قالانىڭ ەسكى بولىگىن نازاردان تىس قالدىرمايمىز - يسەكەشيەۆ

استانا. قازاقپارات - بۇگىن استانادا جالپى قالالىق سەنبىلىك ءوتتى. وعان قالا اكىمى اسەت يسەكەشيەۆ تە قاتىستى. ونىڭ ايتۋىنشا، ەلوردادا اعاشتار كوپتەپ وتىرعىزىلاتىن بولادى. وسى جولى دا مىڭداعان كوشەت ەگىلدى،

 دەپ حابارلايدى قازاقپارات ءتىلشىسى.

 «بۇگىندە ءبىز قالانىڭ ەسكى بولىگىندە ورنالاسقان 19 ساياباقتى اباتتاندىرۋدى باستادىق. ول جەردە بالالار وينايتىن الاڭدار، سپورتتىق ترەناجەرلار بولادى. سوسىن پرەزيدەنت قالانىڭ ىشىندە جاسىل جەلەكتى كوبەيتۋدى تاپسىردى. بۇدان بولەك، قالا سىرتىنداعى جاسىل بەلدەۋدى دە قوسۋ قاجەت. وسىنىڭ ارقاسىندا كليماتتى بارىنشا جاقسارتۋعا بولادى. ءبىز جىل سايىن وتىرعىزاتىن اعاش كوشەتتەرىنىڭ سانىن ارتتىراتىن بولامىز»، - دەيدى يسەكەشيەۆ.

 ايتا كەتەيىك، بۇگىنگى سەنبىلىك كەزىندە شامامەن  6750 اعاش وتىرعىزىلدى. شارا اياسىندا «تازا وزەندەر!» ەكولوگيالىق اكسيالارى ۇيىمداستىرىلىپ، ەسىل، اقبۇلاق پەن سارىبۇلاق وزەندەرىنىڭ ارنالارى قوقىس پەن تۇرمىستىق قالدىقتاردان تازارتىلادى. جالپى، استاناداعى كوكتەمگى ەكولوگيالىق ايلىق اياسىندا 29 - ءساۋىر مەن 13 - مامىر ارالىعىندا «ءبىز - تازا قالا ءۇشىن!» جالپى قالالىق سەنبىلىكتەردى وتكىزۋ كوزدەلىپ وتىر. بۇگىن قازاقپارات ءتىلشىسى دەپۋتاتتاردىڭ سەنبىلىگىن كورىپ قايتتى. سول جەردە حالىق قالاۋلىلارى سەنبىلىكتى اسارمەن الماستىرۋ باستاماسىنا قاتىستى ءوز ويلارىمەن ءبولىستى.

 اۆتور: ارمان اسقاروۆ