ءدىن ىستەر كوميتەتى تۇمشالانعان كيىم جايلى: ادەتتە ايەلدەر ءوز ەركىمەن كيمەيدى، كۇيەۋلەرى مىندەتتەپ قويادى
«مەملەكەت باسشىسى كەشە باس ءمۇفتي مەن يمامدارعا ايتقان مىندەتتەرگە بايلانىستى ناقتى تاپسىرمالار بولادى. ءبىز وسى ماسەلەنى قاراستىرامىز، باستاپقى كەزدە زاڭناما بازامىزدى، حالىقارالىق تاجىريبەنى تۇگەلدەي زەرتتەيمىز، قازىر نەگە جانە قالاي تىيىم سالىناتىنى جايلى ايتۋ قيىن. قازىرگى ۋاقىتتا مينيسترلىك ءدىني قاتىناستار سالاسىن رەتتەيتىن زاڭ جوباسىن ازىرلەپ جاتىر، مىنە، وسى زاڭ جوباسىنىڭ اياسىندا ءبىز نەنى، قالاي جانە قانداي دەڭگەيدە شەكتەۋدى نەمەسە رەتتەۋدى ويلاسامىز»، - دەدى سپيكەر.
كۇلەكەيەۆ بۇل ماسەلەنىڭ بۇگىن عانا تۋىنداماعانىن، قوعامنىڭ وسى ماسەلەگە نازار اۋدارۋدى تالاپ ەتكەنىن ايتىپ ءوتتى. «ادامدار ءدىني سەبەپتەن يا باسقا ءبىر سەبەپتەن وسى ءبىر تۇمشالانعان كيىمدى كيىپ، ايەلدەرىمىز بەتىن تولىق جاۋىپ، ەرلەر ەلگە جاريا تۇردە ساقال وسىرەدى - بۇل جايدان- جاي جاسالمايدى عوي. بۇل ادامنىڭ ءوزى ءۇشىن جانە بەيبىت سيپات السا، بۇعان ەشكىم نازار اۋدارمايتىن ەدى. سالافيتتەرگە ءتان ساقال قويىپ، بالاق قىسقارتىپ، بۇل وبرازدى باسقالارعا تاڭادى، بۇل ءوز كەزەگىندە قوعامدا نارازىلىق تۋعىزادى، سەبەبى ءداستۇرلى قۇندىلىقتار مەن ومىرگە دەگەن كوزقاراستى جويادى»، - دەيدى ول.
«بۇل ساقتىقپەن قارايتىن ماسەلە، وڭاي ەمەس. قوعام پىكىرى تالقىلانادى. بۇل ماسەلە وڭاي شەشىلەدى دەپ ويلامايمىن، سەبەبى بەلگىلى ءبىر مۇددەلەر مەن ازاماتتاردىڭ قۇقىعىنا قاتىستى، مەنىڭشە، ءتيىمدى شەشىم جاسايمىز. ادەتتە مۇنداي قۇجاتتار كۇزدە شىعادى. قازاندا شىعار، ۇكىمەتكە جوبامىزدى ۇسىنامىز»، - دەدى ول.
«بۇل ماسەلەمەن قازاقستان عانا ەمەس، الەمدىك قاۋىمداستىق وسى ماسەلەمەن بەتپە-بەت كەلدى، ءدىندى ساياساتپەن بايلانىستىرادى، سىرتقى كەلبەت ادامنىڭ رۋحاني قالپىنان جوعارى قويىلادى. ماسەلەن، ەۋروپا پاراندجا مەن نيكابقا تىيىم سالدى. ءبىز دە وسى ماسەلەمەن اينالىسامىز، بارلىعى دا قابىلدانعان باسىم داستۇرلەردىڭ مۇددەسىنە ساي بولۋى ءتيىس»، - دەدى كۇلەكەيەۆ.
«پرەزيدەنت قارا كيىمگە، تۇمشالانعاندارعا نازار اۋداردى، ياعني ايەل تولىقتاي تولىقتاي جابىق بولۋى كەرەك دەگەن ماسەلەگە قاتىستى پىكىر ايتتى. بەلگىلى ءبىر دەڭگەيدە بۇل ايەلدەردىڭ بەلگىلى ءبىر قۇقىعى مەن بوستاندىعىن شەكتەيدى - ادەتتە ايەلدەر ءوز ەركىمەن كيمەيدى، كۇيەۋلەرى مىندەتتەپ قويادى»، - دەپ مالىمدەدى ول.
ايتا كەتەيىك، كەشە، 19 -ساۋىردە نۇرسۇلتان نازاربايەۆ قازاقستان مۇسىلماندارى ءدىني باسقارماسى وكىلدەرىمەن كەزدەسۋىندە قىسقا بالاق پەن ۇزىن ساقالدىڭ ءبىزدىڭ داستۇرگە ساي كەلمەيتىنىن ايتىپ، مۇندايعا زاڭ جۇزىندە تىيىم سالۋدى ۇسىنعاەن ەدى.
«ءدىني ساۋاتسىزدىعىنىڭ ناتيجەسىندە جاستارىمىز ساقال قويىپ، شالبارىنىڭ بالاقتارىن قىسقارتىپ تاستايدى. قارا كويلەك كيىپ، بەتى-اۋزىن تۇمشالاعان قىزدارىمىزدىڭ قاتارى كوبەيدى. بۇل ءبىزدىڭ داستۇرىمىزگە دە، حالقىمىزعا دا جات. بۇعان زاڭنامالىق دەڭگەيدە تىيىم سالۋ ماسەلەسىن پىسىقتاۋ كەرەك. قازاق قارا كيىمدى قارالى كەزدە عانا كيەدى»، - دەگەن ەدى مەملەكەت باسشىسى.
