11:20, 04 - مامىر 2017 | GMT +5
ەكسپو كەزىندە كەيبىر كولىكتەر ءۇشىن شەكتەۋ ەنگىزىلەدى
استانا. قازاقپارات - استانا قالالىق ىشكى ىستەر دەپارتامەنتى اكىمشىلىك پوليتسيا باسقارماسىنىڭ مالىمەتىنە سايكەس، ەكسپو كورمەسى كەزىندە ەسىلدىڭ سول جاعالاۋىنداعى ءتورت كوشەدە ءبىرقاتار شەكتەۋلەر ەنگىزىلەدى، دەپ حابارلايدى قازاقپارات ءتىلشىسى.
«ەكسپو-2017» حالىقارالىق كورمەسىن وتكىزۋ كەزىندە قالامىزدىڭ ەكولوگيالىق جاعدايىنا جاعىمسىز اسەر ەتەتىن دەرەكتەردى بولدىرماۋ ماقساتىندا قابانباي باتىر داڭعىلى، ماڭگىلىك ەل، ۇلى دالا، كەرەي-جانىبەك حاندارى مەن تۇرار رىسقۇلوۆ كوشەلەرى بويىمەن جۇك كولىكتەرىنىڭ قوزعالىسىنا شەكتەۋ ەنگىزىلەدى. نەگىزگى ماقسات - كولىك قۇرالدارىنىڭ كەپتەلىسىن تومەندەتۋ جانە جول قاۋىپسىزدىگىن قامتاماسىز ەتۋ»، - دەلىنگەن باسقارمانىڭ رەسمي حابارلاماسىندا.
ايتا كەتەيىك، جاقىن ارادا ەلورداداعى «نۇرجول» بۋلۆارىندا كولىكتى جولدىڭ بويىندا قالدىرۋعا تىيىم سالىنادى. ول جەردە تەك اقىلى اۆتوتۇراقتار بولادى. بۇدان بولەك، الداعى ۋاقىتتا استانانىڭ 24 كوشەسىندە اۆتوبۋس جولاقتارىن ەنگىزۋ جوسپارلانعان.
اۆتور: ارمان اسقاروۆ
