قانداي سۋسىندار جۇرەك جۇمىسىن بۇزادى
ەنەرگەتيكالىق سۋسىندار ەمتيحانعا دايىندالىپ جۇرگەن ستۋدەنتتەرگە، جۇمىسىن ۋاقىتىندا تاپسىرىپ ۇلگەرمەي جۇرگەن قىزمەتكەرلەرگە، سپورتتىق رەكوردتارعا ۇمتىلعان سپورتشىلارعا، شارشاعان جۇرگىزۋشىلەر مەن تۇنگى كلۋب قىدىرمالارىنا ناعىز قۇتقارۋشى بولدى.
سۋسىننىڭ ءبىر قۇتىسىنان بار شارشاعانىڭىز كەتىپ، ۇيقى قىسۋ باسىلىپ، جاڭا ارەكەتتەرگە دايىن بولاسىز.
ەنەرگەتيكالىق سۋسىنداردىڭ زيانى جايلى ەستىسەك تە، ولاردىڭ ناقتى قانداي زيانى بار ەكەنىن بىلە بەرمەيمىز. ال دۇكەندەردە بۇل عاجايىپ سۋسىننىڭ ەركىن تارالۋى مەن قولجەتىمدىلىگى دەنساۋلىققا الاڭداماۋعا بولاتىنداي اسەر بەرەدى.
ەنەرگەتيكالىق سۋسىندار الەمدەگى ەڭ زياندى سۋسىنداردىڭ ءبىرى.
ولار ءتىپتى قۇرامىندا كوفەين بار سۋسىنداردان دا قاۋىپتى.
مۇنى كاليفورنياداعى ترەۆيس اۋەبازاسىنىڭ اسكەري قىزمەتكەرلەرىنە زەرتتەۋ جۇرگىزگەن امەريكالىق كارديولوگتار دالەلدەپ وتىر. قىزمەتكەرلەردىڭ %75 ەنەرگەتيكالىق سۋسىندار ىشكەن. كارديولوگتار زەرتتەۋگە قاتىسقان ەرىكتىلەردى ەكى توپقا ءبولىپ، بىرىنشىسىنە تەك ەنەرگەتيكالىق سۋسىندار، ەكىنشىسىنە قۇرامىندا كوفەين بار سۋسىن بەرگەن.
ەنەرگەتيكالىق سۋسىن ىشكەندەردە QT ينتەرۆالىنىڭ 10 ميلليسەكۋندقا ۇزارعانى بايقالعان. بۇل جۇرەك قاعىسىنىڭ ارالىعىنداعى ءۇزىلىس. وسى ءۇزىلىس نە تىم قىسقا، نە تىم ۇزاق بولسا جۇرەك جۇمىسى بۇزىلادى. بۇل ادام ومىرىنە ءقاۋىپ توندىرەدى. زەرتتەۋ اۆتورى ەميلي ا. فلەتچەر ەنەرگەتيكالىق سۋسىندار قۇرامىندا جۇرەك - قان تامىر جۇيەسىنە قاۋىپتى زاتتار بار دەيدى.
