ماوري تايپاسى قازاقستاننىڭ جاڭا زەلاندياداعى ەلشىسىن قارسى الدى - فوتو
19 -ءساۋىر كۇنى ۆەللينگتوندا (جاڭا زەلانديا) قازاقستاننىڭ سينگاپۋرداعى جانە جاڭا زەلاندياداعى ەلشىسى ۇسەن سۇلەيمەن جاڭا زەلانديانىڭ گەنەرال- گۋبەرناتورى پەتسي رەدديگە سەنىم گراموتاسىن تاپسىردى.
وسى ءراسىم بارىسىندا رەددي سەنىم گراموتاسىنىڭ قازاقستان مەن جاڭا زەلانديا اراسىنداعى ديپلوماتيالىق قارىم- قاتىناستاردىڭ ورناعانىنا 25 جىل تولىپ وتىرۋىنا وراي بەرىلۋىن جوعارى باعالادى جانە ەكىجاقتى قارىم-قاتىناستىڭ جىلى، دوستىق باعىتىندا ءوربىپ كەلە جاتقاندىعىن اتاپ ءوتتى.
گەنەرال- گۋبەرناتور سونىمەن قاتار، قازاقستان پرەزيدەنتى نۇرسۇلتان نازاربايەۆتىڭ حالىقارالىق جانە وڭىرلىك قاۋىپسىزدىكتى قاماتامسىز ەتۋ، يادرولىق قارۋدان باس تارتۋ مەن ونى تاراتپاۋ جونىندەگى ىستەرگە قوسقان ۇلەسىن جوعارى باعالادى. سونداي-اق ول قازاقستانداعى ەكونوميكالىق جانە ساياسي رەفورمالاردىڭ ماڭىزدىلىعىن اتاپ ءوتتى.
رەددي قازاقستاننىڭ ب ۇ ۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندەگى ىستەرىنە جانە ەكسپو-2017 كورمەسىن وتكىزۋگە ساتتىلىك تىلەدى. ول سونداي-اق ەل باسشىلىعىنىڭ جاڭا زەلانديا ازاماتتارى ءۇشىن قازاقستاندا 30 كۇنگە دەيىن ۆيزاسىز جۇرۋگە بەرگەن رۇقساتى ءۇشىن ريزاشىلىعىن ءبىلدىردى.
ءوز كەزەگىندە سۇلەيمەن جەكە ءوزىنىڭ جانە ەلباسىنىڭ جاڭا زەلانديا ۇكىمەتى مەن حالقىنا دەگەن شىن جۇرەكتەن جولداعان لەبىزىن جەتكىزدى. ديپلومات سوزىندە گەوگرافيالىق جاعىنان الشاق جاتقاندىعىنا قاراماستان قازاقستان مەن جاڭا زەلانديانىڭ حالىقارالىق ارەنادا ماڭىزدى ارىپتەس ەكەندىگىن جانە ەلدەردىڭ ەكىجاقتى ساۋدا ەكونوميكالىق قارىم-قاتىناستاردى دامىتۋدا ۇلكەن الەۋەتكە يە ەكەندىگىن اتاپ ءوتتى.
بۇل رەتتە ەلشى اسىرەسە اگروونەركاسىپ سالاسىنداعى بايلانىستارعا ەرەكشە ەكپىن ءتۇسىردى. اڭگىمە سوڭىندا گەنەرال-گۋبەرناتور پرەزيدەنت نۇرسۇلتان نازاربايەۆقا ودان ءارى اتقاراتىن ىستەرىنە دە ساتتىلىك تىلەپ، ەكى ەل اراسىنداعى ىنتىماقتاستىقتى ارتتىرۋداعى ديپلوماتيالىق جۇمىستارىنىڭ ءساتتى بولۋىنا تىلەكتەستىگىن ءبىلدىردى.
اۋدارما: ايدار وسپاناليەۆ
