ەسترادا جۇلدىزدارى سەنبىلىككە شىقتى
سەنبىلىك كەزىندە تەاتر جانە كينو اكتەرلارى نۇركەن وتەۋىلوۆ، قۋاندىق قىستىقبايەۆ، ەسترادا جۇلدىزدارى دوسىمجان تاڭاتاروۆ، نۇرعالي تۇرلىبەكوۆ، رينات مالتساگوۆ، «دابىل» توبى جانە تاعى باسقا تانىمال ازاماتتار ەسىل وزەنىنىڭ جاعاسىن جيناپ شىقتى.
«ءبىز ءوز قالامىزدى جاقسى كورەمىز. سوندىقتان سەنبىلىككە شىعىپ، جاستارعا ۇلگى كورسەتكەندى ءجون كوردىك. نەگىزى، ادامدى ادام ەتكەن ەڭبەك قوي. سول سەبەپتى جىلىنا بىرنەشە رەت وسىلاي ءارقايسىمىز سەنبىلىككە شىقساق، ءسوز جوق، استانانىڭ گۇلدەنۋىنە ۇلەس قوسا الامىز»، - دەيدى ءانشى دوسىمجان تاڭاتاروۆ.
«قالانى تازا قىلايىق!» ەكولوگيالىق اكسياسىنا استانانىڭ بارلىق شىعارماشىلىق ۇجىمدارى قاتىستى. ولاردىڭ ىشىندە استانالىق سيرك، قازاق دراما تەاترى، ورىس دراما تەاترى، «ناز» بي تەاترى، فيلارمونيا، بەيبىتشىلىك جانە كەلىسىم سارايى، تاۋەلسىزدىك سارايى، «جاستار» سارايى، قالالىق كىتاپحانالار مەن باسقا دا شىعارماشىلىق ۇجىمدار بار.
«استانا - ءبىزدىڭ ورتاق ءۇيىمىز، ال قالانىڭ مادەنيەت باسقارماسىندا ىستەيتىن ادامدار - ءبىزدىڭ ارىپتەستەر، سوندىقتان ءبىز ءوز قالامىزدى جانە دوستارىمىزدى قولداۋعا كەلدىك» - دەيدى رينات مالتساگوۆ.
ايتا كەتەيىك، بۇگىنگى جالپى قالالىق سەنبىلىككە دەپۋتاتتار دا شىقتى. سول جەردە حالىق قالاۋلىلارى سەنبىلىكتى اسارمەن الماستىرۋ باستاماسىنا قاتىستى ءوز ويلارىمەن ءبولىستى. ال استانادا اكىمى اسەت يسەكەشيەۆ قالانىڭ ەسكى بولىگىن نازاردان تىس قالدىرماۋعا ۋادە بەردى.
اۆتور: ارمان اسقاروۆ
