قازاقستان مەن قىتاي وڭىرلىك قاۋىپسىزدىك ماسەلەلەرىن تالقىلادى

بەيجىڭ. قازاقپارات - قىتايداعى قازاقستان ەلشىسى شاحرات نۇرىشەۆ ق ح ر لاڭكەستىككە قارسى كۇرەس جونىندەگى مەملەكەتتىك كوميسسارى چەن گوپينمەن كەزدەستى، دەپ حابارلادى قىتايداعى «قازاقپارات» ح ا ا مەنشىكتى ءتىلشىسى.

كەزدەسۋ بارىسىندا وڭىرلىك قاۋىپسىزدىك، لاڭكەستىكپەن، سەپاراتيزممەن جانە ەكسترەميزممەن كۇرەس سالاسىنداعى ەكى ەلدىڭ ىنتىماقتاستىق ماسەلەلەرى تالقىلاندى. حالىقارالىق كۇن ءتارتىبىنىڭ ءبىرقاتار ماسەلەلەرى، اتاپ ايتقاندا ب ۇ ۇ، ش ى ۇ ءا و ىس ش اياسىندا قازاقستان مەن قىتايدىڭ ءوزارا ءىس-قيمىلدارى بويىنشا پىكىر الماستى.

چەن گوپين ديپلوماتيالىق قاتىناستىڭ 25 جىلىندا، ەكى مەملەكەت باسشىلارىنىڭ كۇشى ارقاسىندا ەكى جاقتىڭ قاتىناسى ۇلكەن ناتيجەگە قول جەتكىزدى. ول وسى جىلعا جوسپارلانعان جوعارى دەڭگەيدەگى ساپارلار، ەكىجاقتى ءىس-شارالار، «ەكسپو-2017» كورمەسىنىڭ اشىلۋى، قازاقستانداعى قىتايدىڭ تۋريزم جىلىن باستى نازارعا الدى.

ءوز كەزەگىندە نۇرىشەۆ ەكى ەل اراسىنداعى جان-جاقتى ستراتەگيالىق ارىپتەستىك جاڭا دامۋ كەزەڭىنە شىققانىن اتاپ ءوتتى، ونى مەملەكەتتەر مەن ۇكىمەتتەر باسشىلارى دەڭگەيىندەگى تۇراقتى ساپارلار، تىعىز ساۋدا-ەكونوميكالىق، ينۆەستيتسيالىق، كولىكتىك، ەنەرگەتيكالىق جانە مادەني-گۋمانيتارلىق ىنتىماقتاستىق كورسەتەدى.

كەزدەسۋ قورىتىندىسى بويىنشا ش. نۇرىشەۆ چەن گوپينگە ق ر- داعى ق ح ر ەلشىسى جانە ق ح ر سىرتقى ىستەر ءمينيسترىنىڭ ورىنباسارى رەتىندە ەكىجاقتى قاتىناستاردى دامىتۋعا قوسقان ۇلەسى ءۇشىن «ق ر تاۋەلسىزدىگىنە 25 جىل» مەدالىن تابىس ەتتى.