاقستانداعى جانە شەت مەملەكەتتەردەگى دجاز اۋەسقويلارى اراسىندا كەڭىنەن تانىمال ەدى.