استانا اكىمى فەيسبۋكتە سەنبىلىككە قاتىسقان جۇرتشىلىققا العىس ايتتى
«قالانى تازالاۋعا كەلگەن بارلىق مەملەكەتتىك مەكەمە قىزمەتكەرلەرىنە، ۇكىمەتتىك ەمەس ۇيىم وكىلدەرىنە، كاسىپورىندار مەن مەكەمەلەردەن قاتىسقان ازاماتتارعا، ارداگەرلەر مەن زەينەتكەرلەرگە، بارلىق كوممۋنالدىق قىزمەت وكىلدەرىنە، جاستارعا، ەلوردا تۇرعىندارى مەن قالا قوناقتارىنا ۇلكەن العىس ايتقىم كەلەدى! استانا - سىزدەردىڭ ارقالارىڭىزدا كوركەيىپ كەلەدى»، - دەپ جازدى اكىم فەيسبۋكتە.
اكىمدىكتىڭ باسپا ءسوز قىزمەتى تاراتقان اقپاراتقا سايكەس، بۇگىن قالا سىرتىنداعى پوليگونعا 952,08 توننا قوقىس شىعارىلدى. ەسىل، اقبۇلاق جانە سارىبۇلاق وزەندەرىنىڭ ارنالارى تازارتىلدى. «كوكتەمگى ەكولوگيالىق سەنبىلىككە 127 مىڭ ادام، سونداي-اق 4622 كاسىپورىن، ۇيىم جانە مەكەمە، سونىڭ ىشىندە 44 ج و و جانە ارنايى ورتا ءبىلىم مەكەمەسى، 146 مەكتەپكە دەيىنگى جانە جالپى ءبىلىم بەرۋ مەكەمەسى، 74 دەنساۋلىق ساقتاۋ مەكەمەسى، 161 مەملەكەتتىك مەكەمە، ۆەدومستۆولار مەن ۇلتتىق كومپانيالار قاتىستى»، - دەلىنگەن وندا.
اۆتور: ميرا تولەندى قىزى
