سەربيانىڭ جاڭا پرەزيدەنتى قازاقستان ەلشىسىن قابىلدادى
«كەزدەسۋ بارىسىندا تاراپتار قازاقستان مەن سەربيا اراسىنداعى ەكىجاقتى ىنتىماقتاستىقتىڭ بولاشاعى مەن قازىرگى جاعدايىن، حالىقارالىق پروبلەماتيكانى تالقىلادى.
ەل پرەزيدەنتىنە 2- ساۋىردە وتكەن پرەزيدەنت سايلاۋىندا الەكساندر ۆۋچيچتىڭ جەڭۋىنە وراي قازاقستان باسشىسى نۇرسۇلتان نازاربايەۆتىڭ قۇتتىقتاۋ حاتى تابىس ەتىلدى. قازاقستاندىق ديپلومات «قازاقستاننىڭ ءۇشىنشى جاڭعىرۋى؛ جاھاندىق باسەكەگە قابىلەتتىلىك» اتتى پرەزيدەنتتىڭ جولداۋىندا ايتىلعان ەلىمىزدىڭ دامۋ باسىمدىعىمەن تانىستىرىپ، اتالمىش قۇجاتتىڭ سەرب تىلىندە جازىلعان ءماتىنىن تابىس ەتتى.
سونداي-اق، مەملەكەت باسشىسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنىڭ نەگىزگى تەزيستەرى مەن كونستيتۋتسيالىق رەفورمانىڭ قورىتىندىسى تۋرالى اقپارات بەردى»، - دەلىنگەن حابارلامادا.
سەربيا پرەزيدەنتى قازاقستان باسشىلىعىمەن وتكەن جىلى بولعان كەزدەسۋدى تىلگە تيەك ەتىپ، قازاقستان استاناسىنىڭ دامۋ قارقىنىنا قايران قالعانىن ايتتى. مەملەكەت باسشىسىنىڭ سارابدال ساياساتىنىڭ ارقاسىندا قازاقستان حالىقارالىق قوعامداستىققا ءوزىن مويىنداتا بىلگەنىن اتاپ ءوتتى.
سەربيانى قازاقستاندى ماڭىزدى سەرىكتەس رەتىندە قاراستىرىپ، ۇزاق مەرزىمدى قارىم-قاتىناستى دامىتۋعا نيەتتى ەكەنىن جەتكىزدى.
