ەلوردا اكىمى بەيجىڭدەگى كولىك قىزمەتىن ۇيىمداستىرۋ جۇمىسىمەن تانىستى
كەزدەسۋ بارىسىندا باۋىرلاس قالالاردىڭ ىنتىماقتاستىعىنىڭ بولاشاعى تالقىلاندى. ناقتىراق ايتقاندا «ەكسپو-2017» حالىقارالىق مامانداندىرىلعان كورمەسىنىڭ ۇيىمداستىرىلۋى قارساڭىندا بەيجىڭنىڭ استاناداعى كۇندەرىن ۇيىمداستىرۋ جۇمىستارى ءسوز بولدى.
اسەت يسەكەشەۆ استانالاردىڭ ىسكەرلىك جانە مادەني بايلانىستارىن كەڭەيۋدە تۋريزم سالاسىنىڭ الەۋەتىنىڭ زور ەكەندىگىن اتاپ ءوتتى. بۇل ماسەلە قىتايدىڭ قازاقستانداعى تۋريزم كۇندەرىنىڭ اياسىندا ەرەكشە وزەكتى بولا تۇسپەك، سول سەبەپتى ەلوردا باسشىسى بەيجىڭ تۋريستەرىن «ەكسپو-2017 كورمەسىنە قاتىسۋعا شاقىردى.
ق ح ر- مەن حالىقارالىق ساۋدانى جانداندىرۋ جونىندەگى كوميتەت وكىلدەرىنىڭ مالىمەتتەرىنشە، ەكسپو-2017 كورمەسىن كورۋگە قىتايدان 300 مىڭعا دەيىن تۋريست كەلەدى. ءۇش اي كولەمىندە قىتايدىڭ 22 پروۆينتسياسىنىڭ وكىلدەرى وزدەرىنىڭ ەكسپوزيتسيالارىن ۇسىنىپ، ىسكەرلىك الەۋەتتەرى مەن مادەنيەتتەرىن تانىستىرادى.
بەيجىڭنىڭ استاناداعى كۇندەرى 16-18- ماۋسىم ارالىعىندا وتەدى. يسەكەشەۆ پەن تساي تسي قازاقستان- قىتاي جوبالارىنىڭ ماڭىزدىلارىنىڭ ءبىرى بولىپ تابىلاتىن استانادا جەڭىل رەلستى كولىك قوزعالىسىن جولعا قويۋ جوباسىن تالقىلادى.
بۇعان قوسا ەلوردا اكىمى استانا مەن بەيجىڭ اراسىندا كولىك باسقارۋ ماسەلەسى بويىنشا تاجىريبە الماسۋ جۇمىستارىن تۇراقتى جۇرگىزۋگە مۇددەلى ەكەندىگىن جەتكىزدى.
