دەنساۋلىق. اۋىرماۋدىڭ جولى بار ما؟

نۇر-سۇلتان. قازاقپارات - ءومىردىڭ تەك جاقسى جاعىن كورۋ كەرەك! ءار كۇن كەرەمەت وتپەۋى مۇمكىن، ءبىراق ءار كۇندە ءبىر جاقسىلىق بولادى!

ۇنەمى وسىلاي ويلايتىن وپتيميستەردىڭ دەنساۋلىعى جاقسى، ءومىرى ۇزاق بولادى. ونى عىلىم دا تۇسىندىرە الادى. 11-عاسىردا يبن- سينا ەكى توقتىعا تاجىريبە جاسايدى. ەكەۋىنە بىردەي جەم- ءشوپ بەرەدى. تەك بىرەۋىن قاسقىردىڭ جانىندا ۇستايدى. كوپ كەشىكپەي سول توقتى ارىقتاپ، اۋرۋ بولادى. 70-جىلدارى يزرايل دارىگەرلەرى دە جۇرەك- قان تامىرلارى اۋرۋلارىنا شالدىققان 10 مىڭ ادامدى زەرتتەگەن ەكەن. ءبىر قىزىعى، ولاردىڭ كوبى كۇيزەلىسكە ۇشىراعان، جاقىنىنىڭ سۇيىسپەنشىلىگى مەن قولداۋىن سەزىنبەگەندەر بولىپ شىعادى.

پسيحوسوماتيكا پسيحولوگيالىق فاكتورلاردىڭ ءتان اۋرۋلارىنا اسەرىن زەرتتەيدى. مىسالى، راكپەن اۋىراتىن ادامدارعا ارناپ بىرنەشە كىتاپ جازعان ۆەندي حارفەم اتتى تەراپيەۆت ءوزى دە يممۋندى جۇيە راگىنا شالدىققاندا ۇنەمى كوتەرىڭكى كوڭىل-كۇيدە ءجۇرۋدى قولعا الادى. ناتيجەسىندە سوڭعى 12 جىلدا ونىڭ اۋرۋى ءبىر دەڭگەيدە تۇر.

عالىمداردىڭ ايتۋىنشا، دەنە اۋرۋلارىنىڭ %32-40 ى كۇيزەلىس پەن جان جاراقاتىنان پايدا بولادى. ياعني، ادامنىڭ ومىرگە دەگەن كوزقاراسى اعزاعا دا اسەر ەتۋى مۇمكىن. مىسالى، ۇنەمى جامان نارسەلەردى ويلاۋ ادەتكە اينالسا، ول سوزىلمالى اۋرۋعا ۇشىراتادى. ۋايىمشىل ادامنىڭ اسقازانى، اشۋ- ىزاسىن سىرتقا شىعارمايتىن ادامداردىڭ باۋىرى اۋىرادى.

كوتەرىڭكى كوڭىل- كۇي مەن جاقسى سوزدەر يممۋندىق جۇيەنى نىعايتادى. ال ۇنەمى جاقسى نارسەنى ويلاۋ قان قىسىمى، جۇرەك اۋرۋى، ارتىق سالماق جانە ديابەت سەكىلدى اۋرۋلاردىڭ الدىن الادى. ءجيى كەزدەسەتىن اۋرۋلارعا قانداي پسيحولوگيالىق جاعداي اسەر ەتۋى مۇمكىن؟ بۇل سۇراققا «تۆوە تەلو گوۆوريت: ليۋبي سەبيا!» (ليز بۋردو) مەن («يستسەلي سەبيا سام» (لۋيزا حەي) اتتى كىتاپتار نەگىزىندە جاۋاپ ىزدەپ كورسەك.

ۇيقىشىلدىق ءومىردىڭ قيىن كەزەڭدەرىندە ءجيى پايدا بولادى. ادامنىڭ قيىندىقتارعا توتەپ بەرۋگە ءازىر ەمەستىگىن كورسەتەدى.

سەبەپسىز شارشاۋ ناقتى ماقساتى جوق ادامداردا بولادى. بولاشاققا دەگەن قورقىنىش پەن سەنىمسىزدىك ولاردىڭ ەنەرگياسىن الادى.

اپپەنديتسيت - ومىردەن قورقۋ، ءوزى قالاعان نارسەدەن باس تارتۋ كەزىندە بولادى.

استيگماتيزم. سول كوز ءوز پىكىرىن، وڭ كوز قوعامدىق پىكىردى بىلدىرەدى. كوبىنە ادام ءوز پىكىرىن دۇرىس ساناپ، باسقالاردىڭ ويىمەن ساناسقىسى كەلمەگەندە تۋادى. كەيبىر استيگماتيكتەردىڭ جان دۇنيەسى مەن قوعامدىق ءومىرى ءبىر- بىرىنە ساي كەلمەۋى مۇمكىن.

استما - ادام تىعىرىقتان شىعاتىن جول تاپپاعان كەزدە پايدا بولادى. كەيدە موينىنا تىم اۋىر جۇك العانداردا دا كەزدەسەدى.

ارتريت - وزىنە دە، وزگەلەرگە دە قاتتى ادامدا بولادى. ۇنەمى سىني كوزقاراسپەن جۇرەتىندەردە دە بولۋى مۇمكىن.

الىستان ناشار كورۋشىلىك - بولاشاقتا بولاتىن وقيعالاردان قورقۋدان تۋادى. وزىنە قاتىسى جوق نارسەلەردى كورگىسى كەلمەيتىن، اينالادا نە بولىپ جاتقانى قىزىقتىرمايتىن ادامدا، كوبىنەسە، بالالار مەن جاستاردا، 40 تان اسقانداردا كەزدەسەدى.

باس ساقيناسى - ءوزى تۋرالى باسقالاردىڭ نە ويلايتىنىنا الاڭداۋ سەزىمىنەن بولادى. باس اۋرۋى باسقالاردىڭ قاتەلىگىنە ءوزىن كىنالاۋ سەزىمىنەن پايدا بولۋى مۇمكىن. ادامنىڭ ءوز-وزىنە دەگەن سەنىمدىلىگى جوعالعان كەزدە باس سۇيەگىنىڭ ۇستىڭگى بولىگى اۋىرادى. بۇلشىق ەت اۋرۋلارىنا جۇمىسقا بايلانىستى قيىندىقتار اسەر ەتەدى. ءبىر شارۋانى اتقارا الماۋ نەمەسە ىستەگىسى كەلمەۋ سەزىمىنەن بولادى.

برونحيت - وتباسىندا قيىندىقتار تۋىنداعان ادامداردا ءجيى كەزدەسەدى. قارسىلىعىن اشىق بىلدىرە الماۋ سەزىمىنەن تۋىندايدى.

گاستريت - اشۋ-ىزانى ىشتە ساقتاعان ادامداردا ءجيى بايقالادى. گايموريت ءوز-ءوزىن ىشتەي اياۋ سەزىمىنەن بولادى.

جۇقپالى اۋرۋلار - پەسسيميستەرگە ءتان. سونداي-اق باسقالاردىڭ ءسوزىن جۇرەگىنە جاقىن قابىلدايتىن ادامداردا دا كەزدەسەدى.

يممۋنيتەتتىڭ تومەندىگى ءوزىنىڭ «مەنىن» قورعاي الماۋدان، باسقالارعا قارسى كەلە الماۋدان بولادى.

سەبەپسىز جوتەل اشۋلانشاق ادامدارعا ءتان.

ارتىق سالماق ءوزىن پسيحولوگيالىق تۇرعىدا قورعاي المايتىن نەمەسە ءوزىنىڭ قورعانى بارىنا سەنىمسىز ادامداردا بايقالادى.

تۇماۋعا ءوز-ءوزىن اياۋ نەمەسە شىقپاي قالعان جاس سەبەپشى بولادى.

راك قاتتى پسيحولوگيالىق سوققى العان ادامداردا ءجيى كەزدەسەدى. ديابەت قاسىنداعى جاقىندارىنىڭ بارىنە قامقور بولعىسى كەلەتىندەردە ءتان.

دايىنداعان گۇلنۇر قۋانىشبەك قىزى

Egemen.kz