تالدىقورعانعا رەسەيدىڭ كوشپەلى حايۋاناتتار باعى كەلدى - فوتو، كەسكىن

تالدىقورعان. قازاقپارات - تالدىقورعانعا رەسەيدىڭ پياتيگورسك قالاسىنان كوشپەلى حايۋاناتتار باعى كەلدى، دەپ حابارلايدى قازاقپارات ءتىلشىسى.

كوشپەلى زووباقتا 40 تان استام اڭ- قۇس بار. ولاردىڭ باسىم بولىگى قىزىل كىتاپقا ەنگەن جانۋارلار. امۋر جولبارىسى، اق جولبارىس، ارىستاندار مەن ايۋلار، قارا ءتۇستى قاسقىر، پۋما مەن سىلەۋسىندەر تالدىقورعاندىقتاردى ەرەكشە ءتانتى ەتتى.ال ونىڭ باستى سەبەبى وبلىس ورتالىعىندا حايۋاناتتار باعى جوق.



جىلجىمالى حايۋاناتتار باعىن ۇيىمداستىرۋشىلاردىڭ باستى ماقساتى حالقى كوپ، ءبىراق جانۋارلار الەمىنەن سىر شەرتەتىن زووباعى جوق ەلدى- مەكەندەردى ارالاۋ. جالپى پياتيگورسك حايۋاناتتار باعى قازاقستان اۋماعىن 5 جىلدان بەرى ارالاپ كەلەدى.



ال زووباق اكىمشىلەرى ساپار بارىسىندا جەرگىلىكتى تۇرعىنداردى ۋاقىتشا نەمەسە تۇراقتى جۇمىسقا ورنالاستىرۋدا.

ماسەلەن الينا سايتوۆانىڭ تاراز قالاسىنان بىرگە كەلە جاتقانىنا 7 اي بولدى. ايلىق تابىسى 50 مىڭ تەڭگە. حالىق نەعۇرلىم كوپ كەلسە، تابىسى دا ەسەلەنە تۇسەدى.



تالدىقورعاندىق ەلدوس ناۋرىزباي دا اتكەنشەك قىزمەتكەرى بولىپ ورنالاستى. ازىرشە كۇنىنە تاباتىنى 1500 تەڭگە. جۇمىس كوڭىلىنەن شىقسا، ارى قاراي بىرگە جۇرە بەرمەك. كوشپەلى حايۋاناتتار باعىندا جينالعان جۇرت جانۋارلاردى تاماقتاندىرىپ، سۋرەتكە ءتۇسۋ مۇمكىندىگىنە يە.

ۇلكەنگە دە، كىشىگە دە شات-شادىمان كوڭىل سىيلاعان ولار تالدىقورعاندا 3 اپتا ايالداماق. ودان كەيىن ءۇشارال قالاسى، ارى قاراي شىعىس قازاقستانعا جول تارتپاق.