بوكسشى ەرجان جومارت ازيا بىرىنشىلىگىندە ءبىرىنشى قارسىلاسىن ۇتتى
بۇل تۋرالى قازاقستاننىڭ بوكس فەدەراتسياسىنىڭ باسپا ءسوز قىزمەتى حابارلادى. 49 كەلى سالماق دارەجەسىندە شارشى الاڭعا شىعىپ جۇرگەن ەرجان جومارت چەمپيوناتتىڭ شيرەك فينالىنا شىققان جەڭىسى تۋرالى قىسقاشا ايتىپ بەردى: «تايپەي سپورتشىسىنا قارسى جەكپە-جەك وڭايعا سوقپادى. الايدا مەن وزىمە سەنىمدى بولدىم، بارلىق ويلارىمدى ءساتتى ىسكە اسىرا الدىم».
- باپكەرلەردىڭ ايتقاندارىن تولىق ورىنداي الدىڭ با؟
- ارينە، ءجۇز پايىز ورىندالدى.
- كەلەسى قارسىلاسىڭ وزبەكستاندىق حاسانبوي دۋسماتوۆ بولادى.
- ول رەيتينگتە ءبىرىنشى بولىپ تۇر. وڭايعا سوقپاسى انىق، الايدا جەڭۋ ءۇشىن بارىمدى سالامىن. اقىلمەن ىسكە كىرىسۋ كەرەك. ول دا ادام، دۋسماتوۆتىڭ دا ءالسىز تۇستارى بولۋى ءتيىس.
- ءوز سالماق دارەجەڭدە كىم ۇزدىك دەپ ويلايسىڭ؟
- وسىندا ازيانىڭ ەڭ مىقتى بوكسشىلارى جينالعان. ولار ءوز ەلدەرىندە ءبىرىنشى ورىندا تۇر. سوندىقتان ازيا بىرىنشىلىگىندە ءالسىز قارسىلاس جوق دەسە دە بولادى.
دانيار مايلىبايەۆتىڭ فوتوسى
اۆتور: جانىبەك امانگەلدى
