گەرمانيادا شۆەيتساريالىق تىڭشى ۇستالدى
گەرمانيا بيلىگى ونى 2012 -جىلدان بەرى گ ف ر اۋماعىندا تىڭشىلىق قىزمەت اتقارعان دەپ ەسەپتەيدى. بۇل تۋرالى Deutsche Welle حابارلايدى.
پروكۋراتۋرا بۇل دەرەكتەردى 28 -ءساۋىر كۇنى جاريالادى. 30 - ساۋىردە ءىستىڭ جاي- جاپسارى باياندالادى، دەپ جازدى Die Welt باسىلىمى.
گازەتتىڭ جازۋىنشا دانيەل م. شۆەيتساريالىق بارلاۋ قىزمەتكەرى جانە ول بىرنەشە جىلدان بەرى گەرمانيادا جۇمىس ىستەپ، قارجىلىق، بانك سەكتورى تۋرالى اقپارات جيناعان. ونى گ ف ر اۋماعىنا گەرمانيالىق سالىق ورگاندارى گەرمانيالىق كليەنتتەر تۋرالى دەرەكتەر ساقتالعان شۆەيتساريالىق بانكتەردىڭ مالىمەتتەر قورىن ساتىپ الا باستاعاندا جىبەرگەن. وسىلايشا گەرمانيا بيلىگى سالىقتان جالتارۋشىلارمەن كۇرەستى. شۆەيتساريالىق تىڭشىنىڭ مىندەتى مالىمەتتەر قورىن ساتىپ الۋمەن اينالىساتىن ادامداردى انىقتاۋ ەدى.
نەمىس وڭىرلىك بيلىگى 2006 -جىلى سالىق تولەمەۋشىلەر تۋرالى اقپارات ءۇشىن اقشا تولەۋدى باستادى. اتاپ ايتقاندا، ولار شۆەيتساريالىق بانكتەردەگى نەمىس كليەنتتەرى تۋرالى مالىمەتتەر قورىنا ميلليونداعان ەۋرو جۇمسادى.
ءبىر جاعىنان بۇل ۇدەرىسكە نەمىس بارلاۋ قىزمەتى دە ارالاسقان. نەمىس سالىق ورگاندارىنىڭ ارەكەتىنەن گەرمانيا مەن شۆەيتساريا اراسىندا ديپلوماتيالىق كيكىلجىڭ تۋىنداعان، ءتىپتى شۆەيتساريالىق بيلىك نەمىس سالىق ورگاندارىنىڭ بىرنەشە قىزمەتكەرىن قاماۋعا الۋ تۋرالى وردەر بەردى.
