سولتۇستىك كورەيانىڭ ىشكى ءومىرى تۋرالى شىندىق - فوتو

استانا. قازاقپارات-  سولتۇستىك كورەيا مەن ا ق ش اراسىنداعى شيەلەنىس الەمدىك ب ا ق- تىڭ نازارىن اۋدارىپ وتىر. بۇل كۇندە كۇللى الەم سولتۇستىك كورەياعا كوز تىكتى. شىنىندا ىشكى ءومىرى قۇپيا سانالاتىن سولتۇستىك كورەيا تۋرالى نە بىلەمىز؟

وسى ماتەريالدا ەل استاناسى پحەنيان مەن باسقا دا قالالاردىڭ تىنىس- تىرشىلىگىمەن تانىستىرماقپىز.

 ءبىر انىعى مۇندا شەتەلدىكتەرگە قالادا ەمىن- ەركىن جۇرۋگە جانە سۋرەتكە تۇسىرۋگە تىيىم سالىنعان. سوندىقتان سولتۇستىك كورەيادا بارلىق قوناقتارمەن بىرگە جول كورسەتۋشىلەر ىلەسە جۇرەدى. سۋرەتتەردىڭ بارلىعى شىنايى ما، الدە، ارنايى جاسالعان كورىنىس پە بەلگىسىز. ءبىراق ءار سۋرەتكە زەر سالا قاراساق ناعىز سولتۇستىك كورەيانى كورۋىمىز مۇمكىن.

 

پحەنيان. ساۋلەتى مەن كولىك جۇيەسى

سولتۇستىك كورەيا استاناسى قازىرگى كوشباسشى كيم چەن ىننىڭ بيلىگى تۇسىندا قاتتى وزگەردى. كحدر كوشباسشىسى كوپتەگەن جاڭا اۋدانداردى تۇرعىزدى. سوڭعى تۇرعىن ءۇي كەشەنىنىڭ اشىلۋى كۇن كۇنىنە، ياعني، كيم ير سەننىڭ تۋعان كۇنى 15 - ساۋىرگە سايكەس تۇسكەن بولاتىن.

 

رەمەن كوشەسىندەگى جاڭا كەشەن كوپتەگەن ءزاۋلىم عيماراتتاردان تۇرادى. بۇل كەشەندى سالۋعا ءبىر جىل ۋاقىت كەتكەن. سولتۇستىك كورەيا بيلىگىنىڭ ايتۋىنشا، بۇل كوشەدەگى پاتەرلەر عالىمدارعا، وقىتۋشىلارعا جانە ەرەكشە كوزگە تۇسكەن مەملەكەت قىزمەتكەرلەرىنە بەرىلەدى.

 

ەگەر وتكەن عاسىردىڭ عيماراتتارى كەڭەس وداعىن ەسكە تۇسىرەتىن بولسا، جاڭا تۇرعىن ءۇي كەشەندەرى ميلليونداعان تۇرعىنى بار قىتاي اۋداندارىنا ۇقساس.

 

سولتۇستىك كورەيانىڭ ءبىر ماسەلەسى - جارىقپەن قامتاماسىز ەتۋ. سوندىقتان تۇرعىن ۇيلەردە جارىقتى بىرنەشە ساعاتقا ءوشىرىپ تاستايدى. ءار پاتەردە اۆتوماتتى تۇردە جۇمىس ىستەيتىن ەلەكتر اجىراتقىشتارى بار. سول سەبەپتى قالاداعى جارىق ءبىر ۋاقىتتا جانىپ، ءوشىپ وتىرادى.

پحەنياندا ءتورت ميلليونعا جۋىق ادام ءومىر سۇرەدى. باسقا قالالار مەن اۋىل تۇرعىندارى استاناعا ارنايى رۇقساتسىز كىرە المايدى.

 

 استاناعا جوعارعى وقۋ ورىندارىنا تۇسەتىن مەكتەپ وقۋشىلارىنان باسقا ەشكىم كوشىپ كەلە المايدى. سوعان قاراماستان سولتۇستىك كورەيادا جوعارى وقۋ ورىندارىنىڭ سانى كوپ. ەل حالقىنىڭ التىدان ءبىرى جوعارى ءبىلىم الا الادى.

 قالادا ەكى مەتروپوليتەن جۇمىس ىستەسە دە، تۋريستەردىڭ وندا جۇرۋىنە جاقىندا عانا رۇقسات ەتىلدى.

 

 قالادا ترامۆاي مەن تروللەيبۋستار بار. تۇرعىنداردىڭ باسىم بولىگىندە جەكە كولىك جوق. سوندىقتان كوپشىلىك ۆەلوسيپەدپەن جۇرەدى.

قالا تۇرعىندارى ۇيالى تەلەفون مەن گادجەتتەردى پايدالانادى. ءبىراق سولتۇستىك كورەيا جاھاندىق عالامتور جەلىسىنە كىرمەيدى. ەل ىشىندە ءوزىنىڭ عالامتورى بار.

ويىن- ساۋىق، دۇكەندەر مەن اس- اۋقات

 

 سولتۇستىك كورەيانى زەرتتەپ جۇرگەن مامان، كۋكمين ۋنيۆەرسيتەتىنىڭ پروفەسسورى اندرەي لانكوۆ بۇل ەلدە جەكە كاسىپكە زاڭ بويىنشا رۇقسات بەرىلمەسە دە، قارقىندى دامىپ جاتقانىن ايتادى.

 

1950- جىلدارى كيم ير سەننىڭ كەزىندە نەگىزگى ازىق- تۇلىك پەن تۇتىنۋ تاۋارلارى ارنايى كارتوچكالارمەن تاراتىلعان. ءبىراق 90 -جىلدارى كەڭەس ۇكىمەتىنىڭ كومەگى توقتاعاننان كەيىن سولتۇستىك كورەيا ەكونوميكالىق داعدارىسقا ۇشىرادى.

 

 ك ح د ر- دا اشارشىلىق 1995 -جىلى باستالىپ، تەك 2000 -جىلدارى اياقتالدى. ءار ءتۇرلى مالىمەتتەرگە سايكەس، اشارشىلىق كەزىندە ءبىر ميلليونعا جۋىق ادام قايتىس بولعان.

كەيىن، XXI عاسىردىڭ باسىندا كوپتەگەن تۇرعىندار جاسىرىن ساۋدا- ساتتىقپەن اينالىسسا، ۋاقىت وتە كەلە بيزنەس ءوسىپ، قوناقۇيلەر مەن مەيرامحانالار پايدا بولدى.

 

سولتۇستىك كورەيادا بيزنەستىڭ بار ەكەنىن بي- بي- سي دالەلدەگەن بولاتىن. 2016 -جىلى بريتاندىق جۋرناليستەر پحەنيان قالاسىندا كوپتەگەن ساۋدا- ساتتىق ورىندارى بارىن انىقتاعان.

 

پحەنياندا ويىن- ساۋىق پاركتەرى، اتتراكسيوندار، حايۋاناتتار باعى، باسسەيندەر، كافە مەن مەيرامحانالار بار. سونىمەن قاتار تۇستەر مەن سىراعا ارنالعان فەستيۆالدەر ۇيىمداستىرىلادى. سولاردىڭ بىرىندە بي- بي- سي جۋرناليستەرى جەرگىلىكتى ستۋدەنتتەرمەن پىكىرلەسكەن.

 

كيم چەن ىن پحەنيانعا جاقىن جەردە تاۋ- شاڭعى كۋرورتىن سالۋعا بۇيرىق بەرگەن. سولتۇستىك كورەيادا قۇرىلىس جانە باسقا دا ءتۇرلى جۇمىستارمەن ساربازدار اينالىسادى. شەتەل ازاماتتارىنا كۋرورتتا دەمالۋعا رۇقسات ەتىلگەن.



دەرەككوز: korrespondent.net