اقتاۋداعى كوشە شامدارى كۇن قۋاتىمەن جۇمىس ىستەيتىن بولادى
ارىپتەستىك اياسىندا قىتاي كومپانياسى اقتاۋ قالاسىنىڭ كوشەلەرىندەگى جارىق جەلىلەرىن كۇن ساۋلەلەرى ارقىلى جۇمىس جاسايتىن جارىقتاندىرۋدىڭ جاڭا ۇلگىسىنە اۋىستىرادى.
«استانا-ەكسپو-2017» حالىقارالىق كورمەسىنە دايىندىق اياسىندا اقتاۋ قالاسىنداعى كوشە جارىقتارى جاسىل ەكونوميكا نەگىزىندە جۇمىس جاسايتىن جارىقتاندىرۋ ۇلگىسىنە وتەدى. بۇل قىتاي كومپانياسىنىڭ ۇزاق مەرزىمدى ينۆەستيتسيالىق جوباسى. جوبا ماڭعىستاۋ وبلىسىنىڭ بارلىق اۋماعىن قامتۋدى جوسپارلاپ وتىر»، - دەپ اتاپ ءوتتى ماڭعىستاۋ وبلىسىنىڭ اكىمى ەرالى توعجانوۆ.
جوبانى ىسكە اسىرۋدىڭ جوسپارىن جاساقتاۋ ءۇشىن ءۇشجاقتى جۇمىس توبى قۇرىلادى.
ەنەرگيانى ۇنەمدەيتىن قۇرىلعىنى ورناتۋ، ونى ىسكە قوسۋ، رەتتەۋ جۇمىستارىنىڭ بارلىعى مەملەكەتتىك-جەكە-مەنشىك ارىپتەستىك اياسىندا ۇيىمداستىرىلادى.
«جوبا اقتاۋ قالاسىنان باستالاتىن بولادى. مۇندا بۇگىندە ناتريلى جارىق قولدانىلادى. ونىڭ بارلىعى زاماناۋي جارىق ديودتى شامدارعا اۋىستىرىلادى. جاڭا قۇرىلعىنىڭ ورناتىلۋىمەن قالا ەنەرگيا كوزىن %70 عا دەيىن ۇنەمدەي الادى. وسى ارقىلى ينۆەستور ءوز قاراجاتىن قايتارادى»، - دەپ حابارلادى «Source Energy» ج ش س باقىلاۋ كەڭەسىنىڭ ءتوراعاسى ورالبەك بوتباي.
سودان كەيىن ءوزارا ىنتىماقتاستىق تۋرالى ءدال وسىنداي مەموراندۋم اقتاۋ قالاسىنىڭ اكىمدىگى، «Source Energy» ج ش س جانە ق ح ر «Huaming Guangdong smartled co LTD» كومپانياسى اراسىندا جاسالدى.
